ՀՀ վերաքննիչ քրեական դատարանը մերժեց «Սասնա ծռեր» խմբի անդամ Տիգրան Սարգսյանի բողոքը՝ առաջին ատյանի դատարանի կալանքի որոշումը վերացնելու մասին: Նրա պաշտպանները միջնորդել էին փոխել խափանման միջոցը և գրավի դիմաց նրան ազատ արձակել: Կայացած դատական նիստին ներկա չեն գտնվել ո՛չ քննիչը, ո՛չ դատախազը:

Ինչպես տեղեկացրեց Տիգրան Սարգսյանի պաշտպան Գրիշա Բալասանյանը, դատարանը խորհրդակցական սենյակում անցկացրել է 10-15 րոպե, որից հետո հրապարակել է որոշման եզրափակիչ մասը:

«Թե՛ իմ պաշտպանյալ Տիգրան Սարգսյանը, թե՛ ես հոգեպես պատրաստ էինք այս որոշմանը, քանի որ գիտակցում էինք, որ գործ ունենք ոչ թե արդարադատության, այլ քաղաքական պատվերի հետ: Այս գործով դատարանները արդարադատություն չեն իրականացնում, ամբողջ գործընթացը ձևական է և արարողակարգային: Գործ ունենք զուտ քաղաքական գործընթացի հետ, որին ուզում են արդարադատության «հագուստ» հագցնել: Դա այնքան ցայտուն է, որ հնարավոր չէ կոծկել: Դատարաններն ակնհայտ կաշկանդված են և բողոքները լսում են՝ նախապես իմանալով, որ դրանք մերժելու են: Կարող եմ ասել, որ նույնիսկ չեն լսում, թե ինչ են խոսում կողմերը, նրանց դա չի հետաքրքրում»,-նշում է Գրիշա Բալասանյանը:

Փաստաբանի խոսքով՝ Տիգրան Սարգսյանն այսօր դատարանում շատ հանգիստ էր և պատրաստ էր լսել մերժման որոշումը: Որոշման հրապարակումից հետո անգամ Սարգսյանն է հուսադրել փաստաբանին, որ «ամեն ինչ լավ է լինելու»:

Նշենք, որ Տիգրան Սարգսյանին մեղադրանք է առաջադրվել ՀՀ քրեական օրենսգրքի 235 հոդվածի 3-րդ մասով և 218 հոդվածի 3-րդ մասի 1-ին կետով, այն բանի համար, որ նա կազմակերպված խմբի կազմում ապօրինի կերպով ձեռք է բերել, պահել, փոխադրել և կրել է հրազեն ու ռազմամթերք: Ինչպես նաև 2016թ. հուլիսի 27-ից 31-ն ընկած ժամանակահատվածում ՀՀ ոստիկանության Երևան քաղաքի վարչության ՊՊԾ գնդի վարչական շենքում և հարակից տարածքում կազմակերպված խմբի կազմում զենքի գործադրմամբ պատանդ է վերցրել և պահել «Շտապբուժօգնություն» ՓԲԸ անձնակազմի երեք աշխատակիցների՝ նրանց ազատելու պայմանով պետական մարմիններին ներկայացնելով վիրաբուժական նոր անձնակազմով ապահովելու, ինչպես նաև ՀՀ առողջապահության նախարարի կողմից գնդի տարածք ժամանելու պահանջներ: