Շաբաթ, 22 սեպտեմբերի

Սիրելի ամուսնուն սպասելիս. մայրն ու երեխաները տեղահանվել են, հայրն առաջնագծում է


28-ամյա Հասմիկ Ղարիբյանը 4 երեխաների մայր է: Ապրիլի 2-ի երեկոյան տորթ է թխել, որ հաջորդ օրը տանի մանկապարտեզ` տղայի 4-ամյակի առթիվ, իսկ երեկոյան ամուսնու և երեխաների հետ պլանավորել էին գնալ Ստեփանակերտ` ատրակցիոններ նստելու: Հենց այդ գիշեր էլ հնչել են արկերի պայթյունները, որից հետո Հասմիկն ու երեխաները գտնվում են տեղահանվածների համար հատկացված կեցավայրում, իսկ ամուսինը` հյուսիսային սահմանում:

«Ես եթե մի լավ օր եմ տեսել, ամուսնուս հետ եմ տեսել: Մինչև ամուսնանալս` միայն տանջվել եմ: Անապահով ընտանիք ենք եղել, հիմա էլ իմ ընտանիքն է անապահով, բայց ամուսինս շատ ուրիշ տեսակի մարդ է, մենք ամեն ինչ միասին ենք որոշում, ամեն հարցում ինքն ինձ աջակցում է: »,- ասում է Հասմիկը` հիշելով, որ դեռ 5 տարեկան էր, երբ մայրն Աղդամից կանաչի էր բերում, իսկ ինքը վաճառում էր փողոցներում:

Հասմիկի ամուսինը երբեմն-երբեմն զանգում է, հայտնում, որ ամեն ինչ կարգին է. «Ինքն ինձ շատ բան չի ասում, գիտի, որ անհանգստանում եմ: Ասում է, թե այնտեղ գործերով է, մեքենաներն է սարքում: Բայց դե, եթե խաբում է ու հիմա պատերազմում է, էլի իր երեխաների համար է անում, ոչինչ չեմ կարող ասել»,- ասում է Հասմիկը:

Մոտ 6 տարի Հասմիկենք բնակվել են մեկ սենյականոց տնակում, որի տանիքը կիսախարխուլ էր, պատերը` կիսաքանդ: Ամուսնու` աշխատանքի անցնելուց հետո բնակարան են վարձել Մարտակերտում: Ամուսնու աշխատավարձը և երեխաների նպաստը միասին կազմում են 151 հազար դրամ, որով հոգում են տան վարձը, կոմունալ վճարները և երեխաների սնունդը: Հասմիկն ու ամուսինը պլանավորել են 5-րդ երեխան էլ ունենալ` կառավարությունից տուն ստանալու նպատակով:

Հասմիկի հայրական տունը 1992-ի պատերազմի ժամանակ այրվել է` Մարտակերտի շրջանի Ջրաբերդ գյուղի այլ տների հետ մեկտեղ: 

Լուսանկարները` Քնար Բաբայանի


Գլխավոր էջ

Մեկնաբանություններ (1)
1. Հասմիկ 12:32 - 15 ապրիլի, 2016
Հասմի՛կ ջան, չմտածես, դու աշխարհի ամենահարուստ մարդն ես, ու ոչ ոք չի կարող պարծենալ, որ դիզած ոսկիներն իրեն այնքան երջանկություն են պարգևում, որքան քեզ քո ընտանիքն ու սերը...
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։