ՀԱԿ խմբակցության պատգամավոր Արամ Մանուկյանը կարծում է, որ վարչապետի «ստարտը» հուսադրող է, հատկապես՝ ամենակոռումպացված դեմքերից ազատվելու մասով, սակայն շեշտում է, որ վարչապետը դժվար սկիզբ կունենա, եթե բարձրացված նշաձողը չկարողանա պահել:

«Հույսը այսօր կենսական պահանջ է։ Մարդիկ ուզում են հույսով լինեն։ Այդ առումով` լավ է, բայց հուսահատությունը շատ ավելի վատ է, երբ այն բերում է  ձախորդությունների։ Իսկ հուսահատության և ձախողման ռեալ վտանգ կա, որովհետև այն պլատֆորմը, այն բազան, որից դուք սկսել եք, շատ խախուտ է, շատ վատն է, շատ անհուսալի է։ Ձեր ծրագրերի և ելույթի թերություններից մեկն էլ դա է, որ դուք չեք արել SWOT անալիզ»,-նշում է Մանուկյանը։

Պատգամավորը, ծանոթանալով վարչապետի ծրագրին, նկատել է, որ դրանում բացակայում է այն բազան, որում այսօր Հայաստանի տնտեսությունը գտնվում է։ Մասնավորապես, առանձնացնում է  կապիտալի արագ, ապօրինի արտահոսքը (նշելով տարեկան 1,5-1,8 մլդ դոլարը)։ Նաև Կարապետյանին հորդորում է ուսումնասիրել, թե Հայաստանից որքան բիզնես է  «դուրս գալիս» դեպի Ռուսաստանի Դաշնություն և Վրաստան։

Անդրադառնալով մակրոտնտեսական ցուցանիշներին՝ Արամ Մանուկյանն ընդգծում է վերջին ութ տարիների Հայաստանի պետական պարտքի քառապատիկ ավելացումը՝ այն համարելով աննախադեպ մեծացում, որը ՀՆԱ-ի նկատմամբ 40 %-ից իջել է 20-21 %-ի։

Վերջին չորս տարիների արտաքին ուղղակի ներդրումների յոթանգամյա նվազումը պատգամավորը համարում է կոլապս, ձախողում` որպես դրա արդյունք  դիտարկելով այն հանգամանքը, որ Հայաստանը ներդրումների համար գրավիչ չէ, և սա է այն մարտահրավերը, որը վարչապետը պետք է SWOT անալիզի ենթարկեր։

«Ձեր ծրագրից մի քիչ կոմունիզմի հոտ է գալիս»,- ասում է Մանուկյանը։ Պատգամավորն այս որակումը հիմավորում է ծրագրում ներկայացված՝ պետծառայողի, մաքսային և հարկային ծառայողների կերպարի արմատական վերափոխման մասին դրույթներով։

«Ձեր ամենամեծ մարտահրավերն այն է, որ պակասում է մարդը։ Ցանկացած սիրուն, գրագետ, SWOT ծրագիր չի կարող աշխատել, եթե չկա դրա թիրախը։ Եվ այս վիճակում մարդը Հայաստանում թուլանում է։ Թուլանում է գնողունակությամբ, այսինքն՝ նա չի նպաստում արտադրության զարգացմանը։ Դրա արդյունքում կոլապս է լինելու, առաջինը` էներգետիկ համակարգում»։

Խմբակցության պատգամավորը վարչապետին  խորհուրդ է տալիս ուշադիր լինել։ Ասում է՝ նրան նախորդող երկու վարչապետները ձախողվել են սեփական թիմի պատճառով, քանի որ այդ թիմը խաղի կանոնները ընթացքում փոխել է՝ սկսելով իր անհատական խնդիրները լուծել։