Կապանի քաղաքապետ Աշոտ Հայրապետյանը պատասխանել է սեպտեմբերի 22-ին «Հետք»-ում հրապարակված «Կապանի քաղաքապետի ընտրությունները չափազանց թեժ են լինելու, կամ հանքի մեջ «սյունյաց ծուռ» մի փնտրեք» տեսակետին, որի հեղինակը Վարազ Սյունին է: Համայնքապետի պատասխանը ներկայացնում ենք նույնությամբ:

«Կայքը մինչ այժմ էլ բազմիցս իր կամ իր հեղինակների սուբյեկտիվ ընկալումներով անդրադարձել է Կապանին, այդ անդրադարձներին պատասխանել ենք ընդամենը մեկ անգամ, հետո՝ ձեռնպահ մնացել: Սակայն այժմ խոսքը վերաբերում  է ընտրական գործընթացի ընթացքում բուն քարոզարշավի շրջանում հրապարակված նյութին:

Չենք անդրադառնում կամ պատասխանում հոդվածում հնչած մտքերին, մեղադրանքներին, վերլուծություններին:

Հարցը հետեւյալն է. այն ներկայացված է «Տեսակետ» խորագրի ներքո: Հոդվածում ՀԵՏՔ-ի տեսակե՞տն է , թե՞ Վարազ Սյունու:

Եթե ՀԵՏՔ-ի տեսակետն է, ապա ի՞նչ սկզբունքով  եւ տրամաբանությամբ է լրատվամիջոցը քարոզարշավի ընթացքում հստակ հակաքարոզչություն անում կոնկրետ թեկնածուի օգտին եւ քարոզչություն՝ մեկ այլ թեկնածուի օգտին:

Եթե դա հեղինակի տեսակետն է, ապա կրկին ի՞նչ տրամաբանությամբ է ՀԵՏՔ-ը հրապարակում անհայտ՝ կեղծանունով  հեղինակի քարոզչություն եւ հակաքարոզչություն պարունակող հոդվածը, որը կողմնորոշում է ընտրազանգվածին, բայց որպես քարոզչական նյութ չի ներկայացված, ընդ որում՝ այնպիսի հեղինակի, որի քաղաքական եւ տնտեսական վերլուծութուններն անգամ բխում են ՀՀ օրենսդրությունից, հատկապես ՏԻՄ օրենքից անտեղյակությունից եւ մեղադրանքներ եւ առաջարկներ են արվում, որոնք ՀՀ- ում օրենսդրական դաշտի սահմաններում կիրառելի չեն:

Եվ եթե հոդվածագիրն այդքան ազնիվ է իր մղումներում, պետք է գոնե հստակորեն ասեր, թե կոնկրետ խնդիրներ թվարկելիս ո՞ւմ է մեղադրում. օրինակ, հիշեցնելով, որ 2013 թ. Կապանում բազմաբնակարան շենք կառուցված պիտի լիներ՝ երիտասարդ ընտանիքների համար, որի համար հիմնովին  քանդվել է քաղաքի «Փռի լիճ» կոչված հանգստյան գոտին, նա շեշտը դնում է 2013 թվականի վրա՝ մարդկանց ակամա հիշեցնելով իմ պաշտոնավարման շրջանը: Նա պետք է գոնե նշեր, թե իրականում ո՞ր քաղաքապետի օրոք եւ ո՞ր թվականին քանդվեց տարածքը եւ ում մեղքով տապալվեց այդ ծրագիրը...»:

Հ.Գ. Աշոտ Հայրապետյանի պատասխանին ավելացնենք, որ «Հետք»-նախընտրական քարոզչություն չի իրականցնում: Ընտրությունների վերաբերյալ լրագրողական հրապարակումներում ներկայացնում ենք բոլոր թեկնածուների տեսակետները, եթե նրանք հասանելի են լրագրողների համար և չեն հրաժարվում պատասխանել մեր հարցերին: Այս դեպքում կայքում հրապարակվել է ընթերցողներից մեկի` Վարազ Սյունու տեսակետը համայնքի խնդիրների վերաբերյալ: