Առողջապահության նախարարությունը պարզաբանում է ուղարկել Արարատի մարզի Սուրենավան գյուղի բնակչուհի Կարինե Հարությունյանի՝ օձի խայթոցից մահվան դեպքի մասին հոդվածի վերաբերյալ, որ երեկ հրապարակվել է «Հետքում»: Պարզաբանումը ներկայացնում ենք ստորև. 

«ՀՀ առողջապահության նախարարությունը խորապես ցավակցում է օձի խայթոցից մահացած Կ. Հարությունյանի հարազատներին։

«Հետք» էլեկտրոնային լրատվամիջոցում «Օձի խայթոցից մահացած կնոջը ժամանակին էին տեղափոխել հիվանդանոց. ինչո՞ւ է նախարարությունն ապատեղեկատվություն տարածում» հրապարակման կապակցությամբ հայտնում ենք, որ տուժածի որդու` Գագիկ Թադևոսյանի դիմում-բողոքի հիման վրա դեպքի կապակցությամբ հարուցվել է վարչական վարույթ։

Ինչ վերաբերում է օգոստոսի 20-ին թողարկված հաղորդագրության մեջ տեղ  գտած անճշտությանը, ապա այդ առթիվ իրականացված ուսումնասիրությամբ պարզվել է, որ  դա շփոթմունքի արդյունք է: Դեպքի մասին երկու տարբեր բուժհաստատությունից տեղակատվություն ստացած մասնագետն օձի խայթոցի և հոսպիտալացման ժամանակագրության սխալ հաշվարկով ներկայացրել է ոչ ճիշտ  ժամկետներ, ինչի համար կենթարկվի համապատասխան տույժի։ Նախարարությունը ապատեղեկատվություն տարածելու որևէ շարժառիթ չէր կարող ունենալ։ Բուժհաստատություններից ստացված տեղեկատվությունների վերլուծությամբ պարզվել է, որ տուժածն օձի խայթոցից անմիջապես հետո հոսպիտալացվել է Արարատի ԲԿ, որտեղից էլ` վիճակը ծանրանալուց հետո տեղափոխվել «Էրեբունի» ԲԿ։

Հայցում ենք  Կ. Հարությունյանի հարազատների ներողամտությունը»։