ՀՀ կառավարության 2011 թվական դեկտեմբերի 29-ի   N 1905-Ն որոշման համաձայն՝ Սննդամթերքի անվտանգության պետական ծառայությունն ամեն տարի իրականացնում է ստուգումներ տարբեր տնտեսվարողների մոտ:
Դրանց մեջ են մտնում նաև  կրթական հաստատություններն ու մանկատները:
«Հետք»-ն ուսումնասիրել է  2015թ․ կատարված ստուգումների արդյունքներն ու ահա , թե ինչ պատկեր է ստացվել։

Գերակշիռ մասն աշխատում է խախտումներով

2015թ. կատարվել են ուսումնասիրություններ և ստուգումներ  664 տնտեսվարողների մոտ:

Նրանցից միայն 20 %-ն է ստացել «տեղեկանք խախտում  չունենալու մասին»:  80 %-ից ավելիի մոտ ստուգումների արդյունքում խախտումներ են հայտնաբերվել։

Դրանք վերաբերում են  մակնշման, փաթեթավորման, բաղադրության կանոնների խատման,  անվտագությունը  հավաստող փաստաթղթերի բացակայությանը։
Գերակշիռ մաս են կազմում  սանիտարահիգիենիկ նորմերի և կանոնների խախտման դեպքերը։
Ուշագրավ է, որ  սանիտարահիգիենիկ նորմերի խախտման դեպքերի մոտ  80 %-ն   արձանագրվել է կրթական հաստատություններում (մանկապարտեզներ, նախակրթական հաստատություններ, դպրոցներ):

Խախտումների վերաբերյալ հիմնականում տրվել են՝

• «Արտադրական գործունեության գործառույթները կասեցնելու մասին» որոշումներ
• «Արտադրանքի իրացումն արգելելու, շուկայից հետ կանչելու, ոչնչացնելու կամ օգտահանելու մասին» կարգադրություններ։
• Վարչական տուգանքներ (62 որոշում):

Ամենաշատ խախտումներն Արարատի մարզում են

Ստուգումների  մոտ կեսն  իրականացվել  է  կրթական հաստատություններում:
Ուսումնասիրություններ են կատարվել 306  կրթական հաստատություններում, միջնակարգ և գիշերօթիկ դպրոցներում :
Դրանց  70 %-ի մոտ (203) տարբեր տեսակի  խախտումներ են  հայտնաբերվել։

Ընդ որում՝ խախտումների  ամենամեծ թիվը գրանցվել է Արարատի մարզում՝  29 դեպք:

Սանիտարահիգիենիկ նորմերի խախտման գերակշիռ մասը՝ մոտ  80 %-ը հենց կրթական հաստատություններում է ․արձանագրված 36 դեպքերից  31-ը մանկապարտեզներ, նախակրթարաններ և նախադպրոցական ուսումնական հաստատություններն  են (խախտվել է կառավարության 2011թ․ N 34-Ն որոշում 23-րդ կետը, այն է՝  «Սննդի կառույցները պետք է պահվեն մաքուր, նորոգ և պատշաճ վիճակում»):

Սննդամթերքի հետ առնչվող սարքերի հիգիենայի խախտման  31 դեպք ից  28-ը դպրոցներում և նախադպրոցական հաստատություններում է ( 34-Ն որոշման 39-րդ կետ):

Սննդամթերքի մշակման և պահպանման համապատասխան ջերմաստիճանային պայմանների խախտման 5 դեպք է արձանագրվել, բոլորն էլ Արագածոտնի մարզի կրթական հաստատություններում․ 4 Աշտարակ քաղաքում, 1-ը՝  Կարբի համայնքում։

Վարչական իրավախախտումների վերաբերյալ կայացված 62 որոշումներից  21-ը  կրթական հաստատություններին է վերաբերվում:

Երևանում խախտումներ չկան

Ստուգումներ անցկացվել են նաև  Երևանի 80 նախակրթական հաստատություններում։
Հետաքրքրական է, որ դրանցից և ոչ մեկում խախտում չի հայտնաբերվել. բոլոր տնտեսվարողները ստացել են «տեղեկանք խախտում չհայտնաբերելու  մասին»։

Սարքերի հիգիենայի նորմերի  խախտման դեպք Խարբերդի մանկատանը

Ստուգումներ են անցկացվել նաև 3 մանկատներում․ Խարբերդի, Գավառի և Երեւանի(«Մարի Իզմիրլյանի անվան») :
Խախտումներ հայտնաբերվել են միայն Խարբերդի մանկատանը․ սննդամթերքի հետ առնչվող սարքերի հիգիենան չի համապատասխանել  N34-Ն որոշման  կետ 39-ի պահանջներին:

Ստուգումների թիվը  նվազում է, խախտումներն ավելանում

Աննդամթերքի անվտանգության պետական ծառայության կողմից «Հետք»-ին տրամադրված տվյալներով, 2013-2015թթ․  իրականացվել է 1518 ստուգում, որի արդյունքում 1114 տնտեսվարողի նկատմամբ  կիրառվել է  «վարչական տուգանք նշանակելու մասին» որոշումներ։

2015թ. կատարված ստուգումների թիվը նախորդ տարվա համեմատ 10%-ով  նվազել է , բայց նշանակված տուգանքների թիվը՝  մոտ 5 մլն դրամով ավելացել:
Մասնավորապես ՝  2014թ․ իրականացվել է 736 ստուգում և 406 որոշումներով նշանակվել 41 մլն 280 հազար դրամի տուգանք, իսկ 2015թ․ իրականացվել է 665 ստուգում և վերստուգում, որոնց արդյունքում 546 տնտեսվարողների նկատմամբ կիրառվել է տուգանք 46 մլն 910 հազար դրամի։

2016թ․ նախատեսված է իրականացնել  500 ստուգում, որոնցից  453  բարձր ռիսկայնությամբ, 47 միջին ռիսկայնությամբ  տնտեսավարող սուբյեկտների մոտ
(ցանկին մանրամասն կարող եք ծանոթանալ այստեղ)։