Արդեն տեղեկացրել ենք՝ «Ասպարեզ» մամուլի ակումբի նախագահ Լևոն Բարսեղյանի գործով այսօր ստացվել է քրեագիտական փորձաքննության եզրակացությունը: Ըստ դրա՝ Լեւոն Բարսեղյանի մոտ հայտնաբերված դանակը սառը զենք չէ, ուստի քննիչը որոշում է կայացրել Լևոն Բարսեղյանին արգելանքից ազատելու մասին:

Քիչ առաջ ազատ արձակված Բարսեղյանը հանդես եկավ ասուլիսով` հայտարարելով, որ իշխանությունը այս անգամ որոշեց նահանջել։ Իրեն ազատազրկելու նպատակը ինչ-որ ժամանակով իրեն մեկուսացնելն էր, և եթե հուլիսի 17-ին իրեն ազատազրկեցին մի քանի ժամով, հուլիսի 26-ին մի քանի օրով, ապա համոզված է՝ մյուս անգամ առավել երկար ժամանակ կզրկվի ազատությունից։

Բարսեղյանին Խորենացի փողոցից բերման են ենթարկել հուլիսի 26-ին` 02։45-ի սահմաններում։ Սկզբում տարել են Շենգավիթի ոստիկանական բաժանմունք, խուզարկել իր մոտ գտնվող իրերը և հայտնաբերել դանակը։ Ոստիկանական բաժանմունքում Բարսեղյանը հայտնել է, որ «Սերժ Սարգսյանի ոստիկանների» հարցերին չի պատասխանում, ոչինչ չի գրելու և ստորագրելու։

Առավոտյան՝ 08։15 սահմաններում, Շենգավիթի ոստիկանական բաժին են ժամանել Կումայրիի ոստիկանական բաժանմունքից քաղաքացիական հագուստով անձիք և Բարսեղյանին հրամայել նստել իրենց ավտոմեքենան։ Այդ ընթացքում Բարսեղյանի հարազատներին տեղեկացրել են, թե նրան ազատ են արձակել, եթե լուր չունեն, հնարավոր է՝ ընդհատակ է այցել։ Այնինչ նա այդ ընթացքում գտնվել է Կումայրիի ոստիկանական բաժանմունքում։ Այնտեղ Բարսեղյանին պահել են 10։30-14։00-ի սահմանները, այնուհետև ներկայացրել ծանուցագիր, ըստ որի` 17։00-ին կրկին պետք է գնա Շենգավիթի ոստիկանական բաժանմունք՝ հարցաքննության նպատակով։ Սակայն ոստիկանները Բարսեղյանին զգուշացրել են, որ Գյումրիից իրենք պետք է նրան տեղափոխեն Շենգավիթի ոստիկանական բաժանմունք։ 

Ժամը 17։00-ին Շենգավիթի ոստիկանական բաժանմունքում կրկին խուզարկել են Բարսեղյանին, մեղադրանք առաջադրել 235-րդ հոդվածի 4-րդ մասով՝ սառը զենք պահելու կասկածանքով։ Այնուհետև, արդեն 20։00-ին, Բարսեղյանին տեղափոխել են էրեբունու ՁՊՎ և մոտ մեկ ժամ անց ազատ արձակել։

Բարսեղյանն այս գործով նաև կարողացել է ձեռք բերել փաստաթուղթ, որով դանակ կրելը, իր մոտ եղածի չափով, այլևս անօրինական չէ։ Բարսեղյանը հիշում է, որ անցած տարի ևս` Բաղրամյան պողոտայում կայացած ցույցերի ժամանակ Նոր Նորքի ոստիկանական բաժին բերման ենթարկելուց հետո խուզարկել են իր դանակը, չափել և գծել այն, այնուհետև վերադարձրել` ասելով, որ ունի նման դանակ կրելու իրավունք։

Լևոն Բարսեղյանի փաստաբան Հայկուհի Հարությունյանը ևս հաստատում է՝ այս դեպքի յուրաքանչյուր դրվագ խախատում է, մասնավորապես` ազատազրկման տևողությունը, ձևը, պայմանները, իրավական աջակցություն չունենալու և չտրամադրելու հնարավորությունները։ Սակայն իրավունքի ամենամեծ խախատում է համարում խոսքի ազատության և հավաքներին մասնակցելու հանգամանքով Բարսեղյանի նկատմամբ քրեական հետապնդում իրականացնելը։ Փաստաբանը ասում է, որ Շենգավիթի ոստիկանական բաժանմունքում իրենց անհարգալից վերաբերմունք են ցուցաբարել։ Ոստիկանական բաժանմունքում գտնվելու 14 ժամերի ընթացքում Բարսեղյանին ո´չ սնունդ, ո´չ ջուր, ո´չ կարիքները հոգալու հնարավորություն են տվել։

Ճնշման և լարված մթնոլորտում Բարսեղյանի առողջական վիճակը վատացել է, փաստաբանը զանգահարել է շտապ օգնություն, սակայն նրանց թույլ չեն տվել մուտք գործել ոստիկանական բաժանմունք, այնուհետև, երբ բժիշկները զանագահարել են փաստաբանին` հայտնելով, որ իրենց արգելում են մոտենալ հիվանդին, ոստիկանները նոր թույլատրել են։ Մինչ այդ Բարսեղյանը խնդրել է ջուր տրամադրել՝ դեղահաբ ընդունելու համար, սակայն պատասխանել են՝ «մենք ստեղ ջուր չունենք, կներեք, երրորդ  հարկում ենք»։

Բարսեղյանը իր խախտված իրավունքները վերկանգնելու է ոստիկանության դեմ քաղաքացիական հայց ներկայացնելով: «Շարունակելու եմ մասնակցել հանրահավաքների: Իմ ազատությունների համար ինչքան պետք կլինի, ես նստող եմ»,- ասում է Բարսեղյանը։

լուսանկարը` Մեդիա կենտրոնի