Հաղթանակի տոնի, Լեռնային Ղարաբաղի Հանրապետության պաշտպանության բանակի եւ Շուշիի ազատագրման օրվա կապակցությամբ նախագահ Բակո Սահակյանը ստորագրել է մի շարք հրամանագրեր պարգեւատրելու մասին:

2016 թվականի ապրիլի 2-ից 5-ն ընկած ժամանակահատվածում հակառակորդի սանձազերծած լայնածավալ ռազմական գործողությունների ընթացքում Լեռնային Ղարաբաղի Հանրապետության պետական սահմանը պաշտպանելիս ցուցաբերած բացառիկ քաջության ու արիության համար պաշտպանության բանակի կրտսեր սերժանտ Ռոբերտ Աբաջյանին հետմահու շնորհվել է «Արցախի հերոս» Լեռնային Ղարաբաղի Հանրապետության բարձրագույն կոչում եւ «Ոսկե արծիվ» շքանշան։

Ռոբերտ Աբաջյանը 24-րդն է, ով արժանանում է «Արցախի հերոս» բարձրագույն կոչումին

Լեռնային Ղարաբաղի Հանրապետության պետական սահմանը պաշտպանելիս եւ հայրենիքի պաշտպանության համար մղված մարտերում ցուցաբերած արիության եւ խիզախության համար «Մարտական խաչ» 2-րդ աստիճանի շքանշանով պարգեւատրվել է 1 հոգի, «Արիության համար» մեդալով պարգեւատրվել է 44 հոգի, որից 4-ը՝ հետմահու, «Մարտական ծառայություն» մեդալով պարգեւատրվել է 241 հոգի, որից 11-ը` հետմահու:

Շարքային Նարեկ Մալխասյան՝ ՀՀ «Մարտական խաչ» 2-րդ աստիճանի շքանշանի ասպետ, ԼՂՀ «Արիության համար» մեդալակիր

Շուշի քաղաքի ազատագրման համար մղված մարտերում ցուցաբերած անձնական խիզախության համար «Շուշիի ազատագրման համար» մեդալով պարգեւատրվել է 16 հոգի, որից 2-ը` հետմահու:

Հերոսացած Ռոբերտ Աբաջյանի պարգեւը ստանում է նրա հայրը՝ Ալեքսանդր Աբաջյանը

ԼՂՀ մատուցած ծառայությունների համար մեկ ազատամարտիկ պարգեւատրվել է «Երախտագիտություն» մեդալով:

Սերժանտ Մարատ Պետրոսյան՝ ՀՀ «Մարտական խաչ» 1-ին աստիճանի շքանշանի ասպետ

Լուսանկարները՝ Արմեն Երամիշյանի