Հայաստանը Վրաստանին է փոխանցել 9 բեզոարյան այծ. փոխարենը կստանա կովկասյան ազնվացեղ եղջերուներ
Հայաստանը Հարավային Կովկասի տարածաշրջանում անհետացման եզրին գտնվող երկու կենդանատեսակների՝ բեզոարյան այծի և կովկասյան ազնվացեղ եղջերուի փոխանակման ծրագրով Վրաստանին է փոխանցել բեզոարյան այծի 9 առանձնյակ: Երկրորդ փուլով նախատեսվում է մինչև տարեվերջ կովկասյան ազնվացեղ եղջերուների տեղափոխումը Հայաստան:
Վրաստանի նորանշանակ դեսպան Գեորգի Սագանելիձեի հետ հանդիպմանը Հայաստանի բնապահպանության նախարար Արամայիս Գրիգորյանը հայտնել է, որ «Դիլիջան» ազգային պարկում արդեն իսկ պատրաստ են եղջերուների համար նախատեսված ազատավանդակները և անհրաժեշտ բոլոր պայմանները: Դեսպան Սագանելիձեն իր հերթին խոստացել է նպաստել ծրագրի երկրորդ փուլի իրականացմանը սեղմ ժամկետներում:
Բնապահպանության նախարարությունը հայտնում է, որ հանդիպման ընթացքում նախարարն ու դեսպանը քննարկել են Հայաստանի և Վրաստանի հանրապետությունների կողﬕց վավերացված բնապահպանական կոնվենցիաների շրջանակներում ստանձնած պարտավորությունների կատարմանն ուղղված համատեղ ծրագրերը, ինչպես նաև բնապահպանության ոլորտում անդրսահմանային համագործակցության ամրապնդման հարցերը:
լուսանկարը` Երևանի կենդանաբանական այգու կայքից
Մեկնաբանել