Երկուշաբթի, 24 սեպտեմբերի

«Եթե այդ մեքենաներից մեկը պատկանում է իմ հիմնած ընկերությանը, դա դեռևս չի նշանակում, որ այդտեղ որևէ անօրինական բան կարելի է տեսնել»



«Հետքի» հարցերին պատասխանել է Կապանի քաղաքապետ Աշոտ Հայրապետյանը

Այսօր նախընտրական փուլի վերջին օրն է: Հոկտեմբերի 2-ին Կապանում տեղի են ունենալու քաղաքապետի և ավագանու ընտրություններ: Քաղաքապետի թեկնածություն են առաջադրել գործող, ՀՀԿ-ական քաղաքապետ Աշոտ Հայրապետյանը, դաշնակցական Արտուր Աթայանը (2008-2012թթ. եղել է Կապանի քաղաքապետ) և ԲՀԿ-ական Արթուր Մարտիրոսյանը:

- Պարոն Հայրապետյանինչո՞ւ որոշեցիք կրկին առաջադրել Ձեր թեկնածությունը քաղաքապետի ընտրություններին:

- Որոշեցի առաջադրվել, որպեսզի աշխատանք չունեցող մարդիկ չփորձեն համայնքի հաշվին սեփական բարեկեցություն ապահովել:

- Այսինքն՝ եթե այլ թեկնածու ընտրվի, չի կարո՞ղ  աշխատանքով ապահովել քաղաքացիներին:

- Ես քաղաքացիներին աշխատանքով ապահովելը նկատի չունեի, այլ այն, որ Ձեր ասած թեկնածուները մնացել են առանց աշխատանքի և համարում են, որ միակ աշխատանքը, որ արժե ունենալ և ապահովել իրենց սեփական բարեկեցությունը, քաղաքապետ լինելն է:

- 2012թ. քաղաքապետի ընտրություններից մեկ շաբաթ առաջ դաշնակցական Արտուր Աթայանը ինքնաբացարկի դիմում է ներկայացրել՝ ասելով, որ ճնշումներ կան իր շրջապատի մարդկանց վրա: Այն ժամանակ չարձագանքեցիք: Հիմա եթե հետահայաց նայեք, ի՞նչ գնահատական կտաք: Արդյունքում մնացիք միայնակ քաղաքապետի ընտրություններին:

- Արտուր Աթայանի հայտարարությունն ինքնաբացարկի վերաբերյալ քաղաքական գովազդի համար տրամադրված ժամին ինքն անձամբ հերքել է: Հերքել է նաև մամուլում, ասել է, որ նման բան չի եղել, ինչպես նաև ոստիկանությունում գրավոր բացատրություն է տվել, որ այդ հայտարարության հետ որևէ կապ չունի: Դրանից հետո մեզ ընդամենը մնում էր հետընտրական շրջանում մեղմել տարածված լուրերի ազդեցությունը, այսինքն՝ չարձագանքել:

- Այսինքն՝ այդ էջը թերթե՞լ եք:

-Ես այն ժամանակ թերթեցի, եթե Արտուր Աթայանն ասել է, որ իրեն ճնշել են, հասկանանք՝ ովքե՞ր են ճնշել, ինչի՞ համար են ճնշել, և այդ ճնշողներն արդյոք նույն մարդիկ չեն, ովքեր կան հիմա, և այս դեպքում արդյոք չկան ճնշումներ, վախը հօ՞դս ցնդեց, և այլևս անվախ դարձա՞վ:

- Երկու թեկնածուները, կարծես, թույլ չեն: Նրանց համարո՞ւմ եք մրցակիցներ:

-Ցանկացած մարդու էլ համարում եմ մրցակից, ինչի՞ մասին է խոսքը, հո ինքս ինձնով զարմացած չեմ:

- 2012թ. Ձեզ աջակցում էին Սյունիքի մարզպետն ու Մաքսիմ Հակոբյանը: Այս տարի ևս Սյունիքի մարզպետն աջակցում է Ձեզ: Ի՞նչ եք կարծում՝ Ձեր հնարավորություններն ընտրվելու համար ավելի քի՞չ էին լինելու, եթե նա չաջակցեր Ձեզ:

-Նախ ինձ աջակցում են իմ համաքաղաքացիները, ընտրության են մասնակցում իմ համաքաղաքացիները: Ինչ վերաբերում է Ձեր նշած մարդկանց աջակցությանը, կարող եմ թվարկել մարդկանց անուններ, ովքեր աջակցում են իմ մրցակիցներին: Դա ի՞նչ է նշանակում՝ ըստ Ձեզ: Այդ մարդիկ իրավունք չունե՞ն աջակցելու: Այդ դեպքում նույն Մաքսիմ Հակոբյանը 2008թ-ի ընտրություններին աջակցում էր Արտուր Աթայանին:

- Իսկ ինչո՞ւ 2012-ին Ձեզ աջակցեց:

- Կարծեմ, Մաքսիմ Հակոբյանն իր խոսքի մեջ հստակ պատասխան է տվել այդ հարցին, որ հիասթափված է այդ մարդուց, ավելին ի՞նչ պիտի ասեմ: Չգիտեմ, բառացի ինչպես հնչեց խոսքս, համենայն դեպս, բոլորի համար հասկանալի է ասածս:

-Պետական հիմնարկի աշխատակիցները հրահանգավորված են Ձեր օգտին քվեարկելու համարԱյս մասին հայտարարել էր նաև Դաշնակցության թեկնածուն մեկ շաբաթ առաջ:

- Այդ մասին հայտարարեց միայն Դաշնակցության թեկնածուն:

- Ոչ միայն, կապանցիներն էլ են խոսում այդ մասին: Մանկավարժներին եք հավաքել:

-Մեկի անունը նշեք:

- Օրինակ, այդ մասին մեզ հետ զրույցում նշեց Արմեն Փարսադանյանը:

- Արմեն Փարսադանյանը, եթե չեմ սխալվում, հասարակական կազմակերպություն է ղեկավարում, որն սկսում և ավարտվում է հենց իրենով:

- Դա կապ չունի, նա կապանցի է:

- Այո, նա կապանցի է, բայց հասարակական կազմակերպության ներկայացուցիչն իրեն պիտի թույլ չտար քաղաքական վերլուծություններ աներ:

-Պարոն Հայրապետյան, նախևառաջ ինքը Հայաստանի Հանրապետության քաղաքացի է և

-Իհարկե: Ինքը վերլուծություն է անում, որն իրեն հասու չէ: Ի՞նչ է նշանակում, եթե քաղաքապետարանը (իր խոսքերը  ոչ բառացի եմ մեջբերում) ցանկանար մի փոքր փակագծերը բացեր, ավելի մեծ պատկերացում ունենայինք նշված խնդիրների վերաբերյալ: Ավելին ինչպե՞ս բացել, եթե ինչի մասին խոսքը գնում է, համայնքային բյուջեի հոդվածներում արտահայտված են և մեր պաշտոնական կայքէջում բոլոր մանրամասները եղել են: Եվ միշտ էլ ցանկացած կարևոր հարցի վերաբերյալ հանրային լսումներ են եղել, որոնց մասնակից է եղել Ձեր ասած Արմեն Փարսադանյանը: Փարսադանյանը թող էներգիայի թանկացման բողոքների, ցույցերի  ժամանակ իրեն թույլ չտար դեռահասների ձեռքին  պլակատներ դնել ու բերել-հասցնել այգի:

- Պարոն Հայրապետյան, իսկ ի՞նչ կասեք այն մասին, որ Ձեր ընկերությունը ավտոմեքենաներ է վարձակալությամբ տրամադրում քաղաքապետարանին, եվրապատուհան ու եվրադուռ արտադրող Ձեր ընկերությունը պայմանագրեր է կնքում  պետական հիմնարկների հետ: Դուք, կարծեմ, չեք ժխտել, որ Ձեր ընկերությունն ավտոմեքենաներ է վարձակալությամբ տալիս քաղաքապետարանին:

- Չեմ ժխտել, դա օրենքի սահմաններում է, և այդ ամենը նույնպես հասանելի է մեր կայքէջում թե՛ մեր համաքաղաքացիներին, թե՛ ցանկացածին: Մենք օրենքի սահմաններում կազմակերպում ենք մրցույթ և վարձակալում տրանսպորտային միջոցներ քաղաքապետարանի ենթակա կառույցների նպատակների համար: Եվ եթե այդ մեքենաներից մեկը պատկանում է իմ հիմնած ընկերությանը, դա դեռևս չի նշանակում, որ այդտեղ որևէ անօրինական բան կարելի է տեսնել:

- Դա շահերի բախում է:

- Ըստ Ձեզ՝ շահերի բախո՞ւմ է:

-Այո, օրենքով շահերի բախում է:

-Դուք սխալվում եք, եթե օրենքին տիրապետում եք,  չեք կարող նման բան ասել:

- Այսինքն՝ Դուք բացառում եք, որ դա շահերի բախում է, պաշտոնեական դիրքի չարաշահում:

- Ոչ էլ պաշտոնեական դիրքի չարաշահում է: Եթե մրցույթի մասնակից ցանկացած ֆիզիկական անձ կամ ընկերություն կարող է ներկայացնել իր տրանսպորտային միջոցը ներկայացված տեխնիկական բնութագրերի համաձայն և վարձակալությամբ տրամադրել իր տրանսպորտային միջոցը քաղաքապետարանին կամ նրա ենթակա կառույցին, ինչի՞ մասին է խոսքը:

- Իսկ ամսական ինչքա՞ն գումար է տրամադրվում քաղաքապետարանի կողմից Ձեր ընկերությանը: Կնշե՞ք նաև, թե քանի մեքենա է, և յուրաքանչյուրի համար որքան գումար է տրամադրվում:

- Քաղաքապետարանն իր կարիքների համար վարձակալել է երկու մեքենա, որից մեկի համար վճարում է մոտ 225 հազար դրամ, մյուսի համար՝ մոտ 285 հազար դրամ: Դա առանց պահումների է, այսինքն՝ ամբողջ գումարն է:

- Արդեն 10-րդ տարին է՝ ՀՀԿ անդամ եք:  Ո՞րն է Հանրապետական կուսակցությանն անդամակցելու շարժառիթը:

- Ի՞նչ է նշանակում՝ ո՞րն է շարժառիթը:

-Այսինքն՝ ինչո՞ւ եք որոշել անդամակցել ՀՀԿ-ին 10 տարի առաջ:

- Եթե 10 տարի առաջ որոշել եմ Հանրապետական կուսակցությանն անդամակցել, ուրեմն, այդպես եմ որոշել:

- Նկատի ունեմ գաղափարախոսությունը, կամ, օրինակ, երեք ի՞նչ կետեր կառանձնացնեիք:

- Երեք կետ չեմ առանձնացնի և ոչ էլ կուզեմ խոսել գաղափարախոսության մասին, ոչ էլ կցանկանամ առանձնանցել կարևոր բաներ դրա հետ կապված: Իմ անդամակցությունը, ինքներդ նշեցիք, 10 տարի առաջ էր, և իմ քաղաքապետության հետ առնչություն չի ունեցել:

-Եթե չվերընտրվեք, կշնորհավորե՞ք ընտրված թեկնածունին:

- Կշնորհավորեմ իմ համաքաղաքացիներին:

- Այսինքն՝ չեք շնորհավորի ընտրված թեկնածուին:

- Բա ես ի՞նչ եմ ասում, ասում եմ՝ կշնորհավորեմ իմ համաքաղաքացիներին: Դա չի՞ նշանակում, որ կշնորհավորեմ նաև իմ  մրցակիցներից ով ընտրվի:

- Դուք հոգնակիով եք ասել, ոչ անվանական:

- Դա իմ քաղաքի բնակչության ընտրությունն է:

- Քաղաքապետ լինելու 4 տարիներին Ձեր ձեռքբերումներից 3 կարևորագույն կետեր կառանձնացնե՞ք:

-Չէի ուզենա կարևորության տեսակետից 3 կետ առանձնացնեի, մեկը հենց այն, որ 15-20 րոպե է խոսում եք ինձ հետ:

-Դա ձեռքբերո՞ւմ է:

-Նաև:

- Ձեր ձեռբքերումների մասին է խոսքը:

- Ի՞մ ձեռքբերումը... Իմ ձեռքբերումն առաջին հերթին իմ քաղաքացիների վստահությունն է:

Լուսանկարը՝ Աշոտ Հայրապետյանի ֆեյսբուքյան էջից


Գլխավոր էջ



Մեկնաբանություններ (4)
1. Վարազ Սյունի (Ամստերդամ)19:23 - 30 սեպտեմբերի, 2016
Ուրեմն՝ ըստ Աշոտ Հայրապետյանի՝ «հասարակական կազմակերպության ներկայացուցիչն իրեն պիտի թույլ չտար քաղաքական վերլուծություններ աներ»: Տեր աստված,աչքերիս հավատա՞մ: Քաղաքական վերլուծություն անելու վրա «պատենտ» կա՞: Սովորական «պոլիտեխնիկ» ավարտած ու քաղաքականապես անփորձ մի մարդուց այսպիսի՛ պատասխաններ ստանալը,ցավոք, արդեն զարմանալի չէ: Կապանի հհկ-ական այս քաղաքապետը կոնկրե՛տ պատասխաններ չի տալիս. դա ի՛ր ձևն է. փիլիսոփայելով կարևոր հարցերին պատասխանելուց խուսափել:
2. Վարազ Սյունի (Ամստերդամ)19:25 - 30 սեպտեմբերի, 2016
Աշոտ Հայրապետյանը քաղաքապետ լինելու 4 տարիներին ԵԹԵ 3 (կամ գոնե 1) ձեռքբերում ունենար,ապա ՕՐ ու ԳԻՇԵՐ դրա մասին կխոսեր.հավատացեք: Եթե մարդը դա չունի, ի՞նչ պատասխան տա: Իր քաղաքապետ լինելու տարիների (2012-2016 թթ.) «ձեռքբերումների » մասին մանրամասն արդեն գրել եմ «Հետքում» սեպտեմբերի 22-ին տպագրված իմ հոդվածում. չեմ կրկնում: Միայն մի բան եմ ցանկանում ավելացնել. Լիսկան՝ Աշոտ Հայրապետյանի հետ միասին,ամբողջ Կապանով (քարոզ)արշավ է անում՝ վերջինիս օգտին: Լիսկան՝ ամբո՛ղջ ազգի կողմից չսիրվա՛ծ թիվ 1 անձը: Փաստն արդեն,որ Լիսկա՛ն է իր հետ ու իր համար պայքարում,արդեն ԱՄԵՆ ԻՆՉ է ասում:
3. Հայկո10:47 - 4 հոկտեմբերի, 2016
այո այո
4. Հովո10:49 - 4 հոկտեմբերի, 2016
ինչպես ուռին ու բարդին,ամեն մարդ իրա դարդին
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ