«Շիրակ կենտրոնը» սկսել է անօթևան ընտանիքներին ձմռան վառելափայտի բաժանման ծրագիրը
«Շիրակ կենտրոնը» սկսել է տնակային ավաններում բնակվող ընտանիքների համար վառելափայտի տրամադրման ամենամյա բարեգործական ծրագիրը:
Կենտրոնը հայտնում է, որ գործընկերներն ու հովանավորները արդեն սկսել են աջակցություն ցուցաբերել բարեգործական ձեռնարկին, իսկ ՀՀ կառավարության բարեգործական հանձնաժողովը այն ճանաչել է այն որպես բարեգործական ծրագիր:
«Ձմռան ամիսներին տնակային ավաններում բնակվող հարյուրավոր ընտանիքների համար վառելիքի հայթայթման վայրեր դառնում են հիմնականում աղբանոցներն ու քաղաքի ծայրամասային թփուտները: Վառարաններն են նետում ձեռքերն ընկած իրերը` պլաստիկ շշեր, թուղթ, հնամաշ շորեր և կոշիկներ, անվադողեր, ինչի պատճառով տնակային ավաններում ձմռան ամիսներին ծխնելույզներից թափվող ծխից կարելի է շնչահեղձ լինել»,- գրված է «Շիրակ կենտրոնի» տարածած հաղորդագրության մեջ:
Կենտրոնը հավելում է, որ թեև ամբողջ ամռան ընթացքում «Շիրակ կենտրոնը» տասնյակ քանդված դոմիկներից առաջացած զգալի քանակության փայտանյութը բաժանել է տնակներում բնակվող ընտանիքներին, սակայն գրեթե բոլոր ընտանիքները այն օգտագործել են ամռան ընթացքում՝ կերակուր և պահածոներ պատրաստելու նպատակով:
Այս տարի սոցիալապես անապահով ընտանիքներին վառելափայտի տրամադրման ամենամյա բարեգործական ձեռնարկը կրում է «Ձմռան վառելափայտ դոմիկներում բնակվող 1000 ընտանիքներին» խորագիրը:
Մեկնաբանել