«Ընդդեմ կանանց նկատմամբ բռնության կոալիցիան»՝ ընդդեմ «Ա-ԹիՎի»-ի
Այսօր առավոտյան, ժամը՝ 10:00-ին, «Ա-ԹիՎի» հեռուստաընկերության դիմաց «Ընդդեմ կանանց նկատմամբ բռնության կոալիցիան» կազմակերպել էր բողոքի ակցիա: 2016թ. հուլիսի 8-ին Երևանում տեղի էր ունեցել արյունալի մի սպանություն՝ կացնահարվել էր մի ամբողջ ընտանիք:
Դեպքից մի քանի ամիս առաջ «Կիսաբաց լուսամուտներ» հաղորդաշարն իր «Վտանգավոր լռություն» թողարկման ընթացքում միակողմանիորեն դիտարկելով ընտանիքի խնդիրը և հորը՝ Վլադիկ Մարտիրոսյանին ներկայացնելով որպես տուժող՝ հորդորել էր ամեն գնով վերականգնել ընտանիքն ու միանալ կնոջը:
Ըստ ակցիայի մասնակիցների՝ «Կիսաբաց լուսամուտներ» հաղորդաշարը թույլ է տվել մարդու իրավունքների տեսանկյունից կոպիտ սխալներ, միաժամանակ հաղորդաշարի կողմից թույլ տված բազմաթիվ խեղաթյուրումներն ու իրավիճակի սխալ նկարագրումը ոչ միայն հանրային սխալ ընկալում է ստեղծել դեպքի ու ընտանիքի վերաբերյալ, այլև մարդկային կյանքեր է արժեցել, որի պատասխանատվությունն է կրում նաև «Ա-ԹիՎի» հեռուստաընկերության «Կիսաբաց լուսամուտներ» հաղորդաշարը:
Ակցիայի ընթացքում մասնակիցները անվտանգության աշխատակիցներից պահանջում էին կանչել «Ա-ԹիՎի» հեռուստաընկերության տնօրինությանը, ինչպես նաև «Կիսաբաց լուսամուտներ» հաղորդաշարի հաղորդավար Հրաչ Մուրադյանին, սակայն նրանց հայտնեցին, որ տնօրինությունն ու Մուրադյանն արձակուրդում են և ներսից կողպեցին դուռը։
Տեքստը եւ լուսանկարները՝ Անի Թադեւոսյանի
Մեկնաբանություններ (1)
Մեկնաբանել