HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Վահե Սարուխանյան

Կեղտաջուր՝ խմելու ջրի փոխարեն

Արարատի մարզի Քաղցրաշեն գյուղի բնակիչների համար խմելու ջրի աղտոտվածությունն ու դրանից պարբերաբար առաջացող աղիքային հիվանդությունները սովորական երեւույթ են դարձել:

Գյուղին առ այսօր խմելու ջուրը մատակարարվում է բարոյապես ու ֆիզիկապես մաշված խողովակներով, որոնց օգտագործումը 1999-ից ստանձնել է «Հայջրմուղկոյուղի» ՓԲԸ-ն:

Քաղցրաշենի բնակիչները «Հայջրմուղկոյուղի» ՓԲԸ-ի «Կենտրոն-Արեւմտյան» տարածքային մասնաճյուղի հետ ստորագրել են պայմանագիր, որի համաձայն՝ ընկերությունը, մասնավորապես, պարտավորվել է սպառողներին մատակարարել խմելու ջրի որակի ջուր եւ բաժանորդի պահանջի դեպքում ներկայացնել ջրի որակի երաշխիք:

Բնակիչների հավաստմամբ՝ իրենց պահանջած ջրի որակի երաշխիքը ջրամատակարարը երբեք չի ներկայացրել, իսկ իրենց մատակարարվել է ոչ թե խմելաջուր, այլ կեղտաջուր: Սա արդյունք է այն բանի, որ քայքայված խողովակներով հոսող ջուրն անցքերից ու ճեղքերից դուրս է հորդում դեպի փողոց, այնտեղ ջրափոսեր գոյացնում, հետո, երբ ջուրն անջատվում է, փողոցի կեղտաջրերը լցվում են խողովակներն ու դառնում «խմելաջուր»: Սա էլ աղիքային հիվանդությունների պատճառ է դառնում:

Սպառողները մի քանի անգամ դիմել են ՀՀ առողջապահության նախարարության Պետական հիգիենիկ եւ հակահամաճարակային տեսչություն, որի մասնագետ Սեւոյանը խմելաջրի փորձանմուշներ է վերցրել գյուղից, բայց հետազոտության արդյունքների մասին բնակիչներն այդպես էլ չեն իրազեկվել: Միայն մեկ ամիս անց տեսչության պետ Ա. Վանյանը մեկ նախադասությամբ գրավոր պատասխան է գրել բնակիչներին, թե «սանիտարական կանոնների պահանջների խախտումներ չեն արձանագրվել»:

Գրեթե նույն ժամանակահատվածում գյուղացիների խնդրանքով Քաղցրաշենում խմելաջրի նմուշառում է անցկացրել «Առողջապահության ազգային ինստիտուտ» ՓԲԸ-ի մասնագետ Անուշավան Սարգսյանը: Լաբորատոր հետազոտությամբ պազվել է, որ գյուղի չորս բնակիչների տների ծորակներից վերցված նմուշները չեն համապատասխանում ստանդարտներին, իսկ մագիստրալի նմուշը մաքուր է:

Երբ հետագայում գյուղի բնակիչ Ծաղիկ Կարապետյանը դատի է տվել «Հայջրմուղկոյուղի» ՓԲԸ-ի «Կենտրոն-Արեւմտյան» մասնաճյուղին, Արարատի մարզի առաջին ատյանի դատարանը գտել է, որ Անուշավան Սարգսյանը նմուշառման ժամանակ խախտել է կարգը, քանի որ այդ մասին նա տեղյակ չի պահել ջրմուղին, հայտնի չէ նաեւ, թե ինչպես են վերցվել նմուշները:

Ըստ դատարանի՝ այնուամենայնիվ, հետազոտությունը ցույց է տվել, որ մագիստրալի ջուրը մաքուր է, իսկ ահա բնակիչների ծորակներից հոսող ոչ պիտանի ջրի որակի համար պատասխանատու են հենց իրենք՝ սպառողները, քանի որ նրանց եւ ջրմուղի միջեւ կնքված պայմանագրով՝ կողմերից յուրաքանչյուրը պարտավոր է «պահպանել իր տնօրինության տակ գտնվող ջրամատակարարման համակարգերի սահմանազատման տեղում մատակարարման ջրի որակը»: Ստացվում է, որ կեղտաջուրը զուտ բնակիչների սեփականություն հանդիսացող խողովակների քայքայվածության հետեւանք է:

Դատարանի եւ ջրմուղի այս ձեւակերպումն, իհարկե, դուրս է տրամաբանությունից, քանի որ հենց «Կենտրոն-Արեւմտյան» մասնաճյուղի «Արտաշատ» տեղամասի աշխատակիցները 2006-ի հուլիս-օգոստոս ամիսներին Քաղցրաշենում խմելաջրի ցանցի հատվածների 24 նորոգում են իրականացրել:

Այլ հարց է, որ գյուղացիները լրացուցիչ խնդիրներ են ստեղծում առանց այդ էլ քայքայված ցանցը քիչ թե շատ կարգի բերելու գործում: Մասնավորապես, ինքնակամ կառուցապատումները դառնում են տեխնիկայի տեղաշարժի արգելք, ոմանք ապօրինի ծորակներ են միացնում ջրատարին, ոմանք էլ թերեւս անտեղի խոչընդոտում են ջրմուղի աշխատակիցների աշխատանքին:

Քաղցրաշենցիների՝ ջրի վեցժամյա գրաֆիկը շուրջօրյա դարձնելու պահանջն էլ, ըստ ջրամատակարարների, իրատեսական չէ, քանի որ ջրի սակավության պատճառով Վեդու եւ Արարատի տարածքների սպառողները նույնպես գրաֆիկով են ջուր ստանում:

Այդուհանդերձ, բնական եւ ըմբռնելի է ջրի որակի վերաբերյալ գյուղացիների բողոքն ու զայրույթը: Խողովակաշարերի հատվածաբար նորոգումներից հետո էլ շարունակվող կեղտաջրերի հոսքը եւ հիվանդությունները, անորակ ջրի դիմաց չվճարված հարկերը մուծելու պահանջները նրանց ստիպել են դիմել զանազան ատյանների, այդ թվում` վերաքննիչ բողոք ներկայացնել Արարատի մարզի դատարանի վճռի դեմ:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter