HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Նարեկ Ալեքսանյան

Տան պատերը ճերմակ լինեին, որ երեխաներս մանկությունը լուսավոր հիշեն

Մուժիկյանների ընտանիքն ապրում է Գեղարքունիքի մարզի Ճամբարակ քաղաքում։ Երկհարկանի վթարային շենքը, որում գտնվում է նրանց տունը, քաղաքի ամենահին շինություններից է, կարկուտի հետևանքով տանիքը վնասվել է, անձրևաջրերի կուտակումից պատերը գրեթե միշտ խոնավ են։

Արշակն ու Ալյոնան

Գագիկն ու Մարինեն 4 երեխա ունեն՝ Էդգարը, Էդիտան, Ալյոնան ու Արշակը։ Ընտանիքում ամեն մեկն իր երազանքն ունի։ Ամենափոքրը՝ 6 տարեկան Արշակը, նոր հեծանիվ է ուզում ունենալ, հինը կոտրված է, ծնողները ցանկանում են ավարտել տան վերանորոգումը։ Մարինեն մեկ տարի է գործազուրկ է, աշխատանք է փնտրում։ Գագիկը կոյուղագործ է, ստանում է 70 հազար դրամ աշխատավարձ։ Երեխաների նպաստը 40 հազար է։

Գագիկն ու Արշակը

Շենքի բակում Մուժիկյանները փոքրիկ հավաբուն ունեն, որտեղ հավ ու սագ են պահում։

- Հիմա մի քիչ ցեխոտ են, սիրուն չեն, բայց որ դուրս են գալիս լողանալու, անցնող-դառնողը կանգում նայում է, հարևանները սիրում եմ մեր սագերին, ափսոս կզաքիսը սաղին կերավ, էսքանը մնացին,- ասում է Գագիկը։

Հավաբնի մի մասն առանց տանիք է, նաև այդ պատճառով է, որ սագերը քիչ են․ հավերի հետ փոքր խցում չեն տեղավորվում ձմռանը։

Ալյոնան գերազանցությամբ ավարտել է գեղարվեստի դպրոցը

- Անասուն ունենանք, բարեկամի գոմում էլ կպահենք, չեն մերժի, կօգնեն, բայց 70 հազարով անասուն որտեղի ՞ց առնենք,- ասում է Մարինեն,- գումարը հազիվ հերիքում է սննդին, գազին, լույսին, երեխաների հագուստը պարտքով ենք վերցնում, էստեղի խանութներում մեզ ճանաչում են, տալիս են։

Մուժիկյանները մոտ 2 միլիոն դրամի վարկ են ունեցեկ, որից 900 հազարն արդեն մարել են՝ ամսական վճարելով 100 հազար դրամ։

- Կուզեի մեր տան պատերը ճերմակ լինեին, որ երեխաներս մեծանան, իրենց մանկությունը լուսավոր հիշեն,- ասում է Մարինեն։

Արշակի կոտրված հեծանիվը

Ալյոնան ցույց է տալիս նկարչության դիպլոմները

Տան միջով ձգվող էքստրեմալ աստիճանները երեխաներն արդեն ճարպկորեն են բարձրանում 

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter