HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Ինչ կապ ունի Իշխան Զաքարյանը «Կարմիր սար» բնապահպանական հիմնադրամի հետ. ՀԲՃ

«Համահայկական բնապահպանական ճակատ (ՀԲՃ) քաղաքացիական նախաձեռնությանը հաջողվել է պարզել թե ինչ կապ կա ՀՀ Վերահսկիչ պալատի նախագահ Իշխան Զաքարյանի և «Կարմիր Սար» բնապահպանական հիմնադրամի միջև։

Այս թեմայով մեր նախորդ հրապարակման մեջ մենք արդեն տեղեկացրել էինք, որ այս հիմնադրամը և ՀՀ բնապահպանության նախարարությունը 2015թ-ի հոկտեմբերի 6-ին կնքել են «Կենդանական և բուսական աշխարհի օբյեկտների պահպանության, վերարտադրության» մասին N004 պայմանագիրը, որում նշված են հիմնադրամի կողմից Կոտայքի մարզի Գառնի, Հացավան և Արարատի մարզի Լանջազատ համայնքներում վարձակալած ընդհանուր 244 հեկտար մակերեսով հողատարածքների կադաստրային վկայականների տվյալները։

Չնայած տեղացիների և լրատվամիջոցների բազմաթիվ պնդումների առ այն, որ «Կարմիր Սար» բնապահպանական հիմնադրամի և այդ տարածքներում անցած տարի տնկած նորատունկ այգիների հետևում կանգնած է Իշխան Զաքարյանը՝ Վերահսկիչ պալատի նախագահը պալատի պաշտոնական կայքում տեղադրված իր հայտարարության մեջ հերքում է բոլոր այդ լուրերը։

Հասկանալի է, որ պետական պաշտոնյաներն իրենց ունեցվածքի, սեփականության տարբեր ձևերի ու բիզնեսների մի մասը գրանցում են այլ մարդկանց անուններով։ Այդ իսկ պատճառով մենք փորձեցինք համացանցում առկա բաց տվյալների միջոցով պարզել թե ովքեր են «Կարմիր Սար» բնապահպանական հիմնադրամի հիմնադիրները։

Հիմնադրամի գտնվելու վայր է նշված քաղաք Երևան Միկոյան 19, բնակարան 20 հասցեն, որը համընկնում է կանոնադրության մեջ որպես հիմնադիրներ նշված ՀՀ երեք քաղաքացիներից առաջինի՝ Սուրիկ Սերոբի Հովսեփյանի բնակության (հաշվառման) վայրի հետ։ Իսկ արդեն համացանցում տեղադրված լուսանկարների ուսումնասիրությունից պարզ է դառնում, որ Սուրիկ Հովսեփյանը բավականին մտերմիկ կամ նույնիսկ բարեկամական կապեր ունի Իշխան Զաքարյանի որդու՝ Վարդան Զաքարյանի հետ։

Բացի այդ, շատ «պատահական» զուգատիպությամբ, «Կարմիր Սար» բնապահպանական հիմնադրամի հիմնադիր Սուրիկ Հովսեփյանի հարազատ քույրը՝ Լիլիթ Հովսեփյանը, նաև աշխատում է հենց Իշխան Զաքարյանի գլխավորած Վերահսկիչ պալատում։

Իհարկե, Իշխան Զաքարյանը հիմա էլ է կարող հայտարարություն տարածել այն մասին, որ ինքն ամեն դեպքում ոչ մի կապ չունի «Կարմիր Սար» բնապահպանական հիմնադրամի, վարձակալած հողատարածքների ու տնկած այգիների հետ՝ համարելով, որ այս ամենը վատ տեղեկատվության պատճառով է։

Բոլոր փաստաթղթերին և լուսանկարներին կարող եք ծանոթանալ այստեղ»։  

Համահայկական բնապահպանական ճակատ (ՀԲՃ) քաղաքացիական նախաձեռնություն

Մեկնաբանություններ (1)

HH
ՀՀ բնապահպանության նախարարությունը տեղյակ է, որ սկսվել է ապօրինի անտառհատումների գործընթացը: Ոստիկանություն և այլ մարմիններ մեկնարկը տրված է, գիշերային ժամերին , ֆորդերը, կամազները վխտում են ճանապարհներին: Իսկ գ յուղ նախարարության ենթակայության տակ գտնվող հայանտառ ավել մարմնի պարտականությունը որն է այս դեպքում: Հարց է ծագում իրենց թերացման և բարձիթողի գործելաոճը որը տարիներ շարունակ մնում է նույնը և մի բան էլ ավելին ինչ ն է և որն է: Անհանգստանալու և նորմալ հսկողություն իրականացնող մարմին Հայաստանի Հնրապետությունում կարծ ես թե չկա , բոլորը զբաղված են ալանով և թալանով: Նենց որ սթափվեք քանի դեռ ուշ չէ:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter