Արտաշատում ուժեղ քամին, անձրևն ու կարկուտը վնասել են 300 հեկտար խաղող, 85 հեկտար բանջարաբոստանային կուլտուրա
Լիլիթ Թադևոսյան
Օգոստոսի 22-ին, ժամը 19.35-ի սահմաններում, Արարատի մարզի Արտաշատի տարածաշրջանում ուժեղ քամու և ուղեկցվող անձրևի և կարկուտի հետևանքով վեց գյուղերում մեծ չափերի բերք է վնասվել:
«Հետք»-ի հետ զրույցում Արարատի մարզպետարանի գյուղատնտեսության և բնապահպանության վարչության պետ Հայկազ Տերտերյանը տեղեկացրեց, որ դեռևս վնասի չափը վերջնական չէ, բայց իրենց օպերատիվ տվյալներով, այս պահի դրությամբ վնասվել է մինչև 300 հեկտար խաղողի այգի, մոտ 85 հեկտար բանջարաբոստանային կուլտուրա` լոլիկ, վարունգ, նաև ծխախոտի բերքն է վնասվել: Վնասված համայքները վեցն են` Շահումյան, Այգեպատ, Այգեզարդ Վերին Արտաշատ, Ոստան և քաղաք Արտաշատ:
«Հենց նույն օրը մարզպետի հանձնարարությամբ տեղերում հանձնաժողովներ են ստեղծվել, ընտրել ենք ձևաչափ և այդ ձևաչափերով աշխատում ենք ու օգնում մարդկանց: Մենք փոխմարզպետի հետ հենց նույն օրը եղել ենք տեղերում և իրավիճակը վերահսկել ենք»,- ասաց Հայկազ Տերտերյանը:
Վերջինս նշեց, որ խաղողի դեպքում վնասը մեծ է եղել նաև այն պատճառով, որ վազերն արդեն ծանրաբեռնված են և քամու պատճառով հենասյուներն են շրջվել, որոնք այս պահի դրությամբ վտանգավոր են և եթե դա օրինակ` 15 օր առաջ լիներ` նման մեծ չափի վնասներ չէր լինի,
Իսկ վնասի չափերի վերջնական արդյունքները հայտնի կլինեն վաղը` ուշ երեկոյան:
Մեկնաբանել