Հայաստանի դեմոկրատական կուսակցությունը սահմանադրական փոփոխությունների վերաբերյալ հայտարարություն է տարածել, որը ներկայացնում ենք ստորև:

«Ուսումնասիրելով Սահմանադրական փոփոխությունների հանձնաժողովի ներկայացրած նախագիծը, արձանագրում ենք, որ արված փոփոխությունները անբավարար են և չեն համապատասխանում Հայաստանի դեմոկրատական կուսակցության կողմից ներկայացված առաջարկներին:

Մեր համոզմամբ, կառավարման մոդելը փոխելով, բայց իրականության մեջ պահպանելով արատավոր երևույթները, որևէ լուրջ փոփոխություն չի լինելու: Զարմանալի է, որ Սահմանադրության փոփոխությունների հանձնաժողովի անդամի պնդմամբ, ընդունվել են միայն այն առաջարկությունները, որոնք համաձայնեցվել են և ընդունելի են եղել Հանրապետության նախագահի համար: Ստացվում է, որ պահպանվում է միակուսակցական համակարգը:

Հանրությունը մինչև օրս չի ստացել գլխավոր հարցի պատասխանը՝ գործող Սահմանադրության այդ ո՞ր դրույթներն են, որ խոչընդոտում են երկրում  տնտեսական, սոցիալական, բարոյա-քաղաքական, ազգային-պետական անվտանգության հետ կապված բազմակուտակ խնդիրների լուծմանը, արդյո՞ք այն խոչընդոտում է երկիրն արյունազրկող արտագաղթի կանխմանը, երկրի օրգանիզմը վերից-վար ճարակած կոռուպցիայի դեմ իրական պայքարին, գործող օլիգարխիկ համակարգի կազմաքանդմանը, մենաշնորհի վերացմանը, հասարակական կառավարման գործում պետության դերի մեծացմանը, սեփականատիրման ձևի ու բաշխման հարաբերությունների կարգաբերմանը:  

Հայաստանի դեմոկրատական կուսակցությունը, կողմ լինելով կառավարման խորհրդարանական ձևին,  միևնույն ժամանակ, ելնելով իր ծրագրային դրույթներից, հրապարակայնորեն արտահայտած իր դիրքորոշմամբ բազմիցս մատնանշել է ներկայացված նախագծի բազմաթիվ սկզբունքային մերժելի դրույթներ և հոդվածներ:

Ասենք, որ նախագծի վերջնական տարբերակը, նախորդի հետ համեմատած կրել է  որոշ փոփոխություններ և շտկումներ, հաշվի են առնվել նաև մեր կուսակցության մեկ-երկու առաջարկներ:

Սակայն, մեզ համար բացարձակապես անընդունելի է և անհասկանալի, թե պետականաշինության որ գաղափարախոսությունն է դրված նախագծի հիմքում և այն շտապողականությունը, որով փորձ է արվում գլուխ բերել այս նախագիծը: Այդպես էլ անփոփոխ են մնացել ընտրությունների երկրորդ փուլի անցկացման և ռեյթինգային քվեարկության, երկրի նախագահի իրավազուրկ կարգավիճակի, ՀՀ-ում կրոնական կազմակերպությունների գործունեության ազատության, երեխայի իրավունքների, մարդու՝ դեկլարատիվ բնույթ կրող իրավունքների վերաբերյալ և սկզբունքային շատ այլ դրույթներ:

Մենք գտնում ենք, որ նախագիծը ոչ միայն չի համապատասխանում մեր ազգային-պետական շահերին, ազգային արժեհամակարգին, այլև լուրջ սպառնալիք է ազգային անվտանգության տեսանկյունից՝ ուղղված մեր երկրի ու ժողովրդի ապագային:

Հետևաբար, Հայաստանի դեմոկրատական կուսակցությունը դեմ է քվեարկելու և իր քարոզչությունն է իրականացնելու՝ հանրությանը բացատրելով մեր որոշման հիմնավորումները»: