Երկուշաբթի, 24 սեպտեմբերի

Կոտայքի պետգնումներում խոշոր խաղացողները. 33,6 մլն դրամ՝ Արամ Հարությունյանի ընկերությանը



Ջրային տնտեսության պետական կոմիտեի նախագահ Արամ Հարությունյանի ընկերությունները շարունակում են առանց մրցույթների գումարներ ստանալ պետական բյուջեից և ծրագրեր իրականացնել հայրենի մարզում և համայնքում:

Կոտայքի մարզի համայնքների առաջնահերթ հիմնախնդիրների լուծման ուղղությամբ 2015թ.-ին հատկացվել է 470 մլն դրամ: Այս գումարի առյուծի բաժինը՝ ավելի քան 202 մլն դրամն ուղղվել է մարզի ներհամայնքային ճանապարհների վերանորոգմանը, 167 մլնը՝ առողջապահական ոլորտին, 51 մլնը՝ դպրոցաշինությանը, իսկ մնացյալ փոքր մասն ուղղվել է ջրամատակարարման ոլորտի վերանորոգումներին:

Վերանորոգվել են Հրազդանի, Չարենցավանի, Բյուրեղավանի, Առինջի, Լեռնանիստի, Պռոշյանի, Եղվարդի և ծաղկաձորի ներհամայնքային ճանապարհները:

Ճանապարհաշինության կամ վերականգնման աշխատանքների պայմանագրեր կնքվել են երկու խոշոր խաղացողների հետ՝ «Բալահովիտ-1» ՍՊԸ-ի և «Նաիրի ՃՇՇ» ԲԲԸ-ի հետ:

Կոտայքի մարզում պետական գնումներով՝ առանց մրցույթների ծրագրեր իրականացնող ընկերությունները և նրանց ստացած գումարները պետական բյուջեից: 

«Բալահովիտ-1» ՍՊԸ-ի սեփականատերը Ռուբիկ Սերյոժայի Բաղդասարյանն է՝ գրանցված Կոտայքի մարզի Կապուտան գյուղում: Նա նաև ընկերության ղեկավարն է՝ տնօրենը: Ընկերությունը վերանորոգել է Հրազդանի, Չարենցավանի, Բյուրեղավանի, Առինջի ներհամայնքային ճանապարհները: Կոտայքի մարզպետարանի հետ կնքել է ավելի քան 140 մլն դրամի պայմանագիր: Վերանորոգել է նաև Ձորաղբյուրի միջնակարգ դպրոցի բացօթյա մարզադաշտը՝ 5 մլն դրամի հասնող գումարով:

«Նաիրի ՃՇՇ» ԲԲԸ-ն իրականացրել է Եղվարդի և Պռոշյանի ներհամայնքային ճանապարհների ասֆալտապատում: 2015-ին «Նաիրիի ՃՇՇ»-ին 29 մլն դրամի հասնող գումարով նորոգել է Եղվարդի ներհամայնքային ճանապարհները: Իսկ 5 մլն դրամով վերանորոգել է Պռոշյանի ներհամայնքային ճանապարհները:

Համաձայն իրավաբանական անձանց պետական ռեգիստրի, «Նաիրիի ՃՇՇ» ԲԲԸ պետական ընկերությունը սեփականաշնորհելուց հետո Արամ Հարությունյանն այնտեղ խոշոր բաժնետեր է՝ 99,9 %: Արամ Հարությունյանն իր հայրենի գյուղի ճանապարհների համար առաջին անգամը չէ, որ գումար է ստանում: 2014թ.-ին էլ Եղվարդի ներհամայնքային ճանապարհների հիմնանորոգման համար 23 մլն դրամի պայմանագիր էր կնքել «Նաիրիի ՃՇՇ»-ի հետ:

Դպրոցաշինության ոլորտում խոշոր ծրագիրը եղել է Նոր Հաճնի թիվ 3 հիմնական դպրոցի հիմնանորոգումը, որի համար մարզպետարանը ավելի քան 23 մլն դրամի պետական գնման պայմանագիր է կնքել «Աշկար» ՍՊԸ-ի հետ: Այս ընկերության սեփականատերն էլ ՀՀԿ Ֆանտանի սկզբնական կազմակերպության նախագահ հռչակված (համաձայն ՀՀԿ կայքի) Տարոն Մարտունու Եփրեմյանն է՝ Կոտայքի մարզի Ֆանտան գյուղից:

Կոտայքի մարզումիրականացված ծրագրերը և դրանց արժեքը

Հիշեցնենք՝ Ջրային տնտեսության պետական կոմիտեի նախագահ, Կոտայքի նախկին մարզպետ Արամ Հարությունյանը քանի դեռ պաշտոնավարում էր Կոտայքում, 2014-ին մարզում խոշոր ծրագրերն իրականացրել էր իր ընկերություններով:

Հայաստանի կառավարության կողմից 2014 թվականին Կոտայքի մարզի համայնքների առաջնահերթ հիմնախնդիրների լուծման ուղղությամբ հատկացվել է շուրջ 731 մլն դրամ: Նախկին մարզպետը այդ գումարից շուրջ 240 մլն դրամը տրամադրել էր իր ընկերություններին:


Գլխավոր էջ


Տես նաև՝

ավելին



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ