1000-ից ավելի առանց թույլտվության կնիքի հատված ծառ` Ստեփանավանի անտառում
Ստեփանավանի անտառտնտեսության պետ Հովիկ Խաչատրյանի խոսքով` իրենց անտառներում վերջին շրջանում ապօրինի ծառահատումների դեպքեր չեն գրանցվել, հատումներ իրականացվել են միայն օրենքով թույլատրված հատատեղիներում: Հիշեցնենք, որ ըստ ՀՀ անտառային օրենսգրքի` հատումները համարվում են օրինական, եթե հատման ենթակա ծառի վրա առկա է հատումը թույլատրող կնիքը, որը պետք է լինի հատման կետից վերև: Հովիկ Խաչատրյանը «Հետքի» հետ զրույցում ասաց, որ հնարավոր է՝ հատումն իրականացվի կնիքից ներքև, եթե տեղանքը հարմար չէ, սակայն դա նույնպես համարվում է ապօրինի հատում: «Անտառների հասարակական մոնիտորինգ»-ի կամավորների հետ մի քանի ժամ շրջելով Ստեփանավանի անտառներում` հայտնաբերեցինք 1100 կտրված ծառ, որոնցից ոչ մեկի վրա համապատասխան կնիք չկար: Բազմաթիվ կտրված ծառեր կային թեք լանջերի վրա, որոնց համար հատման թույլտվություն տալն օրենքով արգելված է: Կային տեղանքներ, որտեղ կատարված էին բազմաքանակ հատումներ: Այդպիսի հատումները նույնպես արգելված են, քանի որ այդպիսով մեծանում է տարածքի մյուս ծառերի` քամուց տապալվելու վտանգը: Քամատապալ ծառերի պակաս Ստեփանավանի անտառներում չկար: Նկարահանման ամբողջ ընթացքում չէր դադարում դիզվառելիքով աշխատող սղոցների ձայնը, մի քանի ժամում լսեցինք ընկնող 7 ծառի ձայն անտառի տարբեր հատվածներում:
Մեկնաբանություններ (2)
Մեկնաբանել