Երգի պատմություն՝ խճճված պատմությամբ
Նաիրա Հայրապետյան
«All Shook Up». Էլվիս Փրեսլիի կատարմամբ այս երգը 1957 թվականին լավագույն դիրքերն էր զբաղեցնում տարբեր հիթ-շքերթներում միանգամից մի քանի ոճում` փոփ, քանթրի և արընդբի: Սինգլն արդեն ապրիլ ամսին գլխավորում էր «Billboard Hot 100»-ը՝ այստեղ մնալով ութ շաբաթ շարունակ: Միևնույն ժամանակ առաթին հորիզոնականում էր «Billboard R&B chart»- ում և այս դիրքում էլ հաստատվեց ուղիղ չորս շաբաթ: Քանթրիի դասակարգման շարքում երգը առաջացավ՝ հասնելով երրորդ հորիզոնականին: Հենց այս առանձնահատկություններով էլ այն գրավեց երաժշտասերների այն հսկա լսարանը, որի շնորհիվ երգը երկու անգամ պլատինե ճանաչվեց ԱՄՆ-ում և արժանացավ 1957թ-ի տարվա լավագույն երգ տիտղոսին:
«All Shook Up»-ի հեղինակը ռոքնռոլյան սերնդի երաժիշտներին շատ հայտնի, բայց հանրությանը գրեթե անհայտ երգահան Օտիս Բլեքուելն էր: Աֆրոամերիկյան ծագմամբ այս երաժիշտը (նա նաև երգիչ և դաշնակահար էր) իր բազմաթիվ ստեղծագործություններով մեծ ազդեցություն է ունեցել ռոքնռոլի մի շարք ներկայացուցիչների վրա՝ Փրեսլի, Լիթլ Ուիլի Ջոն, Ջերի Լի Լյուիս, Դի Քլարք, Ջիմի Ջոնս և այլք: Նա համարվում է ռոքնռոլի վաղ շրջանի ամենանշանավոր անուններից մեկը: «All Shook Up»-ը Բլեքուելը գրեց 1956թ.-ին, կարծիքներից մեկի համաձայն՝ «Shalimar Music» երաժշտական ընկերության աշխատասենյակներից մեկում: Նա այդ օրը զբաղված էր հերթական երգի աշխատանքով, երբ ընկերության հիմնադիրներից մեկը, «Pepsi»-ի շիշը թափահարելով մոտենում է Բլեքուելին և կատակով ասում, թե կարո՞ղ է երգ գրել «all shook up» արտահայտության հիման վրա (shake-ցնցել, թափահարել):
Փրեսլիի կենսագիրներից Փիթեր Գուրալնիկի տեսակետն այլ է: Նրա համոզմամբ ` Էլվիսն է այդ արտահայտության հիման վրա երգ գրելու մտահղացման հեղինակը: Երգիչը գտնում էր, որ այն շատ լավ և հարմար արտահայտություն է կրկներգի համար և առաջարկեց այն իրականացնել: Այս հանգամանքով էլ պայմանավորված է հետագայում նրան որպես համահեղինակ ներկայացնելը: Սակայն, եթե աչքի անցկացնենք Է. Փրեսլիի 1957թ. հարցազրույցներից մեկը, փոքր-ինչ այլ բան պիտի տեսնենք: «Ես երգ գրելու նույնիսկ մտահղացում չեմ ունեցել: Միգուցե բացառությամբ մի դեպքի: Գիշերը քնելիս երևի ինչ-որ երազ էի տեսել և հանկարծ վեր թռա ցնցված: Ես զանգեցի ընկերոջս և պատմեցի նրան դրա մասին, իսկ առավոտյան մենք արդեն նոր երգ ունեինք՝ «All Shook Up» անունով»:
Այս խճճված ու այդպես էլ անհասկանալի մնացող պատմությունն այնուամենայնիվ կարևոր է նրանով, որ երաժշտասերներն ունեցան այս երգը:
Առաջինն այս երգը ձայնագրվել է ամերիկացի երգիչ և դերասան Դեյվիդ Հես-Հիլի կատարմամբ: Այն թողարկելուց մի քանի շաբաթ անց հայտնվեց Փրեսլիի կատարումը, բայց «I’m All Shook Up» վերնագրով: Ռոքնռոլի, ռիթմընդբլյուզի համաձուլում-երգը սկսեց հնչել տարբեր ռադիոկայաններում և մեծ մասսայականություն վայելել: Մարտ ամսին թողարկված «All Shook Up» խորագրով սինգլն արդեն մտավ «Billboard»-ի թեժ 100-յակն ու առաջ գնալով հասավ 25-րդ հորիզոնականին, իսկ կարճ ժամանակ անց, ապրիլին, ինչպես արդեն նշել ենք, հասավ հաղթական առաջինին՝ այստեղ մնալով ութ շաբաթ շարունակ: Իր բազմաթիվ հաջողությունների մեջ այս երգը Փրեսլիի երգացանկում առանձնանում է նաև նրանով, որ այն արտիստի թիվ մեկ հիթն էր «UK Singles Chart»-ում և խստապահանջ բրիտանացիները այս տեղում նրան պահեցին գրեթե յոթ շաբաթ:
Սինգլը երկու միլիոնից ավել վաճառք ունեցավ, ԱՄՆ-ում ճանաչվեց տարվա լավագույն երգ և այլն, և այլն:
1991թ-ին ամերիկացի երգիչ-երգահան, դաշնակահար և կոմպոզիտոր Բիլլի Ջոելը «Մեղրամիս Լաս-Վեգասում» ֆիլմի սաունդթրեկի համար հենց այս երգն ընտրեց կատարելու համար: Ոչ միայն «All Shook Up»-ը, նաև մի քանի այլ երգեր` Էլվիսի երգացանկից: Բիլլի Ջոելի կատարումը ևս մեծ հաջողություններ գրանցեց, հատկապես, երբ 1992թ-ին թողարկվեց առանձին սինգլով: Այն լավագույն հորիզոնականներ զբաղեցրեց և՛ ամերիկյան, և՛ բրիտանական երաժշտական հիթ-շքերթներում:
«All Shook Up»-ը կատարվել է ժամանակի նորահայտ, հետագայում ամենահայտնի աստղեր դարձած տարբեր երաժիշտների կատարմամբ՝ Սյուզի Քուատրոյի, բրիտանական հայտնի «The Jeff Beck Group» ռոք խմբի, Դոլի Փարթոնի, Բրյուս Սփրինգսթինի և այլն:
1969թ-ին այն կատարեցին նաև բիթլերը` «Let It Be» ալբոմի ձայնագրության ժամանակ, ավելի ուշ, 1999թ-ին, Փոլ Մաքարթնին այն ձայնագրեց իր «Run Devil Run» ալբոմի համար: Երգի բազմաթիվ քավըրների մեջ Է. Փրեսլին հավանություն տվեց Քուատրոյի կատարմանը: Քուատրոն երգը ձայնագրել էր իր դեբյուտային ալբոմի համար 1973թ.-ին, իսկ մեկ տարի անց թողարկեց սինգլը: Փրեսլիի կարծիքով դա բոլոր «All Shook Up»-երից լավագույնն էր, որը գերազանցում էր նույնիսկ բնօրինակը: Եվ այդ առիթով նա երգչուհուն հրավիրեց Գրեյսլընդ, որտեղ գտնվում էր իր ոչ պակաս լեգենդար առանձնատունը: Քուատրոն, սակայն, մերժեց այս աստղային առաջարկը:
Մեկնաբանել