Օգնություն կտրամադրվի ավտոբուսի վթարից տուժած և զոհված ՀՀ քաղաքացիներին և նրանց ընտանիքներին
Կառավարության այսօրվա նիստում որոշվել է դրամական օգնություն հատկացնել Հյուսիսային Օսեթիայիում` Բեսլան քաղաքից 6 կմ հեռավորության վրա տեղի ունեցած Մոսկվա-Երևան ուղևորափոխադրում իրականացնող ավտոբուսի վթարի հետևանքով զոհված քաղաքացիների ընտանիքներին և տուժած քաղաքացիներին:
Յուրաքանչյուր զոհվածի ընտանիքին կհատկացվի 1,5 մլն դրամ, Հայաստանի և Ռուսաստանի հիվանդանոցներում բուժումը շարունակող առավել ծանր յուրաքանչյուր վիրավորին` 700 հազ. դրամ, բժշկական օգնություն ստացած յուրաքանչյուր վիրավորին` 200 հազ. դրամ և նշված ավտոբուսի մյուս յուրաքանչյուր ուղևորին` 100 հազ. դրամ:
Այս նպատակով կառավարության պահուստային ֆոնդի հաշվին տրանսպորտի, կապի և տեղեկատվական տեխնոլոգիաների նախարարությանը կհատկացվի 10 մլն դրամ: Գումարները տուժածներին փոխանցելու համար Հայաստանի առևտրային բանկերում կբացվեն անվանական հաշիվներ:
Նախատեսվում է նաև ըստ պահանջի ապահովել Ռուսաստանի հիվանդանոցներում բուժումը շարունակող անձանց վերադարձը Հայաստանում` հոգալով տեղափոխման ծախսերը:
Մեկնաբանել