34 ժամ է՝ «Սասնա ծռեր» խմբին զրկել են էլեկտրական հոսանքից, սննդից և բժշկական ծառայությունից, գիշերվանից՝ նաև հեռախոսակապից
34 ժամ է՝ «Սասնա ծռեր» խմբին զրկել են էլեկտրական հոսանքից, սննդից և բժշկական ծառայությունից, գիշերվանից սկսած նաև՝ հեռախոսակապից: Այս մասին րոպեներ առաջ հայտարարեց «Հիմնադիր խորհրդարանի» անդամ, «ԱՍԱԼԱ»-ի մարտիկ Ալեք Ենիգոմշյանը՝ Խորենացի փողոցում տեղի ունեցող ասուլիսի ընթացքում:
Սա, Ալեք Ենիգոմշյանի խոսքով, իշխանությունների կողմից սրացման տանելու քայլեր են: Ենիգոմշյանը նշեց, որ մի կողմից վարչախումբը հայտարում է իրավիճակը չսրելու մասին, սակայն մյուս կողմից իշխանությունները սրացման քայլերի են գնում:
Ալեք Ենիգոմշյանը հայտարարեց, որ երեկ գիշերվանից վարչախումբը գնում է սրացման նաև անվտանգության առումով. փորձ է արվել մոտենալ ՊՊԾ գնդի տարածքին և քանդել պատը: Այս փաստը հաստատել են նաև շրջանի բնակիչները: Բացի դրանից, ցածր բարձրության վրա ուղղաթիռ է թռչել ՊՊԾ գնդի տարածքի վրայից:
«Այս ամենը ցույց է տալիս, որ իշխանությունները հակված չեն հանգիստ մթնոլորտում շարունակել բանակցությունները տղաների հետ»,-հայտարարեց Ալեք Ենիգոմշյանը:
Մեկնաբանել