Հայաստանի համար ամենալավ սահմանադրությունը... պետություն ունենալն է, կամ փոշին միշտ անկյունում է հավաքվում
Հոլանդացին չի ասում՝ ես սիրում եմ Հոլանդիան: Բայց երկիրն այս այնքան է զարգացել, որ ինքն իր զոհն է դարձել: Գերմանացին, դանիացին ու նորվեգացին էլ դա չի անում:
Հայը միայն դա է ասում՝ ես սիրում եմ Հայաստանը:
Եթե իմ կողակիցն ինձ այդքան ասեր, որ ինձ սիրում է, ես նրան դուրս կհրավիրեի իմ կյանքից:
Ո՞վ է Հայաստանի կողակիցը:
Հայաստանի կողակիցը՝ պարզվում է՝ «հավատքի ազգ» է: Սա նշանակում է… գոյատևել: Պետություն ունեցող ազգի աղոթքը կարճ է ու քիչ:
Հայաստանի կողակիցը՝ պարզվում է՝ «արվեստի ազգ» է: Սա նշանակում է… չմեռնել: Պետություն ունեցող ազգը ուրիշի համար և ուրի՛շի հողում այդքան չի կերտում:
Հավատքով ու արվեստով չէ, որ պետություն են կառուցում. ոչ էլ սահմանադրություններ գրել-փոխելով:
«Ողբերգության մատյանից» մինչև «Ես իմ անուշ Հայաստանի» ամենամեծ բացական Հայաստա՛նն ինքն է: Հայաստանի կողակիցը պետությունից երրորդվել է:
ՀԻՇԻՐ ու ՊԱՀԱՆՋԻՐ պետություն: Այն սկսվում է քեզնից:
Հայաստանի նոր սահմանադրությունն էլ «Մատյան ողբերգություն» է. գեղեցիկ գրված… բայց չուրախացնող ու չուժեղացնող:
Հեքիաթի այն թագավորի պես. նա ծեր էր թագավոր մնալու համար. ու իր ամենանվիրական 2 ծառաներին ուղարկում է հեռու երկրներ՝ «դարման» գտնելու: Ծառաներից մեկը (վախից) չի վերադառնում, իսկ մյուսը վերադառնում է... «կախարդական հայելիով»: Թագավորը նայում է «կախարդական հայելու» մեջ...հրաշք է տեղի ունենում ու նա 10 տարով երիտասարդանում է:
Ներկա «սահմանադրության բարեփոխումներն» էլ «կախարդական հայելի» է: Բայց անգամ «կախարդական հայելու» հակառակ կողմը նույն մութ ապակին է:
Հայաստանի խորքային պրոբլեմը բնավ էլ սահմանադրությունը չէ. երկրի խորքային պրոբլեմը մահացող մարզերն են: Cui prodest? (ու՞մ է սա ձեռնտու): Քաղաքակրթությունից 2797 կմ ձախ Երևան քաղաք-պետությունից մարզերը վաղուց արդեն չեն երևում (եղունգ ունես գլուխդ քորի՞ր): Երևանի մարդաշատ կենտրոնով անցնելիս հավանաբար սա չես էլ արդեն նկատում:
Հյուսիսային պողոտայի՞ց գնդեր պիտի ձևավորվեն՝ «Արևմտյան Հայաստանը ազատագրելու համար»: Մի ձեռքում ոսկեզօծ աստվածաշունչ, իսկ մյուսում՝ Apple հեռախո՞ս:
Հայաստանի նոր սահմանադրությունը կախարդական կլինի. երկիրը կմաքրվի օլիգարխիայից ու կոռուպցիայից. հանքային բարոններն ու օֆշորային որսորդները կսսկվեն: Ներկա սահմանադրությամբ դա հնարավոր չէ:
Եթե կախարդական փայտիկ ունենայի, կհրավիրեի մեծն 4-ին՝ Տիգրան Մեծ, Վասակ Սյունի, Րաֆֆի ու Նժդեհ: Մեկ հարց կտայի իրենց՝ ի՞նչ է անհրաժեշտ Հայաստանին այսօր:
Հայը խելացի ազգ է: Հայն ամենախելացի ազգն է: Պատմության անկյուններում այնքան հեշտ է խելացի լինել:
3000 տարի + 5000 դրամ = ինչքա՞ն փոշի:
ԱՄՆ-ի միակ սահմանադրությունը 228 տարեկան է: Մեծ Բրիտանիան, Նոր Զելանդիան ու Իսրայելը սահմանադրություն, որպես այդպիսին, ընդհանրապես չունեն: Միամիտ ազգեր. սահմանադրություն գրելն այնքա՜ն հեշտ է:
Փոշին միշտ անկյունում է հավաքվում. անկյունում է մութ: Սահմանադրություններով, պաթոսներով, ճառերով, աղոթքներով, խաչերով, կոչումներով ու մեդալ-պատվոգրերով փոշի չեք թաքցնի:
Պատմությունը դաժան է, բայց և արդար: Հայը կարծես չի մեռնում. իսկ փոշին մեռնու՞մ է:
ՀԳ. Մարզերը փոշուց ազատելու պլան
1. Ժողովրդի կողմից ընտրովի «Մարզային Ժողով», որը կկարգավորի մարզի բոլոր ներքին խնդիրները: Մարզերին տալ նաև սեփական ավտոնոմ բյուջե ունենալու իրավունք,
2. Երկպալատ ԱԺ, որի վերին պալատում կնստեն «Մարզային Ժողովների» պատգամավորները,
3. Մարզերի թիվը դարձնել 5 (Արարատ, Շիրակ, Լոռի, Գեղարքունիք, Սյունիք՝ գումարած Երևան):
4. Չեղարկել ՀՀ Կուսակցությունների մասին օրենքի 5(1) հոդվածը, որպեսզի մարզերում տեղական ինքնուրույն կուսակցություններ հնարավոր լինի ստեղծել: Հանրապետական կուսակցությունները պիտի՛ մրցեն մարզային/տեղական անկախ կուսակցությունների հետ:
5. Կապանը դարձնել Հայաստանի 2-րդ մայրաքաղաք և ազատ առևտրի գոտի՝ որպես ստրատեգիական հարավում կարևոր ամրոց:
Վարազ Սյունի
Ամստերդամ,11.10.2015
Մեկնաբանություններ (1)
Մեկնաբանել