Բուհերում կլաստերային աուդիտ կիրականացվի
«Մասնագիտական կրթության որակի ապահովման ազգային կենտրոն» հիմնադրամի (ՈԱԱԿ) տնօրեն Ռուբեն Թոփչյանը և ինստիտուցիոնալ հավատարմագրում ստացած բուհերի պրոռեկտորներն այսօր Կրթության և գիտության նախարարությունում հանդիպում են ունեցել ԿԳ նախարար Լևոն Մկրտչյանի հետ:
Համաձայն հաղորդագրության` հանդիպման նպատակն էր ներկայացնել բուհերում կլաստերային աուդիտ անցկացնելու համատեղ մշակված ծրագիրը: ՈԱԱԿ տնօրեն Ռուբեն Թոփչյանը նշել է, որ բուհերի հետ քննարկումների արդյունքում եզրակացրել են, որ մասնագիտական կրթական ծրագրերի քանակը մեծ է, և յուրաքանչյուր մասնագիտության կրթական ծրագրի առանձին հավատարմագրումը բուհերի համար մեծ ֆինանսական բեռ կդառնա: Ուստի առաջարկվում է նախ բուհերում կլաստերային սկզբունքով ծրագրային աուդիտ իրականացնել, որի արդյունքում բուհերը կպատրաստվեն ծրագրային հավատարմագրմանը, ինչպես նաև նույն կրթական ծրագրերն ունեցող բուհերի միջև համեմատության հնարավորություն կլինի:
Ռ. Թոփչյանի խոսքով` կլաստերային աուդիտը կխթանի մասնագիտությունների խոշորացմանը և հավատարմագրման ծախսերի կրճատմանը: Ըստ առաջարկվող ծրագրի` կլաստերային աուդիտը պարտադիր պետք է լինի բոլոր բուհերի համար: Յուրաքանչյուր կլաստերում ուսումնասիրություն կիրականացվի 4 չափանիշներով` մասնագիտության կրթական ծրագրեր, գնահատում, դասավանդում և ուսումնառություն, դասախոսական կազմ և ռեսուրսներ, որակի ապահովում:
ԵՊՀ պրոռեկտոր Ալեքսանդր Գրիգորյանը, կարևորելով հավատարմագրումը, նշել է, որ որակի հավաստման շրջափուլային գործընթացի արդյուքնում աստիճանաբար ասպարեզից դուրս կմնան անորակ բուհերն ու մասնագիտության կրթական ծրագրերը:
ԿԳ նախարար Լևոն Մկրտչյանը կարևորել է բարձրագույն կրթության որակի ապահովմանը և բուհական համակարգի զարգացմանը միտված գործողությունները: Նա նշել է, որ Համաշխարհային բանկի հետ քննարկմանն առաջարկել է հաջորդ վարկային տրանշն ուղղել բարձրագույն կրթությանը:
Լևոն Մկրտչյանն առաջարկել է ՈԱԱԿ-ի և բուհերի մշակած ծրագիրը գրավոր տեսքով նախարարություն ներկայացնել` ռեկտորների խորհրդում քննարկելու և կլաստերային աուդիտի իրականացման ուղղությամբ քայլեր ձեռնարկելու համար: ԿԳ նախարարը կարևորել է նաև ՈԱԱԿ առաջարկը, ըստ որի բուհերի համար ծրագրային հավատարմագրման որոշակի պարտադիր տոկոս պետք է սահմանվի յուրաքանչյուր տարվա համար: Նախարարը բուհերին առաջարկել է արդեն իսկ սկսել մշակել ծրագրային աուդիտին հաջորդող ծրագրային հավատարմագրման ճանապարհային քարտեզը:
Մեկնաբանել