Լիլիթ Թադևոսյան

Քիչ առաջ մամուլում տեղեկություն հայտնվեց այն մասին, որ արդեն մի քանի ժամ է, ինչ Գյումրիում ոստիկանական մեծ թվով ուժեր են կենտրոնացված քաղաքի գրեթե բոլոր փողոցներում: Այս առնչությամբ մենք փորձեցինք տեղեկություն ստանալ Գյումրիի «Ժուռնալիստների «Ասպարեզ» ակումբ» ՀԿ-ի խորհրդի նախագահ Լևոն Բարսեղյանից, սակայն վերջինս ասաց, որ այս պահին գտնվում  է Գավառում և այդ լուրերի մասին տեղեկացել է մամուլից:

«Ես Գյումրիից դուրս եկա առավոտյան ժամը 8-ին, քաղաքի ելքերի մոտ ոստիկանական ավտոմեքենաներ էին կանգնած: Ներսի դրությունից տեղյակ չեմ»,- ասաց Բարսեղյանը:

Վերջինս հավելեց, որ Դիլիջան, Իջևան, հիմա էլ Գավառի ճանապարհներին ոստիկանական մեքենաները խաչմերուկներում կանգնած են: 

«Չգիտեմ էլ՝ կոնկրետ ինչ են որսում, բայց նման դեպքերում հնարավոր է՝ ինչ-որ մարդկանց են որոնում, որոնք որ կփորձեն հեռանալ: Սա շատ մոտավոր ենթադրություն է, և նման դեպքերում հսկողություն պետք է ըստ երևույթին»,- ասաց Բարսեղյանը՝ նկատի ունենալով, որ այսօր ԱԱԾ-ն հայտարարել է, որ մայրաքաղաքում բացահայտել է կազմակերպված հանցավոր խմբակցություն: