Երկուշաբթի, 24 սեպտեմբերի

Ապօրինի ծառահատում և շինարարություն Նոր Հաճնում. ըստ քաղաքապետի՝ ծառեր չեն էլ եղել




Նոր Հաճնի ոստիկանության շենքի դիմաց փոքրիկ այգի է եղել, որը վերջին մի քանի օրում վերածվել է շինհրապարակի. կտրվել են հաստաբուն դեկորատիվ և պտղատու տասից ավելի ծառեր: Մեր այցելության ժամանակ բնակիչները վախվորած էին, նրանք չէին ցանկանում խոսել այգու և կտրված ծառերի մասին: Նոր Հաճնի հնաբնակներից Գեղեցիկ Երեմյանը միակն էր, ով բարձրաձայնում էր ապօրինի հատումների մասին, իսկ այդ ժամանակ համաքաղաքացիների մեկ այլ խումբ ծառերի բներն էր տեղավորում մեքենան՝ ձմեռվա վառելիքը հոգալու նպատակով:

Գեղեցիկ Երեմյանին այսօր արդեն հասցրել են սպառնալ. Անահիտ Փանյան անունով կինը և իր տղան ներկայացել են որպես տարածքի սեփականատերեր և ասել, որ չփորձի իրենց պատերազմ հայտարարել. «Ասաց՝ մենք վերևում էլ ծանոթ ունենք, ներքևում էլ, մեզ հանկարծ պատերազմ չհայտարարես»,- պատմում է Գեղեցիկը:

Նա այսօր այցելել է նաև Նոր Հաճնի քաղաքապետ Գագիկ Մաթևոսյանին, հարցրել, թե ինչ իրավունքով է վերացնում քաղաքի կանաչ տարածքները: Վերջինս Գեղեցիկ Երեմյանին պատասխանել է. «Որտեղ ծառ կար որ»: Ըստ քաղաքում պտտվող խոսակցությունների՝ այդ տարածքում պատրաստվում են սուպերմարկետ կառուցել: Մեր այցելության պահին ջրագծերը քանդված էին՝ դրանք փոխելու նպատակով:

Օրվա աշխատանքային ժամին «Հետքը» փորձեց կապ հաստատել քաղաքապետ Գագիկ Մաթևոսյանի հետ, սակայն քաղաքապետարանից հայտնեցին, որ վերջինս խորհրդակցության է: Մենք դեռևս կանդրադառնանք այս տարածքի սեփականատերերին և քաղաքապետի՝ կանաչ տարածքներում հողհատկացման որոշումներին:

Հիշեցնենք, որ Նոր Հաճնի քաղաքապետ Գագիկ Մաթևոսյանը ԲՀԿ կուսակցության անդամ էր, սակայն Գագիկ Ծառուկյանի՝ կուսակցությունը թողնելուց հետո, այս տարվա մարտին նա լքել է կուսակցությունը։   

Լուսանկարները՝ Նարեկ Ալեքսանյանի


Գլխավոր էջ



Մեկնաբանություններ (1)
1. Արմենակ Եղիայեան02:11 - 3 նոյեմբերի, 2015
Ով՝ ով...սպասելով հետաքննութեան արդիւնքները, բայց արդէն Անահիտ Փանեան կոչեցեալը եւ իր արժանապատիւ զաւակը պէտք է արդարութեան յանձնուին՝ համաքաղաքացիի մը կատարուած սպառնալիքի պատճառով, որպէսզի հասկնան, թէ ի՛նչ կը նշանակէ գերակայ դիրքէ խօսիլ, եւ ստանան արժանի պատիժը, քանի սպառնալիքը ինքնին քրէական յանցանք կը համարուի քաղաքակիրթ երկրի մը մէջ: Ստրկատիրական վարչակարգի մէջ է միայն, որ քաղաքացի մը՝ յենելով վերեւները թառած հովանաւորներու՝ կը սպառանյ համաքաղաքացիի մը: Ո՞ւրմնաց անկախ Հայաստանի քաղաքացիական ազատութեան ու հաւասարութեան այնքան գովերգուած սկզբունքը:
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ