Երեքշաբթի, 25 սեպտեմբերի

Կարմիր գրքում գրանցված գորշ արջի քոթոթը՝ Երևանի Գոգոլի փողոցում



Քանաքեռ-Զեյթուն համայնքի Գոգոլի 107 հասցեի դիմաց՝ ճաղերով առանձնացված «բեսետկայում» մի քանի օր է՝ արջի քոթոթ են պահում:

Շաբաթ օրը՝ մեր այցելության պահին նրա վանդակ էին մտնում թաղի երեխաները, անկաշկանդ շփվում հետը: Իսկ քոթոթի բերանից փրփուր էր հոսում:  

Փոքրիկները, որոնք խաղում էին նրա հետ, պատմեցին, որ արջի ատամները հանել են, որպեսզի վնաս չտա: Դրա համար էլ բերանի խոռոչը «վիրավոր» է:

Տանտիրուհի Գայանեն պատմեց, որ արջը իրենցը չէ: Ամուսնու ընկերն է խնդրել մի քանի օրով պահել, մինչև վանդակը պատրաստեն, որպեսզի նրան տեղափոխեն:

Քիչ անց Գայանեի ամուսնու հետ եկավ նաև արջի տերը ներկայացող Շանթ Բագրատյանը: Վերջինս, պարզեցինք, որ Վայոց ձորի նախկին մարզպետ, ԲՀԿ ական Սերգեյ Բագրատյանի որդին է:

Երիտասարդը հավաստեց, որ բոլոր համապատասխան փաստաթղթերն ունեն, արջի գործն էլ ոստիկանությունում է, որովհետև Պարոնյան փողոցում նրան հեռուստատեսության աշխատողները  նկատել և նկարահանել էին: Այս անգամ, սակայն, արջը ապաստանել է Գոգոլի 107 հասցեի դիմացը, որպեսզի բժիշկը նրա ատամով զբաղվի: Իսկ արջի ժանիքը, ըստ Շանթ Բագրատյանի, կոտրվել է պատահաբար:

Քոթոթը 7 ամսական է: Թե ինչու են հիվանդ քոթոթին հանրային տարածք տեղափոխել, տերը բացատրեց ժամանակավոր լինելու և բուժվելու հանգամանքով: 

«Կենդանին հիվանդ կենդանի է, բուժում ենք, մեր կենդանին է: Չպահեն՞ք: Ատամը ջարդվել է, մտել է լնդի մեջ, հիմա էլ սրսկում են, անտիբիոտիկներ են տալիս»,- ասաց Շանթ Բագրատյանը:

Հարցնում եմ՝ գիտի, որ Կարմիր գրքում է գրանցված քոթոթը, երիտասարդը պատասխանում է. «Կարա լինի: Մենք հոմ վատ բան չենք անում: Որ կարմիր գրքում է, ավելի լավ, մի հատ օրինակ մենք ենք պահում,- հպարտանում է նա:  -Էս երկրում էնքան նկարելու բան կա, նկարեք, որ մարդկանց չեն թողնում աշխատեն, մարդիկ սոված վիճակում են և մահանում են սովից»,- խորհուրդ տվեց Շանթ Բագրատյանը:

Իսկ արջին պահելը, ըստ նրա, շատ էժան է նստում, օրը 500 դրամ, մարդկանց սննդի ավելցուկներով են նրան պահում: «Որը որ թթվում է, ինքը ուտում է»,- ասում է 107 տան սեփականատերը և խորհուրդ տալիս մեզ ջնջել նկարահանումները: -Քուրս, չես կարա նենց անես, որ լավ ձևով ճանապարհենք Ձեզ»:

«Լավ ձևը», ասում եմ, արջի վերաբերյալ համապատասխան փաստաթղթեր ցույց տալն է: Շանթ Բագրատյանը խոստանում է զանգահարել և արջի փաստաթղթերը (որոնք, նրա ասելով, գտնվում են Տավուշի մարզում) մեզ ցույց տալ մինչ այսօր ժամը 14:00-ը: Սակայն առայժմ նա ոչինչ չի ներկայացրել:

Իսկ 107 հասցեի սեփականատերը խոստացավ բժշկի սրսկումից հետո արջին տեղափոխել իր նախկին տարածք՝ Սևանի փողոց: 


Գլխավոր էջ



Մեկնաբանություններ (4)
1. Շուշան17:05 - 5 սեպտեմբերի, 2016
Իսկ դուք դիմել եք կենդանիների պաշտպանության գրասենյակ (եթե իհարկե նման բան կա Հայաստանում)? Միգուցե հնարավոր է ինչ-որ միջոցով փրկել Արջուկին ու գոնե գազանանոց տեղափոխել?
2. Սիրանուշ16:28 - 6 սեպտեմբերի, 2016
Դուք էլ գիտեք գազանանոցում լավ են նայում?
3. Սիլվա09:32 - 7 սեպտեմբերի, 2016
Եվ այսպես երեկ երեկոյան այցելեցինք Գոգոլի 107 : Առաջինը մեզ մոտեցան երեխաները ասելով թե արջուկին արդեն տարել են նույնիսկ ասեցին որ Սևանի փողոցումա հիմա: Քիչ անց մեզ մոտեցավ Գայանեն : Նա ասաց որ ինքը և իր ամուսին Կարենը խնամում էին արջուկին բժշկական օգնություն ցույց տալիս: Նա հերքեց այն փաստը որ հանված են արջուկի բոլոր ատամները: Գայանեն ասաց որ կենդանին անհանգիստ էր և նրանք ստիպված էին հրավիրել անասնաբույժի որը մի քանի սրսկում արեց և վերևի ծնոտի աջից հինգերրորդ, ձախից երրորդ ատամները հեռացրեց վորովհետև ատամները վատ վիճակում էին: Խոսեցի հեռախոսով նայև Կարենի հետ : Մեր հարցին թե ուրա հիմա արջուկը նա ասաց որ այլևս չէին կարող կենդանուն պահել վանդակում: Տեղափոխել են կենդանուն դեպի Եղեգնաձոր և բաց ողել վայրի բնություն: Թե ինչքանով է այս տեղեկատվությունը համապատասխանում իրականությանը դեռ չեմ կարող ասել : Հուսով եմ որ արջուկը իրոք ազատության մեջ է:
4. ԱՆՆԱ00:35 - 8 սեպտեմբերի, 2016
Եթե ատամները կարգին վիճակում չեն ազատության մեջ կսատկի, մանավանդ որ վայրի կյանքին սովոր չէ։ Բայց չեմ կարծում ճիշտ են ասում, ու կարծում եմ որ հատուկ են ատամները հանել - կենդանուն ատամներից զրկելը հայ հոռփացածների զվարճանքներից ա․․․
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ