Երկրորդ կյանք` արդյունաբերական թափոնին
Արդյունաբերական փայտից պատրաստած պալետները (ներքնակ) օգտագործվում են ծանր բեռներ տեղափոխելու համար: Իրենց հիմնական գործառույթն իրականացնելուց հետո դրանք հաճախ երկրորդ կյանք են ստանում. պալետներից կահույք և այլ իրեր պատրաստելը լայն տարածում է գտնում աշխարհում: Հայաստանում նույնպես շատերը սկսել են գնահատել պալետի թաքնված հնարավորությունները: Արման Գասպարյանը` ինքնատիպ բազմոց ունենալու համար որոշել էր իր ձեռքով ինչ-որ բան սարքել: Համացանցի օգնությամբ գտավ հարմար տարբերակ` պալետը. այն բավականին ամուր է, երկարակյաց, բնական հումքից է` արդյունաբերական փայտից: Բազմոցին հաջորդեց փոքրիկ բարը, հաջորդը կլինի լվացարանը:
Այժմ Արմանը նաև պատվերներ է ընդունում: Պալետից ինչ-որ բան սարքելու գաղափարը նրան դուր է եկել նաև բնապահպանական տեսանկյունից. այն, ի տարբերություն սովորական փայտանյութի, կրկնօգտագործվում է (recycling), սկզբում ծառայում է որպես բեռնափոխադրող հարմարանք, հետո կարող է դառնալ կահույքի պարագա, մնացորդներ գրեթե չկան` դրանք վերածվում են ինքնատիպ ժամացույցների, տոնածառերի, հուշանվերների: Կրկնակի օգտագործվում են նաև մեխերը, որոնցով ամրացված են լինում պալետները:
Արտադրության ծավալները մեծ չեն, քանի որ դեռ նոր է սկսել, օգտվում է ձեռքի տակ եղած գործիքներից, տարածքը, որտեղ աշխատում է փոքր է, առանց նորմալ օդափոխության:
Արմանի պատրաստած կահույքը և այլ պարագաները շուկայականից կրկնակի էժան են, սակայն հաճախորդներին գրավում է ոչ միայն դա. նրանցից շատերը նախապատվությունը տալիս են պալետից կամ արդյունաբերական այլ թափոններից պատրաստված իրերին, քանի որ դրանք, կրկնակի օգտագործվելով, խնայում են բնությունը:
Այժմ կահույքագործությունը Արմանի համար դեռ հոբիի պես է, զբաղվում է իր հիմնական գործից ազատ ժամանակ. նա բանկում բիզնես վարկերի մասնագետ է, ինչը օգնում է գնահատել սկսած գործի ռիսկերը և հեռանկարները:
Մեկնաբանություններ (3)
Մեկնաբանել