Է. Հեմինգուեյ. «Երբ կկտրվի վերջին ծառը, երբ կթունավորվի վերջին գետը, երբ կսպանվի վերջին թռչունը, այդ ժամանակ դուք կհասկանաք, որ փողը հնարավոր չէ ուտել»
«Հայանտառ» ՊՈԱԿ-ի «Լալվարի» անտառտնտեսության տնօրեն Հարություն Ամիրջանյանը, նույն ինքը` շնողցի Աթոն, չի կարող լրջորեն վերաբերվել ամերիկացի գրող Էռնեստ Հեմինգուեյի` սերունդներին պատգամած խոսքին:
Հ. Ամիրջանյանը վերջերս է նշանակվել «Լալվարի» անտառտնտեսության տնօրենի պաշտոնին: Մինչ տնօրեն նշանակվելը նա աշխատել է որպես Ծաղկաշատի անտառապետության անտառապետ: Տնօրենի իր պաշտոնավարման առաջին օրերին Աթոն հավաստիացնում էր, թե մեծ հսկողություն է սահմանելու «Լալվարի» անտառտնտեսության ենթակայության տակ գտնվող անտառների նկատմամբ և ոչ մի ապօրինի անտառհատում թույլ չի տալու: Պարզվում է` Աթոն անտառը պետք է փրկեր հենց իրենից:
«Հայանտառ» ՊՈԱԿ-ի կողմից 2015թ.-ին «Լալվարի» անտառտնտեսությանը իջեցված 1220 խ.մ. բնափայտի մթերման պլանից Հ.Ամիրջանյանը Շամլուղի անտառապետության անտառներում այս տարի նախատեսել է կատարել 228 խ.մ. բնափայտի մթերում: Նորմալ դեպքում «Լալվարի» անտառտնտեսության համար 228 խ.մ. բնափայտի մթերումը 1-2 օրվա գործ է: «Այստեղից ամիսներ շարունակ շատ մեծ քանակի փայտ է գնում, օրական 30 խորանարդ մետր տարողությամբ ոչ պակաս մի 5-6 մեքենա գնում է:- հայտնեց Շամլուղի Բուղաքար թաղամասի հին գերեզմանոցի մոտ մեզ պատահած մի բնակիչ` ավելացնելով,- Իմ պայքարով, միևնույնն է, ես գեշամարդի եմ դառնալու: Հիմնականում էստեղ բնափայտի մթերումը «Լալվարի» անտառտնտեսության տնօրինությունն է ղեկավարում»:
Նույն գերեզմանոցի դիմացի տարածքում կուտակված փայտ կար: «Անտառից փոքր մեքենաներով իջեցնում են, էստեղ թափում, հետո էստեղից մեծ բեռնատարներին բարձում են ու ուղարկում»,-տեղեկացրեց մեկ այլ շամլուղցի: Փայտակույտեր էին թափված նաև Շամլուղի «Թթու ջուր» հանդամասին հարող տարածքում: «Շամլուղ-Ախթալա» միջհամայնքային ճանապարհին մեզ հետևում էր մոտոցիկլետով մի երիտասարդ: Ճանապարհի աջ կողմի թփուտների հետևում նկատեցինք նոր մեծ փայտակույտեր: Երբ լուսանկարում էի դրանք, երիտասարդը բջջային հեռախոսով ինչ-որ մեկին հայտնեց մեր մասին, իսկ երբ նկատեց, որ լուսանկարում ենք նաև իրեն, արագ հեռացավ:
«Շամլուղ-Ախթալա» միջհամայնքային ճանապարհի` դեպի Ախթալա համայնք թեքվող շրջադարձում նկատեցինք Վերին Ախթալա գյուղի անանցանելի ճանապարհով ծանր բեռից տնքալով դեպի մայրուղի եկող AM 36 OL 437 համարանիշով փակ բեռնատարին: Լուսանկարելիս բեռնատարի վարորդը դանդաղեցրեց ավտոմեքենայի ընթացքը. «Քար եմ տեղափոխում»,- ասաց նա: Բեռնատարի բեռնաթափքի արանքներից երևում էր բնափայտը:
Հիշեցնենք, որ հազիվ մեկ ամիս առաջ «Հետքը» ««Որ ծառը աչքներն ուտում ա, կտրում են». Ծաղկաշատի բնակիչ» հրապարակմամբ ահազանգել է «Լալվարի» անտառտնտեսության կողմից Ծաղկաշատի անտառապետության անտառներում իրականացվող ապօրինի անտառհատումների մասին: Լոռու մարզի դատախազությունը և ոստիկանությունը լուռ հետևում են «Լալվարի» անտառտնտեսության անտառներում ամեն օր իրականացվող ապօրինի անտառահատումներին:
Մեկնաբանություններ (20)
Մեկնաբանել