Արաբական Միացյալ Էմիրություններում գործող «Արեմպա ինթերնեյշնլ» ՍՊԸ ՖԶԵ(«Arempa International» LTD FZE) ընկերությունը Հայաստանի տարբեր պետական կառույցների հետ 2015թ. շուրջ 935 միլիոն 800 հազար դրամ ընդհանուր արժողությամբ պայմանգրեր է կնքել: Նման ուսումնասիրության է կատարել «Թրանսփարենսի ինթերնեյշնլ» հակակոռուպցիոն կենտրոնը` նշելով, որ ընկերությունը Հայաստանում ավտոմեքենաների, ինքնաթիռների և ռենտգեն սարքավորումների սպասարկման ոլորտում կնքված մեկ անձից գնումներում խոշորագույնն է:

Կառավարության պաշտոնական աղբյուրներից տեղեկանում ենք, որ ֆինանսների նախարարությունը 2015թ. շուրջ 350 միլիոն դրամի պայմանգիր է կնքել «Արեմպա ինթերնեյշնլ» ընկերության հետ և պարտավորվել կատարել Մեղրու և Բագրատաշենի մաքսային կետերում տեղադրված «Rapiscan Eagle Gantry» ռենտգենյան զննող սարքավորումների տեխնիկական սպասարկումը:

Ծառայության ընդհանուր գինը հաշվարկվել է 832 650 ԱՄՆ դոլար, որից 138 775 ԱՄՆ դոլարն ավելացված արժեքի հարկն է, և նույնքան`138 775 ԱՄՆ դոլարը` ոչ ռեզիդենտի շահութահարկը: Այսինքն` կատարողին ծառայության դիմաց վճարվելիք զուտ գումարը կազմել է 555 100 ԱՄՆ դոլար: Մեղրու անցակետում ռենտգենյան սարքավորումների տեխնիկական սպասարկման մեկ ամսվա ծառայության գումարը 2015թ. կազմել է շուրջ 25 հազար, իսկ Բագրատաշենինը` շուրջ 17 հազար դոլար: 

Որպես մեկ անձից գնման իրավական հիմք նշվել է այն հանգամանքը, որ նշված ռենտգենյան սարքավորուների սպասարկումն ընկերության հատուկ կամ բացառիկ իրավունքն է: Մինչդեռ «Թրանսփարենսի ինթերնեյշնլ» հակակոռուպցիոն կենտրոնը իր կատարած ուսումնասիրության մեջ այս ընկերությունը ներառել է Այլընտրանքի առկայության պարագայում  20 մլն դրամի սահմանաչափը գերազանցող ոչ մրցակցային ձեռքբերումների շարքում:

Ֆինանսների նախարարությունն այս տարի ևս Մեղրու մաքսային անցակետի ռենտգեն սարքավորումների սպասարկման համար «Արեմպա ինթերնեյշնլ»-ի հետ կնքել է 234 միլիոն դրամի պայմանագիր: «Արեմպա Ինթերնեյշնլ» ՍՊԸ ՖԶԵ-ն, ըստ կնքված պայմանագրերի, գործում է Արաբական Միացյալ Էմիրությունների «Շարժա Աերոպորտ» միջազգային ազատ տնտեսական գոտում: