HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Եվրոպայում փախստականի երեք տարվա կյանքից հետո Նինան նորից Հայաստանում է՝ անգործ ու առանց անձնագիր

Նինա Ամոյանին այս տարվա սեպտեմբերին Գերմանիայից վտարել և ուղարկել են Հայաստան: Նինան 2012 թվականից Եվրոպայում հանձնվել էր որպես փախստական, սակայն Գերմանիան որոշել է, որ նա պետք է վերադառնա իր երկիր, քանի որ «իր երկրում կռիվ չկա»: Այդպես են հիմնավորել ուժայինները, երբ գիշերը Նինային քնից արթնացրել, լուսարձակները պահելով դեմքին՝ հանել են անկողնուց և ուղեկցել օդանավակայան: Նինան չի հասցրել նույնիսկ իրերը հավաքել:

Նինան 2012-ին որոշել է մեկնել Հայաստանից, ինչպես ինքն է պատմում՝ հարբեցող ամուսնուց և նրա բռնություններից փախչելու նպատակով: Վերցրել է իր 16-ամյա աղջկան և մեկնել նախ Ռուսաստան՝ աշխատելու նպատակով: «Ոչ տուն ունեի, ոչ տեղ: Ապրում էինք վարձով: Տղայիս բանակ տարան, ես էլ որոշեցի աղջկաս վերցնել գնալ»,- ասում է Նինան:

Ռուսաստանում տեղի չեչեններից լսել է, որ հնարավոր է Բելառուսի սահմանով անցնել Լեհաստան, իսկ այնտեղից՝ եվրոպական այլ երկրներ: Նինան իր դստեր հետ մեկնել է Բելառուս և Բրեստի մարզից, որը սահմանակից է Լեհաստանին, մի խումբ չեչենների հետ մուտք գործել Լեհաստան ու հանձնվել:

«Չորրորդ օրը մենք կարողացանք անցնել սահմանը: Հարցազրույց ենք տվել սահմանին ու անցել ենք: Իմ դրությունը պատմել եմ, որ չեմ կարողացել նորմալ ապրել, ամեն անգամ էս տնից էն վարձով տունը տեղափոխվել, վարձ չեմ կարողացել տալ...Ես ինչ-որ կար, ճիշտը պատմել եմ,-ասում է Նինան,- 8 ամիս մնացել ենք Լեհաստանի ճամբարներից մեկում: Բայց էնտեղ լավ չէր»:

Ամսական 70 լեհական զլատը (շուրջ 17 դոլար) չի բավարարել Նինային և դստերը: Նինան սկսել է աշխատել, խնձոր է հավաքել այգիներում:

Սակայն Լեհաստանը շուտով հրաժարվել է նրանց ապաստան տաուց: Նինան որոշել է մեկ այլ երկրում փորձել իրենց բախտը: «Գնացի աշխատեցի, փող հավաքեցի ու գնացինք Գերմանիա,- շարունակում է Նինան,- մեքենա էր գնում, առաջարկեցին գնալ, մենք էլ համաձայնեցինք: Ասում էին՝ կարող է սահմանին բռնեն, նույնիսկ բանտ նստեցնեն, մի քիչ վախեցել էի, բայց բախտներս բերեց, գերմանական սահմանին մեքենան չստուգեցին»:

Ընդհանուր առմամբ, Լեհաստանում փախստականների նկատմամբ վերաբերմունքում Նինան խտրականություն տեսել է: «Աղջիկս որ դպրոց էր գնում, ավտոբուսը գալիս էր, չեչենների հետ գնում էին այդ ավտոբուսով: Աղջիկս ասում էր՝ ոչ ոք չէր խոսում իրենց հետ, ոչ ոք իրենց հետ չէր շփվում: Կնստեն, կծիծաղեն մեր վրա: Իսկ Գերմանիայում այդպես չէ: Տարբերություն չեն դնում՝ դու ով ես, ինչ ազգ ես»,- ասում է Նինան: 

Ավելի քան 2 տարի Նինան ու դուստրը Գերմանիայում են ապրել՝ Հոլանդիայի սահմանին մոտ գտնվող Օխտրուպ (Ochtrup) քաղաքում: Պետությունը հատկացրել է բնակարան և 300 եվրո ամսական գումար, վճարել է կումունալ ծախսերը:  

Նինան փորձել է աշխատել Գերմանիայում, բայց նրան մերժել են՝ անձնագիր և կարգավիճակ չունենալու պատճառով: Գերմանական պետությունն այդպես էլ որևէ կարգավիճակ նրանց չի տվել: Մինչ այդ, Նինան Գերմանիայում ամուսնացրել է դստերը Իրանից տեղափոխված քրդի հետ (Նինան ազգությամբ եզդի է-հեղ.): Արդեն թոռնիկ ունի: Դստերն ու թոռանը վտարում չի սպառնում, քանի որ թոռնիկը ծնվել է Գերմանիայում, իսկ դստեր ամուսինը օրինական է ապրում այնտեղ:

Նինայի վտարումն անընդհատ ձգձգվել է՝ լեղապարկի և լյարդի խնդիրներ ունենալու պատճառով: Նինան հիվանդանոց է պառկել և որոշակի բուժում ստացել: Սակայն սիրիացիների՝ Գերմանիա մտնելուց հետո մյուս փախստականների նկատմամբ հսկողությունն ու պահանջները խստացել են:

«Երեխես արթնացավ, խնդրեց, որ չտանեն ինձ...տենց լացելով բաժանվեցինք: Մինչև Հայաստան ես լացել եմ»,-ասում է Նինան: Ուզում է վերադառնալ դստեր ու թոռնիկի մոտ, որին ինքն է մեծացրել և շատ է կարոտում:

Հայաստանում է գտնվում Նինայի 23-ամյա որդին, որը նույնպես առողջական խնդիրներ ունի և զորացրվել է բանակից այդ խնդիրների պատճառով: Ապրում է քրոջ տանը՝ մոր և որդու հետ:

Նինան անձնագիր չունի, քանի որ հանձնվելիս Լեհաստանի սահմանին նրանից վերցրել են այն: Աշխատանք գտնել Հայաստանում նույնպես չի կարողանա մինչև նոր անձնագիր չտան նրան: Իսկ մինչև աշխատանք չունենա, չի կարողանա նաև առողջական հարցերը լուծել: 

Մեկնաբանություններ (2)

allaՁեր անունը
Մեկնաբանությունը...Այն որ դրսում շատ դժվար է ապրել ու աշխատել առանց փաստաթղթի դա այդպես է:Ես ապշեցի ամուսնության համար գրված զզվելի մեկնաբանություններից:Եզդի աղջիկը ամուսնացել է քրդի հետ -բա հո հայի հետ չեր ամուսնանալու:
hayk
Չպետք է ասվի , մանավադ գերմնու երգրմ,ձեր ով լինելը , որտեխից եք ե այլն, իհարկե եթե ուզում եք այնտեղ բնակրվեք, -կարելի է խոսել րուսսերեն .Պետք է լավ խաբել , ե ոչ մի ճշմարտություն: Տիկին Նինաին ՑԱԿԱՆՈՒՄ եմ ֆարտ , հաջողութուն...ւնը...

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter