Մայիսի 25-ին ՍԻՆՈՓՍԻՍ-Արմենիա ընկերության գրասենյակում ՏՀՏ գործատուների միության խորհրդի անդամները հանդիպել են Բունդեսթագի փոխնախագահ Էդելգարդ Բուլմանի և Հայաստանի Հանրապետությունում Գերմանիայի Դաշնային Հանրապետության արտակարգ և լիազոր դեսպան Մաթիաս Քիսլերի հետ:

Հանդիպման շրջանակներում քննարկվել են հայ-գերմանական հարաբերությունների խորացման և ընդլայնման հարցերը ՏՀՏ ոլորտում:

Տիկին Բուլմանին հետաքրքրել են Հայաստանի ՏՀՏ ոլորտի զարգացման ուղղությունները, Միության համագործակցությունը ՏՀՏ ընկերությունների հետ, նորաստեղծ (star-up) ընկերությունների նկատմամբ քաղաքականությունը Հայաստանում, կիբեռանվտանգության վիճակը և զարգացումները, հայ-գերմանական համագործակցության մակարդակը ընդհանրապես և ՏՀՏ ոլորտում մասնավորապես և այլ հարցեր։

Ի պատասխան տիկին Էդելգարդ Բուլմանի հարցադրումների, ՏՀՏ գործատուների միության նախագահ Արմեն Բալդրյանը նշել է. «Հայ-գերմանական հարաբերությունները ՏՀՏ բնագավառում ունեն խորացման և ինչ ոչ տեղ նաև վերանայման կարիք, ինչը բխում է երկու երկրների, և առավելապես Հայաստանի շահերից։ ՏՀՏ ոլորտում կա երկու երկրների համագործակցության խորացման մեծ ներուժ»:

Նշվել է, որ ՏՀՏ գործատուների միության անդամ հանդիսացող Հայաստանի ՏՀՏ ոլորտի ընկերությունները միասին փորձում են կոորդինացնել ոլորտին առընչվող օրենսդրական, իրավական, կրթական հարցերը։ Միության առջև դրված կարևորագույն խնդիրներից է հանդիսանում կադրերի պատրաստումը։

Այդ խնդրի լուծման ուղղությամբ Միությունը հանդիսանում է մի շարք նախաձեռնությունների հեղինակ, ինչպիսք են Հաայստանում երրորդ սերնդի առաջատար տեխնոլոգիաների համալսարանի հիմնումը, ավագ դպրոցներում ՏՀՏ մասնագիտությունների դասավանդման պիլոտային ծրագրի իրականացումը և այլն։

Նշվել է կրթության և մասնավորապես hամալսարանական կրթության բնագավառում Հայաստանի և Գերմանիայի համագործակցության կարևորությունը։

Անդրադարձ է եղել նաև Միության կողմից աշնանը Հայաստանում կազմակերպվելիք Կիբեռանվտանգության միջազգային կոնֆերանսին և այդ միջոցառմանը գերմանական և եվրոպական փորձագետների մասնակցության կարևորությանը:  

Կողմերը պայմանավորվել են ուղղել իրենց ջանքերը հայ-գերմանական հարաբերությունների հետագա խորացմանը, ինչպես նաև ՀՀ-ում Գերմանիայի դեսպանատան հետ համատեղ աշխատել ՏՀՏ բնագավառում հայ-գերմանական համագործակցության հեռանկարային ծրագրերի իրականացման ուղղությամբ։