«Նոր Հայաստան» շարժման անդամ Գևորգ Սաֆարյանը կշարունակի մնալ կալանքի տակ: Այսօր Կենտրոն և Նորք-Մարաշ վարչական շրջանների ընդհանուր իրավասության դատարանը մերժեց նրա փաստաբան Տիգրան Հայրապետյանի միջնորդությունը՝ կալանքը գրավով փոխարինելու մասին: Մինչ մերժման որոշումը դատարանը դռնփակ կարգով մոտ 3 ժամ քննարկում էր միջնորդությունը, լսում քննիչին ու Սաֆարյանի փաստաբանին, այնուհետև, մեկ ժամից ավելի մնալով խորհրդակցական սենյակում, կայացրեց մերժման որոշում:

Գևորգ Սաֆարյանին աջակցողները չորս ժամ սպասում էին որոշմանը և ակցիա անցկացնում դատարանի շենքի դիմաց: Գևորգ Սաֆարյանի համակիրները մերժման որոշման մասին իմանալուն պես ձվեր շպրտեցին դատարանի շենքի ուղղությամբ, ապա շարժվեցին դեպի ԵԽ պատվիրակության գրասենյակ:

Գևորգ Սաֆարյանի փաստաբան Տիգրան Հայրապետյանը նշեց, որ դատարանը երեք էջանոց հիմնավորում է բերել գրավի միջնորդությունը մերժելով, որին, սակայն, ինքը կծանոթանա վաղը և նոր միայն գնահատական կհայտնի: Նա նշեց, որ ներկայացրել էր մի քանի պատգամավորների անձնական երաշխավորագրեր, Human Rights Watch միջազգային իրավապաշտպան կազմակերպության դիտարկումները Սաֆարյանի կալանավորման վերաբերյալ: Բացի այդ, փաստաբանը դատարանին էր ներկայացրել ՄԻ պաշտպանի գրությունը: Մինչդեռ քննիչն առարկել էր գրավ կիրառելուն, պնդել էր, որ ազատության մեջ մնալով Գևորգ Սաֆարյանը կարող է խոչընդոտել քննությանը:

Ըստ պաշտպանի, ստացվում է, որ դատարանը ոչ թե արարքին է գնահատական տալիս, այլ Սաֆարյանի քաղաքական գործունեությանը: «Դրա համար էս պահին կարող եմ ասել, որ Գևորգ Սաֆարյանը անազատության մեջ է իր քաղաքական հայացքների համար, որովհետև դատարանը դուրս եկավ իրավաբանական հարցից ու քննեց քաղաքականություն»,- ասաց պաշտպան Հայարպետյանը:

Փաստաբանը տեղեկացրեց, որ քննիչի հետ պայմանավորվել է վաղվանից քննչական գործողություններ անելու համար: Պետք է Գևորգ Սաֆարյանի ու վկաների առերեսումներ կազմակերպվեն: Փաստաբանը նշեց, որ երկու ոստիկան ցուցմունք է տվել Գևորգ Սաֆարյանի դեմ:

Նշենք, որ Գևորգ Սաֆարյանի ներկայությունը չէր ապահովվել, դատարանը նպատակահարմար չէր գտել: Բացի այդ, մերժվել էր հրապարակային դատական նիստ անցկացնելու՝ փաստաբանի միջնորդությունը:

Հիշեցնենք, որ դեկտեմբերի 31-ի գիշերը Երևանի Ազատության հրապարակում Նոր Հայաստան շարժման անդամները փորձել էին տոնածառ տեղադրել, ինչին միջամտել էին ոստիկանները ու տեղի էր ունեցել բախում: Սաֆարյանին մեղադրանք է առաջադրվել ոստիկանի նկատմամբ բռնություն գործադրելու համար:

Սյուզի Գևորգյանը Մոսկվայում երկու բարձրագույն իրավաբանական բուհ է ավարտել, քրեական իրավունքի մասնագետ է: Սյուզին անցյալ տարեվերջին ծեծի էր ենթարկվել, իր խոսքով, ակտիվ ընդդիմադիր գործունեության համար: Նա տուժող է ճանաչվել: Սակայն ասում է, որ մինչ օրս որևէ մեկին մեղադրանք չի առաջադրնվել: Այսօր նա եկել էր սատարելու Գևորգին: «Չեմ կարող հանգիստ ապրել, քանի որ Հայաստանում կան քաղբանտարկյալներ: Արդարադատության նախարարն էլ շատ պարզ գիտակցում է, որ մենք ունենք քաղաքական բանտարկյալներ: Ու Գևորգի փոխարեն կարող է լինել մեզնից ցանկացած մեկն, ով ունի այլ քաղաքական հայացքներ»,-ասում է նա ու պնդում, որ չի վախենում, շարունակելու է պայքարել:

«Նոր Հայաստան» շարժման առաջնորդ Ժիրայր Սեֆիլյանը, որը նույնպես մասնակցում էր ակցիային, անդրադառնալով արդարադատության նախարարի՝ Հայաստանում քաղբանտարկյալներ չունենալու արտահայտությանը, ասաց, որ ցանկացած ավտորիտար ռեժիմ չի ընդունում, որ իր երկրում կան քաղբանտարկյալներ:

«Վստահ կարող եմ ասել, որ Շանթը և ընկերները, Վոլոդյա Ավետիսյանը, Հայկ Կյուրեղյանը, Գևորգ Սաֆարյանը քաղաքական բանտարկյալներ են: Այս մասին բարձրաձայնել է նաև միջազգհային հանրույթը: Ստարսբուրգյան հայտնի 4 կետերը կան: Այս իմաստով մեր լեզուն երկար է, քանի որ մեր երկիրը լինելով ԵԽ անդամ, ստորագրել է այդ պարտավորությունները»,-ասաց Ժիրայր Սեֆիլյանը: Նրա կարծիքով, քաղբանտարկյալների առկայությունը մեր երկրում ածանցյալն է մի մեծ պրոբլեմի, ամբողջ ժողովուրդն է կեղեքված, գերեվարվածի վիճակում: Սեֆիլյանը գտնում է, որ լուծումը քաղաքական դաշտում չի լինելու, այլ պոռթկումի ու ընդվզման ձևով:

«Կարծում եմ, որ մենք մոտենում ենք այդ կետին: Ովքեր կարծում են, որ հայ ժողովրդին հնարավոր է ստրկացնել, չարաչար սխալվում են»: