HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գրիշա Բալասանյան

Կենդանաբանական այգու գոմաղբը հավաքելն ու տեղափոխելն արժե 11,8 մլն դրամ

Երևանի կենդանաբանական այգու կենդանիների կենսագործունեության հետևանքով օրական առաջացած աղբի աղբահանության ծառայության 2015թ. արժեքը կազմում է 11 մլն 760 հազար դրամ, կամ, օրական կտրվածքով, 32 հազար դրամից ավելի: Առանց հայտարարություն տարածելու բանակցային ընթացակարգով այգու տնօրինությունը աղբահանության պայմանագիրը կնքել է անհատ ձեռնարկատեր Սայադ Բաղդասարյանի հետ: Վերջինիս հետ 3 մլն 593 հազար դրամի աղբահանության պայմանագիր էլ կնքվել է 2014թ. մայիսին:

«Կենդանաբանական այգու աղբը տարբերվում է մյուս աղբերից, որովհետև օրվա տարբեր ժամերին կենդանիները կարող են կեղտոտել, դա իրենց արտադրանքն է: Օր է եղել, որ երկու անգամ մաքրել են: Մաքրելու, տեղափոխելու ամբողջ գործընթացն իրականացնում է անհատ ձեռնարկատեր Սայադ Բաղդասարյանը: Շինարարական և մյուս աղբը տանում է Սովետաշեն, իսկ կենդանիների գոմաղբը՝ հատուկ տեղ ունեն, որտեղ մշակում են»,-մեզ հետ զրույցում ասաց կենդանաբանական այգու գնումների պատասխանատու Գայանե Սարգսյանը:

Թեև կնքված պայմանագրի մասին հրապարակված հայտարարոթյան նկարագրությունից հասկացվում էր, որ աղբի հավաքումն ու տեղափոխումը վերաբերում է միայն կենդանիների արտաթորանքին, սակայն Գայանե Սարգսյանը պնդում էր, որ այդ գումարի մեջ մտնում է այգու ամբողջ աղբը: Նրա ներկայացմամբ՝ կենդանաբանական այգու աղբը հավաքել, տեղափոխելը շատ տաժանակիր աշխատանք է, ինչն իրականացվում է բարձրակարգ ձևով:

«Մենք փորձել ենք մրցույթներ անել, ուրիշ սանմաքրումներից 2-3 օրով փորձնական բերել ենք, բայց չեն կարողացել աշխատանքներն իրականացնել: Չգիտեմ, թե ինչու եք հետաքրքրվում, բայց սա այնպիսի գնում է, որ «բռնվելու» տեղ չունեք: Գնումներից սա ամենաիդեալական գնումն է և իր նպատակին ծառայում է»,-ասում է գնումների պատասխանատուն:

Գայանե Սարգսյանը շահագրգռված էր, որ հետագա պայմանագրերը ևս Սայադ Բաղդասարյանի հետ կնքվի: Նա անդադար գովում էր Սայադ Բաղդասարյանին: Սակայն նշեց, որ ապրիլի 1-ից օրենքը փոխվել է, և հաջորդ տարի արդեն չի կարող բանակցային ընթացակարգով պայմանագիր կնքել:

«Մեր գումարի սահմաններում արդեն պարզեցված ընթացակարգով բաց, հրապարակային մրցույթի եմ դնելու, ով հաղթեց, նրա հետ էլ կնքելու եմ»,-ասում է Գայանե Սարգսյանը:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter