Ո՞վ կզրկվի բարեկարգված Վերնիսաժում առեւտուր կազմակերպելու իրավունքից. քիմիկոսները դժգոհ են
Վերնիսաժում բարեկարգման աշխատանքները շուտով կավարտվեն, եւ արդեն հայտնի է, թե որ խմբերն են զրկվելու նորացված տարածքում առեւտրով զբաղվելու իրավունքից: Իհարկե, դեռեւս նախագծի տեսքով, բայց քաղաքապետարանը գրավոր եւ շատ հստակ ներկայացրել է իր դիրքորոշումը տվյալ հարցի վերաբերյալ:
Արդեն միանշանակ է, որ շուտով Վերնիսաժում չենք լսի ամեն շաբաթ-կիրակի անդադար հնչող «Ով սիրուն, սիրունը», քանի որ կարգելվի աուդիո արտադրանքի վաճառքը: Տարածքից կհանվեն կենցաղային քիմիայի վաճառքի կետերը:
Պատրաստ է Երևանի ավագանու որոշման համապատասխան նախագիծ, եւ քաղաքապետարանը շահագրգիռ բոլոր ֆիզիկական և իրավաբանական անձանց հրավիրում է մինչեւ օգոստոսի 24-ը հանդես գալ Վերնիսաժում առևտրային գործընթացի կազմակերպման պայմանների վերաբերյալ առաջարկություններով եւ դիտողություններով: Իսկ օգոստոսի 24-ին քաղաքապետարանի ճեպազրույցների դահլիճում տեղի կունենան հանրային բացլսումներ:
Բարեկարգման աշխատանքներից հետո Վերնիսաժում կարգելվի վաճառել նաեւ գյուղատնտեսական և պարենային մթերքներ, պարֆումերիա, ծխախոտային արտադրանք, աուդիո եւ վիդեո արտադրանք, համակարգչային տեղեկատվական կրիչներ, կենցաղային տեխնիկա, կենցաղային քիմիայի ապրանքներ, կենդանիներ: Կենդանիների շուկան արդեն տեղափոխվել է Պարույր Սեւակի փողոց: Վերնիսաժում կարգելվի նաեւ դեղորայքի եւ բժշկական նշանակության ապրանքների վաճառքը, ոչ հուշանվերային բնույթի հին կենցաղային իրերը եւ հնամաշ հագուստը:
Ոչ հուշանվերային բնույթի հին կենցաղային իրերի եւ հնամաշ հագուստի առումով ամեն ինչ վաղուց է պարզ: Դեռեւս շաբաթներ առաջ Երեւանի քաղաքապետարանի առեւտրի վարչությունը նման իրերի առեւտրով զբաղվողներին արգելեց այլեւս կանգնել Վերնիսաժում՝ նրանց ուղարկելով Հրազդան մարզադաշտի հարակից տարածք: Առեւտրականների դժգոհություններն ու բողոքի փոքրիկ գործողություններն արդյունք չտվեցին:
Կենցաղային քիմիայի առեւտրով զբաղվողները՝ 6-7 հոգի, չեն պատրաստվում ակցիաներ անել, սակայն շատ դժգոհ են, որ Վերնիսաժի մի անկյունում իրենց ջանքերով ձեւավորված շուկան պետք է փակվի: Ավելի շուտ՝ տեղափոխվի Գնունու շուկա: Մասնագիտությամբ քիմիկոս Հենրիկ Ավետիքյանը «Հետք»-ի հետ զրույցում որպես տեղափոխման առնչությամբ ծագած խնդիր մատնանշում է այն, որ Վերնիսաժի պայմաններում՝ 1000 դրամ օրավարձով, հնարավոր է գոյատեւել: Գնունու շուկայում, ըստ քիմիկոսի, ամսավճարը 150 հազար դրամ է:
«Էստեղ մենք գոյատեւում ենք, իսկ ուրիշ տեղ գնալը մեզ վրա թվեր կնստի: Ուղարկում են Գնունու շուկա, որտեղ ամսվա վարձը 150 հազար դրամ ա: Ես 150 հազար որտեղի՞ց տամ: Իհարկե, մենք ոչ մեկս էդ հնարավորությունը չունենք: Վերնիսաժում իմ ամսվա առեւտուրը կազմում ա մոտ 200 հազար դրամ: Դրանից հանում ենք ապրանքի գինը, սրան փող տուր, նրան փող տուր, մի բաժակ կոֆե խմի, ջուր խմի, հերիք չի անում»:
Հարցին՝ ի՞նչ են անելու, պատասխանեց. «Ձեռք-ձեռքի տված գնալու ենք Ռուսաստան: Ժիրինովսկին որ մեր մասին կարծիք ա արտահայտում, նեղանում ենք: Մենք ենք թույլ տալիս, որ մեր մասին նման կարծիք ստեղծվի»:
Արտակ Ղազարյանն աշխատել է պոլիվինիլացետատի գործարանում որպես հերթափոխի պետ: Նա նույնպես մասնագիտությամբ քիմիկոս է, 90-ականներից հետո Վերնիսաժում կենցաղային քիմիայի սեղանիկ ունի: «Ես քաղաքապետի տեղակալ Դավիթ Օհանյանին էլ եմ ասել. եթե մեզ հանում եք, մի ուրիշ բան կառուցեք: Չնայած իմ առաջարկն այն է, որ եղածին ձեռք չտան: Փոխքաղաքապետը մեզ առաջարկել է շուկաներ, բայց դրանք մեզ ձեռնտու չեն: Էս շուկան մենք ենք ստեղծել: 20-22 տարի կանգնել ենք ստեղ, ստեղծել շուկա, գնորդներ ձեռք բերել, անվճար խորհրդատվություն ենք տալիս մարդկանց: Մեզնից տեխնոլոգիա են հարցնում, մենք օգնում ենք մարդկանց, բացատրում ենք»:
Դիտարկմանը, թե քաղաքապետարանը պարզապես ցանկանում է Վերինսաժը բացառապես կիրառական արվեստի վաճառք-ցուցահանդես լինի, Արտակ Ղազարյանը հակադարձեց. «Պետությունը մենակ արվեստով ա՞ զարգանում: Էստեղ մեկը մյուսի հետ համակցված է: Օրինակ՝ մեկը ոսկի կամ արծաթ ա ծախում, գալիս են մեզնից համ տեխնոլոգիա են ուզում, հումք են ուզում, որպեսզի էդ արծաթը վերամշակեն, դարձնեն զարդ: Այ էդպես կապակցված են»:
Քաղաքապետարանը ցուցահանդես–վաճառքի ներկայացված առարկաները կանոնակարգել է ըստ կերպարվեստի և դեկորատիվ-կիրառական արվեստի առարկաների, որոնց թվում են ապակյա եւ փայտյա նյութերը, գործվածքները, ձեռագործ աշխատանքները, ոսկրից ու քարից պատրաստված նյութերը, գեղանկարները, փորագրապատկերները եւ այլն: Նշված խմբում ներառվող առարկաները կկանոնակարգվեն նաեւ ըստ ժամանակագրության՝ «հնատիպ և ազգագրական նյութ» և «ժամանակակից ստեղծագործություններ» պայմանական խմբերի: Յուրաքանչյուրի խմբի համար կստեղծվեն համապատասխան տաղավարներ՝ ցուցադրության և պահպանության նպատակով:
Տարածքում թույլատրվում է վաճառել ոչ պարենային ապրանքների, ժողովրդական ստեղծագործությունների գործեր, արհեստագործական արտադրանք և այլ ապրանքներ՝ փայտից քանդակներ,օբսիդիաններ, արծաթից պատրաստված զարդեղեն, հուշանվերներ, հուշամեդալներ, մանրադրամներ, նկարներ, հնաոճ իրեր, գորգեր, ձեռագործներ: Չի արգելվի գրքերի, կենցաղային հնաոճ ապրանքների, ոսկերչական գործիքների, որսորդական պարագաների, կենդանիների համար նախատեսված իրերի եւ բնական քարերի վաճառքը:
Վերնիսաժի առեւտրականներից ոմանք, չցանկանալով հանդես գալ իրենց անուններով, դժգոհ են այն բանից, որ տարածքի բարեկարգման աշխատանքների ժամանակ պետք է ապամոնտաժվի նաեւ հարավ-արեւելյան մուտքում ոչ շատ վաղուց տեղադրված ծածկը, որը կառուցվել է իրենց տրամադրած գումարներով: Յուրաքանչյուրը, ըստ առեւտրականների, միջինը 30-40 հազար դրամ է տրամադրել ծածկի տեղադրման համար: Նրանք վստահ են, որ իրենց փողերը չեն վերադարձնի:
Մեկնաբանել