Ճամբարակի անմրցակից թեկնածուն նախընտրական քարոզչության անհրաժեշտություն չի տեսնում
Գեղարքունիքի մարզի Ճամբարակ համայնքի ղեկավարի թեկնածուները երկուսն էին՝ ներկայիս քաղաքապետ ՀՀԿ-ական Յուրիկ Ավալյանը եւ նրա մրցակիցը ԲՀԿ-ական, սակայն ինքնառաջադրված Սերյոժա Ավալյանը: Չնայած ազգանունների նույնությանը, նրանք չունեին բարեկամական կապեր: Բնակիչների համոզմամբ՝ սպասվում էր վերջին տարիների ամենալարված ընտրությունը, քանի որ երկու թեկնածուներն էլ վճռական էին տրամադրված, սակայն Սերյոժա Ավալյանն ինքնաբացարկ ներկայացրեց՝ ասպարեզը թողնելով ՀՀԿ-ական թեկնածուին:
Յուրիկ Ավալյանը 5800 բնակիչ ունեցող Ճամբարակի քաղաքապետ է ընտրվել 2005 թվական, այն ժամանակ նա դեռեւս անկուսակցական էր եւ մրցակցում էր ՀՀԿ-ական թեկնածու Հայկ Լազարյանի եւ անկուսակցական Ռոբերտ Մարտիրոսյանի հետ: Ձայների գերակշիռ մեծամասնությամբ հաղթել է Յուրիկ Ավալյանը: 2008 թ· նոյեմբերի 16-ին կայացած ընտրությունների ժամանակ նրա մրցակիցն էր Ռիտա Հովհաննիսյանը, ով լուրջ պայքարի արդյունքում է քաղաքապետի պաշտոնը զիջել Յուրիկ Ավալյանին: 2012 թ·-ին ներկայիս քաղաքապետը մրցակից չուներ եւ ընտրությունների մասնակիցների մոտ 90%-ը կողմ է քվեարկել նրան:
Քաղաքապետի պաշտոնը 11 զբաղեցնելուց հետո, լուրջ մրցակցություն էր սպասվում Յուրիկ Ավալյանին, քանի որ նախորդ ընտրությունները ցույց են տվել, որ թեկնածու լինելու դեպքում լուրջ պայքար է ընթանում այս համայնքում: Սակայն, ինչպես տեսնում ենք, այս տարի նույնպես այդ պայքարը տեղի չի ունենա: Այս ամենից զատ մեծ է նաեւ բնակիչների դժգոհությունը: Քաղաքացիները դժգոհ են նրա ղեկավարումից· մարդիկ վախենում եւ բողոքում են թշնամու կրակոցներից, քանի որ Ճամբարակը գտնվում է սահմանամերձ գոտում: Սակայն, եթե սա համապետական խնդիր է, ապա Ճամբարակում գտնվող դպրոցների վատ վիճակի համար արդարացումներ չկան:
Քաղաքացի Անահիտ Մելքումյանը դժգոհ է Ճամբարակի 4 հանրակրթական դպրոցների վիճակից: 4-րդ դպրոցը չունի ջեռուցման համակարգ, հատակը հին է ու փլված, իսկ որոշ մասերում նույնիսկ պատուհաններ չկան: Երիտասարդության շրջանում ամենատարածված դժգոհությունները ժամանցի վայրերի բացակայությունն է: Ճամբարակի բնակիչներ Թամարա Արամյանը եւ Պավել Ղազարյանը նշեցին, որ իրենց քաղաքում չկան խաղահրապարակներ, մարզասրահներ:
Ճամբարակում երկար տարիներ խնդրահարույց է խմելու ջուրը եւ այդ հարցը ամբողջովին լուծվել: Ինչպես մեզ հետ զրույցում նշեց ներկայիս համայնքապետ Յուրիկ Ավալյանը, վերջին 3 տարիներին լուրջ աշխատանքներ են կատարվել ջրային ցանցը փոխելու համար, մոտավորապես 500-600 հազար եվրո է ներդրվել եւ առանձին թաղամասեր են մնացել, որտեղ դեռեւս ջուրը խնդիր է համարվում:
Չնայած նրան, որ քաղաքացիներ Անահիտ Մելքումյանը, Սուսաննա Եսայանը, Պավել Ղազարյանը դժգոհում են, որ Ճամբարակում չկան աշխատատեղեր, այնտեղ 2002 թ·-ից սկսած գործում են 4 մանր արդյունաբերական, 2 շինարարական, 3 տրանսպորտային, 8 ծառայություններ մատուցող, 25 մանրածախ առեւտրի գործող օբյեկտներ (թվերը փոփոխական են): Քաղաքում գործում են հանրապետական գործադիր մարմինների տարածքային ծառայություններ՝ «Ճամբարակի առողջության կենտրոն» ՓԲԸ, «Հայ Փոստ» ՓԲԸ, «Արմենտել» ՓԲԸ, VIVAcell MTS ընկերությունը եւ այլն: Սակայն, ինչպես պարզ է դառնում, այս ամենը բավարար չէ
քաղաքի բնակիչներին աշխատանքով ապահովելու համար: Այդ է վկայում այն, որ ՀՀ-ում միգրացիոն ցուցանիշներով առաջատար է համարվում Գեղարքունիքի մարզը:
Ի դեպ, Ճամբարակ քաղաքի պաշտոնական կայքէջն այժմ չի գործում, իսկ 2016 թ·-ի ընթացքում հրապարակումներ չեն եղել: Վերջին հրապարակումը քաղաքապետի Ամանորի ու Սուրբ Ծննդյան տոների շնորհավորանքն էր ճամբարակցիներին:
Քաղաքացիները նախընտրական քարոզչության դեպքեր ընդհանրապես չէին նկատել (բուկլետներ, նախընտրական ծրագրի հրապարակում): Պրն Ավալյանը պատասխանեց, որ մրցակից չունի եւ դրա կարիքը չկա, սակայն հարկ ենք համարում նշել, որ քարոզարշավն արդեն մեկ շաբաթից ավելի սկսվել է, իսկ մրցակից թեկնածուն ինքնաբացարկ է հայտարարել: Այս ամենը փաստում է, որ միակ թեկնածուն արդեն իրեն հաղթող է համարում եւ նախընտրական քարոզարշավի կարիքն ընդհանրապես չի զգում:
Համայնքապետի թեկնածու Յուրիկ Ավալյանից փորձեցինք պարզել, թե ինչպես է պատկերացնում քաղաքի բարգավաճումն ու խնդիրների լուծումը:
Մեզ հետ զրույցում պրն Ավալյանը նշեց, որ արդեն 11 տարի է, ինչ աշխատում է, որպես քաղաքապետ եւ բնակիչները կարող են փաստել իր կատարած աշխատանքների մասին: Հիշեցնելով վերոնշյալ խնդիրների մասին, քաղաքապետը նշեց, որ բացի ջրային ցանցի նորոգումից, մեծ ծավալի աշխատանք է կատարվում Կառավարության աջակցությամբ եւ հարցերն ամբողջովին լուծման փուլում են: Կենտրոնական փողոցները վերանորոգելու համար հատկացվել է 100 մլն դրամ, մանկապարտեզի շենքը հիմնովին վերանորոգելու համար՝ 160 մլն դրամ:
Լեւոն Հարությունյան
Լուսանկարը` Ճամբարակի պաշտոնական կայքից
Մեկնաբանել