Երեքշաբթի, 25 սեպտեմբերի

Մարզպետին` ինչպես Աստծուն



Այն մասին, որ ես դեռեւս չեմ վաստակել Գեղարքունիքի մարզպետին գրությամբ դիմելու իրավունքը, ինձ հայտնի դարձավ օրերս: Ավելի քան երկու շաբաթ գրությանս պատասխանին սպասելուց հետո հեռախոսով դիմեցի Գեղարքունիքի մարզպետարանի աշխատակազմի ղեկավար Սեւակ Խլղաթյանին՝ լռության պատճառը պարզելու համար: Միաժամանակ ցանկանում էի ասել, որ եթե մարզպետարանում պատշաճ թարմացնեն պաշտոնական կայքը եւ տեղադրեն պարտադիր հրապարակման ենթակա տեղեկատվությունը՝ գրություններ ուղարկելու, իմ եւ իրենց համար լրացուցիչ աշխատանք ստեղծելու անհրաժեշտություն չի լինի:

Սեւակ Խլղաթյանն առաջինն ինձ դիտողություն արեց· «Ձեզ մոտ տնօրեն չկա՞, որ Դուք եք նամակ գրում մարզպետին, Դուք ՏԻՄ ծրագրերի ղեկավարն եք, չէ՞: Եթե Դուք եք գրում, ուրեմն մարզպետի անունով մի գրեք»:

Չգիտեի, որ մեծ հանդգնություն է Գեղարքունիքի մարզպետին գրավոր հարցում ուղարկելը: Հարկադրված դիմեցի, որովհետեւ մարզպետարանի պաշտոնական կայքում չգտա անհրաժեշտ տեղեկատվությունը, հասարակայնության հետ կապերի բաժինը զանգերիս չպատասխանեց, մնում էր գրությամբ ակնկալել հարցերիս պատասխանը:

Այնպես որ, մեղավորը դարձյալ աշխատակազմի ղեկավարն է: Նրա անհետեւողական աշխատանքի պատճառով մարզխորհրդի նիստերի արձանագրությունները չեն հրապարակվում կայքի համապատասխան բաժնում (այս բաժնում կրկնում են նիստի օրակարգը): Չի թարմացվել նաեւ «Տեղեկատվության ազատության մասին» ՀՀ օրենքով սահմանված տեղեկատվություն տրամադրելու փոփոխված կարգը, տեղեկատվություն ապահովելու համար պատասխանատու անձի կոնտակտային տվյալները, տեղեկատվություն հայցելու ձեւը եւ այլն: Հատկապես, Գեղարքունիքի մարզպետարանը պետք է շատ ուշադիր լիներ այս հարցում, որովհետեւ մարզպետարանի չինովնիկների պատկերացումով՝ մարզպետն անհասանելի պետք է լինի մահկանացուներիս համար:

Մարզխորհրդի 2015 թ· դեկտեմբերի 25-ի նիստի օրակարգային հարցերից մեկը եղել է գյուղատնտեսական ցուցանիշների ամփոփումը: Մարզի բնակչությունը ցորենի սերմացուի դիմաց պարտքեր ունի գյուղնախարարությանը՝ միայն 2014 թ.-ին մարզի պարտքը կազմում է 10,2 մլն դրամ: «Ի՞նչ է արվում գումարները հավաքագրելու ուղղությամբ»,- հարցս պատասխան չունեցավ, որովհետեւ մարզպետարանի պատասխանն ստացա փետրվարի 1-ին, դիմելուցս երեք շաբաթ հետո, երբ հոդվածն արդեն հրապարակել էի:

Նույն հարցումը, նույն օրն ուղարկել էի նաեւ Լոռու մարզպետին՝ նրա էլեկտրոնային փոստին: Հարցումս ուղարկել էի դեռեւս հունվարի 13-ին եւ ակնկալում էի, որ գոնե 5 օր հետո կստանամ պատասխանը: Սակայն, ինչպես Գեղարքունիքի մարզպետարանի դեպքում էր, 5 օրը լրանալուց հետո մարզպետարանից կապվել էին խմբագրության հետ եւ հայտնել, որ գրությունն ստորագրված չէ, իրենք չեն պատասխանում անստորագիր հարցումներին: Հարցումս կրկնեցի հունվարի 19-ին՝ այս անգամ ստորագրված տարբերակով: Ավելի քան 10-ն օր սպասելուց հետո, հունվարի 29-ին, հարկադրված եղա զանգահարել նաեւ Լոռու մարզպետարանի աշխատակազմի ղեկավարին:

Մարզպետարանի քարտուղարը հայտնեց, որ նախորդ գրությունները չեն ստացել, որովհետեւ մարզպետի էլեկտրոնային փոստի հասցեն փոխված է: Այդ դեպքում, ինչպե՞ս են մարզպետարանում կարդացել առաջին գրությունս եւ առաջարկել ստորագրված ուղարկել այն: Ինչո՞ւ մարզպետարանի կայքում չեն թարմացվել էլեկտրոնային հասցեները: «Տեղեկատվության ազատության մասին» ՀՀ օրենքը վերջին մեկ տարում մի քանի փոփոխություներ է կրել, ինչո՞ւ մարզպետարաններն իրենց կայքէջում չեն թարմացրել  տեղեկատվություն տրամադրելու նոր պահանջները: Ինչո՞ւ չեն լրացնում կայքէջի պարտադիր հրապարակման բաժինները:

Լոռու մարզխորհրդի 2015 թ· նոյեմբերի 27-ի նիստի օրակարգում ներառվել է նաեւ 2015 թ.-ին ցորենի սերմացուի բաշխման մասին հարցը, որով ես հետաքրքրված եմ: Հարցի վերաբերյալ արձանագրության մեջ նշվում է միայն. «Առաջարկվեց. «Անհրաժեշտ միջոցներ ձեռնարկել պարարտանյութի եւ սերմացուի տրամադրման նպատակով հավաքագրվող գումարների գանձման եւ մուծման ուղղությամբ»:

Մարզպետարանը փետրվարի 3-ին տրամադրած տեղեկատվության մեջ նշում է, որ 2014 թ. աշնանացան ցորենի առաջին վերարտադրության սերմացուի պարտքը մատակարար կազմակերպությանը կազմում է  5 մլն 792,000 դրամ, որը գանձելու գործերը գտնվում է դատական վարույթի փուլում:

Մարզխորհրդի նիստերի արձանագրությունները բոլոր մարզպետարանները չէ, որ հրապարակում են: Սակայն, այն թարմացվելու դեպքում, հնարավոր է, տեղեկատվություն ստանալու համար հարցումներ ուղարկելու անհրաժեշտություն չլինի կամ կրճատվի դրանց քանակը: Հնարավոր է, որ մարզպետարաններում չեն տարբերակում օրակարգն արձանագրությունից, այդ դեպքում կարող են ուսումնասիրել Ազգային ժողովի կայքէջի համապատասխան բաժինը:

Ստացվում է, որքան շատ ենք միջոցներ ձեռնարկում տեղեկատվությունը մատչելի եւ հասանելի դարձնելու համար, այնքան դժվարանում է տեղեկատվություն ստանալը:


Գլխավոր էջ



Մեկնաբանություններ (12)
1. Գեւորգ15:14 - 8 փետրվարի, 2016
Վախտին տատս նամակ էր գրել Բրեժնեւին, թե հալ-հեքյաթ գազիս բալոնը փոխեցին, բայց շլանգը չմիացրին: Պատասխանեցին: Գազի մարդն էլ լաց ու թացով եկավ ու ներեղություն խնդրեց: Բայց դե Բրեժնեւն ուր - քյավառա մարզապետն ուր!
2. Ալեքսանդր Մակեդոնացի17:52 - 8 փետրվարի, 2016
Մեծն Նաբուկոդոնոզոր մազպետ Քյավառա, հանդգնում են Ձեզ հարցումով դիմել... Ինչպիսի անպատեհություն, Ձերդ Գերազանցությանը, որ հանդգնել են Ձեր գավառական անդորրը քննել... Կարգի հրավիրեք ձեր լակեյին, նա հարկատուների հաշվին աշխատավարձ է ստանում... դու էլ
3. Խլղաթյան Ս.21:05 - 8 փետրվարի, 2016
Այս ի՞նչ աղմուկ եք բարձրացրել այդ դուք չնչին էակներ և դեռ հանդգնել եք ինձ նման ՄԵԾՈՒԹՅԱՆԸ քննադատեք: Հապա չքվեք աչքիցս
4. Արմեն12:42 - 10 փետրվարի, 2016
մի կռվեք
5. Գյուղացի12:43 - 10 փետրվարի, 2016
ժողովուրդ հարգեք իրար
6. Շեքսպիր12:56 - 10 փետրվարի, 2016
լինել թե չլինել,այս է խնդիրը
7. Քյավառ12:59 - 10 փետրվարի, 2016
բոլորն են հարկատուների հաշվին աշխատավաձ ստանում
8. Հրաչ14:27 - 10 փետրվարի, 2016
էկեք խմենք
9. արմո14:54 - 10 փետրվարի, 2016
մարդկանց լավ աչքովա նայում
10. Չարենց15:04 - 10 փետրվարի, 2016
բորենիները դժգոհում են մարդկանց հարգանքից ու հաջողություններից
11. Արտակ Բաղդասարյան15:55 - 10 փետրվարի, 2016
մարզպետ ունենք աշխարհը չունի
12. Կամո18:49 - 10 փետրվարի, 2016
հազիվ Հրաչը մի կարգին բան ասավ,հավաքվեք մի խուլիգանի կեր ու խում կազմակերպեք.շիշը զարկենք ծառին ու վերջ դնենք գաղտնագրերով խոսալուն, ֆիզռուկ լից
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ