Այս տարվա առաջին եռամսյակում Հայաստանի տնտեսական ակտիվության ցուցանիշը (ՏԱՑ) 2015 թվականի նույն ժամանակաշրջանի համեմատ 5,5%-ով աճել է։ Այս մասին տեղեկանում ենք ՀՀ ազգային վիճակագրական ծառայության՝ օպերատիվ ամփոփմամբ ստացված ցուցանիշների հրապարակումից։

Ըստ այդ ցուցանիշների՝ ՏԱՑ-ի աճին նպատել է արդյունաբերության, գյուղատնտեսության և ծառայությունների ոլորտում գրանցված աճը։

Մասնավորապես, արդյունաբերական արտադրանքի ծավալը հանարապետությունում հունվար-մարտին կազմել է 305,3 մլրդ դրամ, աճը՝ 8,9%:

Գյուղատնտեսության համախառն արտադրանքի ծավալը՝ 71,2 մլրդ դրամ, աճը՝ 3,3%:

Իսկ ծառայությունների ծավալը (առանց առևտրի)՝ մոտ 270,8 մլրդ դրամ, աճը՝ 9,6%:

Թե այս ոլորտներում աճը կոնկրետ որ ենթաոլորտների հաշվին է գրանցվել, պարզ կլինի, երբ վիճծառայությունը հրապարակի սոցիալ-տնտեսական վիճակի ավելի ծավալուն զեկույցը։

Միևնույն ժամանակ անկում է գրանցվել շինարարության և առևտրաշրջանառության ոլորտներում։

Մասնավորապես, շինարարության  ծավալը կազմել է 42,1 մլրդ դրամ, անկումը՝ 2,2%:

Մանրածախ առևտրաշրջանառությունը՝  մոտ 434,6 մլրդ դրամ, անկումը՝ 1,1%:

Հիշեցնենք, որ հունվար-փետրվարին ևս, ըստ պաշտոնական վիճակագրության, արդյունաբերության և ծառայությունների ոլորտները գրեթե երկնիշ աճ են գրանցել։

Փաստորեն, պաշտոնական վիճակագրության ներկայացրած պատկերով Հայաստանում շարունակվում է նույն հակասական վիճակը մնալ, ինչ նախորդ տարի էր, երկրի տնտեսությունն աճում է, բայց մարդիկ քիչ են առևտուր անում։