Պատրաստ սպասում եմ Սլավոնական համալսարանի դասախոսներին
Մհեր Ենոքյան
«Հետքի» թղթակիցը «Նուբարաշեն» բանտից
Մեքենայով քաղաքից դուրս ենք գնում, անցնում ենք Սովետաշենի գերեզմանների մոտով: Երևի 6 -7 տարեկան եմ, մեքենայի հետևում նստած` երեսս կպցրել եմ պատուհանին, նայում եմ դեպի ամայի տարածություն: Մեկ էլ բլուրներից մեկի արանքից ինչ-որ կլորավուն շենք տեսա:
- Պա՛պ, էս ի՞նչ ա: Հայրս շարունակում է վարել մեքենան, մայրս, մի փոքր մտածելուց հետո, ասում է.
- Բանտ: - Էդ ի՞նչ ա, - զարմացած հարցնում եմ ես. առաջին անգամ էի նման բառ լսում:
Ծնողներս գիտեին, որ չեմ հանձնվի, մինչև ամեն ինչ չպարզեմ:
- Տեղ, որտեղ մարդկանց են պահում - վերջապես ասում է մայրս:
Հաջորդ հարցս չի ուշանում:
- Ինչի՞ համար են պահում, - մտածեցի, որ հիվանդանոցի տիպի ինչ-որ հիմնարկ է:
- Օրենքներ խախտելու, - ասես կանխատեսելով, որ ամեն պատասխան էլ մի նոր հարց է առաջացնելու, հայրս վերջակետ է դնում,- երբ մեծանաս, մնացած հարցերիդ պատասխանները կիմանաս:
- Մա՛մ, բա էդ մարդիկ տուն չե՞ն գնում,- մի փոքր վախենալով, որ հայրս կարող է բարկանալ, այնուամենայնիվ հարցրեցի ես:
- Չէ՛, նրանց դռների հետևում` փակի տակ են պահում՝ վանդակում:
- Բա ինչի՞ չեն փախնում, - անկեղծ զարմանալով ու բարկանալով հարցրեցի ես, - քանի որ նույնիսկ մեր տան երկու` կանաչ ու կապույտ թութակներին ամեն օր վանդակի միջից բաց էի թողնում, որ ազատ թռչեն տան մեջ:
Մտքերը հանգիստ չէին տալիս ինձ, երևակայությունս տարբեր պատկերներ էր բերում աչքիս առաջ: «Լա՛վ,- մտածում էի,- էն մարդիկ, որ բանտում են, մի՞թե ելք չունեն…»:
Տարիներ անց ինքս հայտնվեցի այդ տարօրինակ կլոր շենքում և հենց այդտեղ էլ իմ առաջին գրքում գրեցի. «Երևանի ծայրամասերից մեկում կա գերեզմանոց, աղբանոց և ևս մի կլորավուն տեսքով յուրահատուկ գերեզման: Հարազատները ծաղիկների փոխարեն այստեղ սնունդ ու հագուստ են բերում»:
Ասես ճակատագրի հեգնանք լինի այս ամենը, և ես պարտավոր եմ գտնել ելքը… Երկու օր առաջ վերջացրեցի մի պատմվածք, որը, կարծում եմ, կարևոր հարցերի պարզաբանում է տալիս կապված իմ տարօրինակ ճակատագրի հետ… Հուսով եմ, որ մինչև տարվա վերջ լույս կտեսնի պատմվածքների և վավերապատումների ժողովածուն, որը արդեն վերնագրել եմ «Զգացմունքների պետություն»:
Այս տարվա ընթացքում և՛ թարգմանություններ եմ կատարել, և՛ շարունակել եմ ուսումս ու աշխատանքս: Երեք գրքերիս բոլոր օրինակներն էլ սպառվել են վաղուց, ես էլ խոստացել եմ, որ հաջորդ գիրքը նվիրելու եմ Սողոմոնին: Գրիքի սկզբում գրել եմ. «Այս գիրքը նվիրում եմ իմ ընկերոջը՝ Արցախյան պատերազմի մասնակից, հետախույզ 20 տարի բանտում տառապած անարդարություն վերապրած ՍՈՂՈՄՈՆ ՔՈՉԱՐՅԱՆԻՆ, ով պատգամել է ինձ գրչով ու մտքով պայքարել անրարդարության դեմ»:
Պատրաստելով ցմահ ազատազրկման թեմայով կուրսային աշխատանքս` իմացա, որ Եվրոպական դատարանում անմարդկային վերաբերմունքի և պատժի հետ կապված բողոքները հիմնավորելը բավական դժվար է: Մի կողմից բանտարկյալները պարզապես խուսափում են բարձրաձայնել բանտային պայմանների մասին, մյուս կողմից էլ՝ հարց է առաջանում` ինչպե՞ս ապացուցել անմարդկային վերաբերմունքը կամ Կոնվենցիայի 3-րդ հոդվածի խախտումը:
Մի հետաքրքիր դեպքի մասին կարդացի, որը տեղի է ունեցել Ռուսաստանում: Ելնելով նրանից, որ ՄԻԵԴ-ը չի կարող ընդունելի համարել դատապարտյալի կողմից անօրեն կատարված պայմանների տեսանկարահանումը, Ռուսաստանում մի բանտարկյալ ԵԴ-ին գրված իր գանգատի թերթերի վրա ճզմել է խցում վխտացող միջատներին և գրել՝ այլ կերպ չի կարող ապացուցել անմարդկային պայմանները: Եվ գիտեք ի՞նչ` այդ տղան հաղթել է գործը` ճանաչվել է նրա իրավունքների խախտումը Կոնվենցիայի 3-րդ հոդվածով:
Իսկ հիմա քննություններին ու ստուգարքներին պատրաստ՝ սպասում եմ, որ Սլավոնական համալսարանի դասախոսներն այցելեն բանտ, հանձնեմ 4-րդ կուրսի քննություններն ու ստուգարքները: Առաջին քննությունը լինելու է «Միջազգային մասնավոր իրավունք» առարկայից, որը շատ սիրեցի:
Մեկնաբանել