Դուստրն ստացել է Ամանորի ամենաթանկ նվերը. «Իմ հայրն անմեղ է»
3 արդարացման դատավճիռ 35 տարի անց
Տարեվերջին երեք ամերիկացի, որոնցից մեկը՝ հետմահու, արժանացել են արդարացման դատավճռի: Նրանք մեղավոր էին ճանաչվել 1980թ-ին Բրուկլինում կատարված 6 մարդու՝ մի կնոջ և նրա անչափահաս 5 երեխաների սպանության մեջ: Այս մասին գրում է The New York Times-ը:
Էյլին Մորան արդարացման դատավճռի ժամանակ պարզել էհոր լուսանկարը |
Արդարադատությունը հաղթանակել է 35 տարի անց, որոնցից 33 տարին երկու քաղաքացիները Վիլյամ Վասկեսն ու Ամորի Վիլյալոբոսը բանտում պատիժ են կրել՝ լինելով անմեղ (իսկ նրանց երրորդ ընկերը՝ Ռայմոնդ Մորը, սրտի ինֆարկտից մահացել է բանտում 1989 թ-ին): Դատարանի դահլիճում գտնվող Մորի դուստրը, ով հոր մահվան ժամանակ եղել է ընդամենը 7 տարեկան, բարձրացրել է հոր լուսանկարը. «Ես ստացա Ամանորի ամենաթանկ նվերը. իմ հայրն անմեղ է, և հիմա դա բոլորը գիտեն: Ես գիտեմ, որ նա երկնքից տեսնում է և ուրախ է, որ իր անունը մաքրվեց»,- ասել է հետմահու արդարացված քաղաքացու դուստրը, ով մոր հետ եկել էր դատարան:
Արդարացման դատավճռին նախորդել է դեպքի վայր հանդիսացող եռահարկ տան տիրուհու Հաննա Քվիքի դստեր (սպանվածները նրանց տան 3-րդ հարկի վարձակալներն են եղել) ցուցմունքն այն մասին, որ իր մայրը մահից առաջ խոստովանել է իր տված սխալ վկայության մասին, թե դեպքի օրը տեսել է իրենց տնից դուրս եկող երեք տղամարդու: Ավելին՝ մայրը մահվան մահճում ասել է, որ ստել է ոստիկաններին` պատմելով, թե մինչև հրդեհը լսել է բռնության ձայներ վերևի հարկում: Տիրուհու դուստրը դատարանում հայտնել է՝ մայրը զղջացել է, որ երեք անմեղ մարդկանց իր սուտ վկայությամբ ուղարկել է բանտ:
Երեք ամբաստանյալները 1980 թվականին |
Արդարացման դատավճռի համար հիմք է հանդիսացել նաև քրեագիտության մեջ հրդեհների ու դրա հետևանքների ուսումնասիրման ժամանակակից մեթոդիկան, ինչը հասանելի չէր և չէր կարող լինել 1980-ականներին:
65-ամյա Վասկեսն, ով բանտում կուրացել է գլաուկոմայի հետևանքով, արդարացման դատավճռից հետո լրագրողներին ասել է. «Ոչինչ այս աշխարհում չի կարող վերադարձնել իմ տարիները. ոչ գումարը, ոչ այլ բան: Դա նման է նրան, որ ես կորցրել եմ ինքս ինձ բանտում, ես կորցրել եմ կյանքիս 33 տարիները: Ինձ բանտ տարան 30 տարեկանում, հիմա ես 65 տարեկան եմ»:
2012-ին ԱՄՆ երկու քաղաքացիները պայմանական վաղաժամկետ ազատվել էին մի քանի անգամ մերժվելուց հետո: Նրանց առաջ խնդիր է դրված եղել՝ զղջալ կատարած հանցանքի համար, սակայն նրանք մշտապես պնդել են, որ անմեղ են: Ի վերջո, 2012-ին պայմանական ազատվել են՝ հերքելով իրենց մեղքը կատարված հանցանքում, իսկ 2015-ի տարեվերջին՝ արդարացվել:
77 տարեկան Ամորի Վիլյալոբոսն ազատության առաջին րոպեներին հավաքվածներին ցույց է տալիս արդարացման դատավճիռը
Լուսանկարները “The New York Times”-ի
Գլխավոր լուսանկարում արդարացված երկու քաղաքացիները գրկախառնվել են հետմահու արդարացված իրենց երրորդ բախտակցի այրու ու դստեր հետ
Մեկնաբանել