Ծանրամարտի աշխարհի առաջնությունում Հայաստանի տղամարդկանց հավաքականի անդամ, գերծանր քաշային Գոռ Մինասյանը փոքր բրոնզե մեդալ նվաճեց և ընդհանուր հաշվարկում զբաղեցրեց 4-րդ տեղը: Այս մասին հայտնում են ՀԱՕԿ-ից: 

Գոռ Մինասյանն առաջին մոտեցման ժամանակ գլխավերևում պահեց 195 կգ, այնուհետ պոկեց 201 կգ, իսկ երրորդ մոտեցման ժամանակ բարձրացրեց 203 կգ և նվաճեց փոքր բրոնզե մեդալ: Հրում վարժությունը Մինասյանը սկսեց 234 կգ և այն հեշտությամբ բարձրացրեց: Սակայն երկրորդ և երրորդ մոտեցման ժամանակ չկարողացավ բարձրացնել 240 կգ: Երկարմարտի՝  437 կգ արդյունքով նա զբաղեցրեց 4-րդ տեղը: 

Հայաստանի հավաքականի մյուս անդամ, գերծանր Ռուբեն Ալեքսանյանը զբաղեցրեց 8-րդ տեղը: 

Նա առաջին մոտեցան ժամանակ բարձրացրեց 185 կգ, այնուհետ՝ 192 կգ և երրորդ մոտեցման ընթացքում չկարողացավ բարձրացնել 196 կգ: Հրումում Ալեքսանյանն առաջին մոտեցմամբ բարձրացրեց 241 կգ: Երկրորդ մոտեցման ժամանակ Ռուբեն Ալեքսանյանը չբարձրացրեց 246 կգ ծանրաձողը և միևնույն ժամանակ վնասվածք ստացավ: Հայ ծանրորդը չկարողացավ շարունակել պայքարը: Երկարմարտի՝ 433 կգ արդյունքով նա զբաղեցրեց 8-րդ տեղը: Ալեքսանյանը վնասել է ազդրի քառագլուխ մկանը: Վնասվածքի լրջությունը հայտնի կդառնա արդեն Հայաստանում՝ բուժզննումից հետո:

Այս մրցաձևում աշխարհի չեմպիոն դարձավ ռուս Ալեքսեյ Լովչևը, ով  աշխարհի ռեկորդ սահմանեց՝ հրելով 264 կգ ծանրաձողը (475 կգ): 

Իր հերթին Հայաստանի կանանց հավաքականի անդամ, +75 կգ քաշային կարգում հանդես եկող Հռիփսիմե Խուրշուդյանն աշխարհի առաջնությունում գրավեց 14-րդ տեղը:

Խուրշուդյանը փոկում վարժությունում առաջին մոտեցմամբ բարձրացրեց 111 կգ, սակայն հետո չկարողացավ բարձրացնել 115 կգ:  Երրորդ մոտեցման ժամանակ հայ ծանրորդը կարողացավ գլխավերևում պահել 115 կգ: Հրման ժամանակ Խուրշուդյաը նախ հրեց 140, այնուհետ չկարողացավ բարձրացնել 145 կգ, բայց երրորդ մոտեցման ժամանակ նրան հաջողվեց բարձրացնել 145 կգ-ը: Երկամարտի` 260 կգ արդյունքում Խուրշուդյանը զբաղեցրեց  14-րդ հորիզոնականը: 

ԱՄՆ Հյուսթոն քաղաքում ընթացող ծանրամարտի աշխարհի առաջնությունն ավարտված է: