Կիրակի, 23 սեպտեմբերի

Ի՞նչ է կատարվում ավիացիայի հայկական շուկայում


Վերջին օրերին հայկական լրատվամիջոցները բուռն քննարկում են ռուսական «Pobeda» ավիաընկերության առաջիկա մուտքը Հայաստան: Ինչպես հայտնի է, ամսի 26-ին ՀՀ քաղավիացիայի գլխավոր վարչությունը հայտարարեց, որ նոյեմբերի վերջից «Pobeda»-ն շաբաթական 3 անգամ Մոսկվայի «Վնուկովո» օդանավակայանից թռչելու է Գյումրու «Շիրակ», որտեղից էլ՝ հետադարձ ուղղությամբ: Ավիատոմսերի գները սկսվելու են 10.000 դրամից (1325 ռուբլի), թռիչքները կատարվելու են ցերեկային ժամերին:

Այս նորության ամբողջական էությունը հասկանալու համար անհրաժեշտ է մի փոքր հետ գնալ ու տեսնել, թե, մասնավորապես, ռուսական փոխադրողները ինչպիսի վերադասավորումներ են կատարում հայկական շուկայում, եւ ինչով է զբաղված առայժմ միակ հայկական ավիափոխադրողը:

Ռուսական ընկերությունները ցանկանում են նոր չվերթներ բացել դեպի Հայաստան

Ըստ կարգի՝ տվյալ դեպքում ռուսական կողմը՝ «Ռոսավիացիան» համապատասխան փաստաթղթերի (հայտի) հիման վրա իր ավիաընկերություններին նշանակում է որեւէ ռուսական քաղաքից դեպի Հայաստան՝ Երեւան կամ Գյումրի, թռիչքներ կատարող (նույն ուղղությամբ կարող են լինել մի քանի փոխադրողներ), ինչի մասին իրազեկվում է հայկական կողմը, որը տալիս է թույլտվություն կոնկրետ ժամանակով (որոշակի դեպքերում հայտը կարող է մերժվել):

Սեպտեմբերի 2-ին հրապարակված հոդվածում ներկայացրել էինք այդ պահին դեպի Հայաստան թռչող արտասահմանյան ընկերություններին, դրանց չվերթները եւ հայկական փոխադրող «Արմենիայի» ուղղությունները: Այն ժամանակ դեպի մեր երկիր կանոնավոր թռիչքներ իրականացնելու իրավունք ուներ ռուսական 9 ընկերություն, որոնցից չեչենական «Grozny Avia»-ն այդպես էլ Հայաստան չեկավ: Նշված 9 ընկերություններին մեր երկիրը թույլատրել է կանոնավոր փոխադրումներ կատարել «Ամառ-2016» աերոնավիգացիոն սեզոնի ընթացքում (մարտ-հոկտեմբեր): Հիմա սրանց ավելանում է «Pobeda»-ն:

Տեսնենք, թե վերջին շրջանում Հայաստանի վերաբերյալ կանոնավոր թռիչքների ինչ թույլտվություններ է տրամադրել «Ռոսավիացիան» իր ընկերություններին: Սա կօգնի հասկանալու ռուսական փոխադրողների ցանկությունները հայկական շուկայի վերաբերյալ:  

Հուլիսի 27-ին «Pobeda»-ն իրավունք է ստացել Դոնի Ռոստով-Երեւան-Դոնի Ռոստով ուղղությամբ շաբաթական 3 չվերթ իրականացնել: Հայկական կողմից առայժմ պաշտոնական հաստատում չկա: Նույն օրը «Ural Airlines»-ին, որն իրավունք ունի Հայաստան գալ ռուսական 7 քաղաքներից, «Ռոսավիացիան» թույլատրել է Դոնի Ռոստովից ու Կրասնոդարից Երեւան ժամանել շաբաթական ոչ թե 5, այլ 7 անգամ: Սակայն «Զվարթնոց» օդանավակայանի կայքի տվյալներով՝ թռիչքներն ավելի քիչ են: Միաժամանակ, հիմք ընդունելով այն, որ որոշ ավիաընկերություններ հրաժարվել են իրենց տրված թույլտվություններից, «Ռոսավիացիան» հետ է կանչել դրանք: Դրանց թվում են, մասնավորապես, ռուսական գիգանտ «Aeroflot»-ի դուստր «Rossiya Airlines»-ին տրված Իրկուտսկ-Երեւան, Կրասնոդար-Երեւան, Մին. Վոդի-Երեւան ուղղությունները:

Օգոստոսի 26-ին «Ռոսավիացիան» թույլատրել է «Nordwind Airlines»-ին շաբաթական 7 անգամ Երեւան գալ Դոնի Ռոստովից ու Սամարայից: Հայկական կողմից նման թույլտվություններ պաշտոնապես ներկայացված չեն, եւ ընկերությունն առայժմ իրավունք ունի կատարել միայն Մոսկվա-Երեւան-Մոսկվա թռիչքներ, ինչն էլ անում է: «Rossiya Airlines»-ին էլ տրվել է շաբաթական 14 անգամ Մոսկվայից Երեւան թռչելու իրավունք: Բայց այս դեպքում էլ առկա չէ հայկական հաստատումը, եւ ընկերությունը ներկայում Երեւան է թռչում միայն Սոչիից ու Սանկտ Պետերբուրգից:       

Հոկտեմբերի 21-ին «Ռոսավիացիան» Հայաստան թռչելու հերթական թույլտվություններն է տվել ռուսական մի քանի ընկերությունների: Միանգամից ասենք, որ հայկական կողմը պաշտոնապես հայտարարել է միայն «Pobeda»-ի վերոնշյալ Մոսկվա-Գյումրի-Մոսկվա չվերթի մասին: Մյուսների մասին որեւէ նորություն, հաստատում չկա: Այդ թույլտվություններն են՝

«Nordwind Airlines»` Կրասնոդար-Երեւան-Կրասնոդար, Վոլգոգրադ-Երեւան-Վոլգոգրադ, Մին. Վոդի-Երեւան-Մին. Վոդի (բոլորն էլ՝ շաբաթական 7 անգամ),
«Ikar» (ապրանքանիշը՝ «Pegas Fly»)` վերը նշված նույն ուղղությունները եւ Ժուկովսկի-Երեւան-Ժուկովսկի չվերթը (բոլորն էլ՝ շաբաթական 7 անգամ),
«Pobeda»` Մոսկվա-Գյումրի-Մոսկվա (շաբաթական 7 անգամ, սակայն ՔԱԳՎ-ն հայտարարեց 3-անգամյա չվերթների մասին, այսինքն՝ պետք է ենթադրել, որ հայկական կողմը հենց այդքան է հաստատել հաճախականությունը),
«Izhavia»` Վոլգոգրադ-Երեւան-Վոլգոգրադ (շաբաթական 1 անգամ):

Հայաստան գալու թույլտվություն ունի (ռուսական կողմից) նաեւ «NordStar»-ը (Կրասնոյարսկից, Դոնի Ռոստովից, Ս. Պետերբուրգից, Սոչիից դեպի Երեւան եւ Մոսկվայից Գյումրի), սակայն հայկական կողմի թույլտվության մասին տեղեկություն չկա: Հոկտեմբերի 21-ին «Ռոսավիացիան» հետ է կանչել «Komiaviatrans»-ին տրված Սանկտ Պետերբուրգ-Գյումրի չվերթի թույլտվությունը, որից հրաժարվել է հենց ընկերությունը:

Փաստորեն, ռուսական փոխադրողների հայտերի ակտիվությունից կարող ենք եզրակացնել, որ ձմեռային աերոնավիգացիոն սեզոնում նրանք թիրախում են պահելու հայկական շուկան, այլ հարց է, թե որքանով այդ ծրագրերն իրականություն կդառնան, որովհետեւ փոխադրողների ռազմավարությունը շարունակական փոփոխությունների է ենթարկվում: 

Պարապուրդի մատնված «Շիրակի» աշխուժացումն առաջնահերթություն է

Նկատելի է, որ հայկական լիազոր մարմինը՝ տնտեսական զարգացման եւ ներդրումների նախարարությունը, շատ արագ թույլատրել է «Pobeda»-ին թռիչքներ կատարել դեպի Գյումրի: Չնայած նախարարության կայքում առայժմ չկա այս ընկերության անունը, ՔԱԳՎ-ի հաղորդագրությունը հենց դա է նշանակում: Ընդ որում՝ ՔԱԳՎ-ն դեպի Երեւան նոր թռիչքների պայմանավորվածությունների մասին չի հաղորդել:  

Կարեն Կարապետյանի նոր կառավարության ծրագրի մեջ (ընդունվել է հոկտեմբերի 18-ին) օդային տրանսպորտի վերաբերյալ նշվել է. «Ավիափոխադրումների շուկայի ծավալի եւ աշխարհագրության ընդլայնման եւ բյուջետային ավիաընկերությունների կողմից դեպի Գյումրու «Շիրակ» օդանավակայան չվերթների իրականացման նախադրյալների ստեղծում, ավիափոխադրողներին երթուղիների սպասարկման թույլտվությունների տրամադրման ընթացակարգերի պարզեցում՝ առցանց համակարգի ներդրման միջոցով»։  

ՏԵՂԵԿԱՆՔ- Գյումրու «Շիրակ» օդանավակայանը գործում է 1961-ից (IATA-ի կոդը՝ LWN, ICAO-ի կոդը՝ UDSG): Ներկայիս թռիչքուղին եւ օդանավակայանի շենքը կառուցվել են 1982-ին: Խորհրդային տարիներին «Շիրակը» Լենինականը կապում էր Երեւանին, Մոսկվային, Կիեւին, Լենինգրադին, Սիմֆերոպոլին, Միներալնիե Վոդիին, Բաքվին, Վոլգոգրադին, Կրասնոդարին, Նալչիկին, Դոնի Ռոստովին, Սուխումին, Գորկուն:

2007-ին օդանավակայանը նույն պայմանագրի շրջանակներում կոնցեսիոն կառավարման է հանձնվել արգենտինահայ գործարար Էդուարդո Էռնեկյանի ««Արմենիա» միջազգային օդանավակայաններ» ՓԲԸ-ին, որը 2002-ից 30 տարով ստանձնել էր «Զվարթնոց» օդանավակայանի կառավարումը:

2006, 2007 եւ 2013 թթ. աերոդրոմում կատարվել են վերանորոգման աշխատանքներ, ինչի շնորհիվ «Շիրակը» դարձել է Հայաստանի երկրորդ միջազգային օդանավակայանը: Այն կարող է ծառայել «Զվարթնոցի» պահեստային օդանավակայան, այսինքն՝ վատ եղանակային պայմանների դեպքում օդանավերը Երեւանից կարող են ուղարկվել Գյումրի: «Շիրակի» աերոդրոմը համատեղ բազավորման է, ինչը նշանակում է, որ այստեղ են բազավորվում թե քաղաքացիական, թե ռազմական (ՀՀ ռազմաօդային ուժերի) օդանավեր:

Այն, որ «Շիրակն» ուներ օր առաջ վերագործարկվելու (ՔԱԳՎ-ի պետ Սերգեյ Ավետիսյանի բնորոշումն է) խնդիր, փաստ է: Բավական է ասել, որ «Շիրակում» օգոստոս-սեպտեմբեր ամիսներին թռիչք-վայէջք չի եղել, մարդկանց ու բեռների փոխադրում չի կատարվել, այսինքն՝ օդանավակայանը պարապուրդի մեջ էր: Մեծ հաշվով նույն պատկերն է եղել նաեւ նախորդ ամիսներին: Ի՞նչ ասել, երբ օդանավակայանի լավագույն ցուցանիշը ամսվա մեջ (հունվարին) 8 թռիչք-վայրէջքն է, այսինքն՝ շաբաթական երկու չվերթ:

Ինֆոգրաֆիկաները պատկերում են Գյումրու օդանավակայանի արտադրական ցուցանիշներն ըստ 2016 թ. 9 ամիսների՝ համեմատած 2015-ի տվյալների հետ (այս տարվա սկզբին անդրադարձել էինք «Զվարթնոց» եւ «Շիրակ» օդանավակայանների 2013-2015 թթ. ցուցանիշներին. պարզվել էր, որ «Շիրակում» 2014-ին անկում է եղել 2013-ի համեմատ, սակայն 2015-ին աճ է գրանցվել):

Մեկնած եւ ժամանած ուղեւորների, առաքված ու ներմուծված բեռների (տոննայով) տվյալները ընդհանուր են ներկայացված:

Flights: Shirak
Create line charts

Passengers: Shirak
Create line charts

Cargo: Shirak
Create line charts

Գյումրու օդանավակայանի նոր կերպարը

Կառավարությունը ներկայում «Շիրակը» դիտարկում է առաջին հերթին որպես բյուջետային ավիաընկերությունների (low-cost carrier) հանգրվան: «Մենք ««Արմենիա» միջազգային օդանավակայաններ» ընկերության տնօրինության հետ նախատեսել ենք «Շիրակը» զարգացնել որպես բյուջետային ավիաընկերությունների հետ աշխատող օդանավակայան»,- լրագրողների հետ զրույցում ամսի 27-ին նշեց ՔԱԳՎ-ի պետ Սերգեյ Ավետիսյանը՝ հավելելով, որ Գյումրու օդանավակայանում չի գործում 10.000 դրամ «օդի տուրքը», բացի դրանից՝ կոնցեսիոներն իջեցրել է այդտեղի ծառայությունների սակագները:   

Բյուջետային կամ «լոուքոսթեր» կոչվող ավիաընկերություններն առաջարկում են ցածր գներ ոչ բարձրակարգ ծառայությունների դիմաց: Որպես կանոն՝ այս դեպքում չկա բիզնես կամ առաջին կարգ, «որքան շուտ, այնքան էժան» սկզբունքով խրախուսվում է նստատեղերի վաղաժամ պատվիրումը, օգտագործվում են նույն տիպի օդանավեր, որոնցում ծառայությունները վճարովի են (ներառված չեն տոմսի գնի մեջ), կան ուղեբեռի քաշի ու չափերի սահմանափակումներ, կատարվում են ուղիղ չվերթներ առանց տրանսֆերի կամ կանգառի, ընդ որում՝ օրվա ընթացքում նույն օդանավը մի քանի չվերթ է կատարում, կիրառվում են քիչ ծանրաբեռնված օդանավակայաններ, ուշացումներից խուսափելու համար թռիչքներն իրականացվում են պիկ ժամերից դուրս՝ հիմնականում վաղ առավոտյան կամ ուշ երեկոյան, եւ այլն:     

Գյումրու օդանավակայանի «առաջին հաճախորդ» «Pobeda»-ն հենց բյուջետային ընկերություն է: Այն 100 տոկոսով պատկանում է «Aeroflot»-ին: Սրանից առաջ ռուսական հսկան 2013-ին հիմնադրել էր «Dobrolet» անունով բյուջետային փոխադրող, որը ստիպված եղավ փակվել Եվրամիության կիրառած պատժամիջոցների արդյունքում (ընկերությունը Մոսկվայից թռչում էր նաեւ Ղրիմի մայրաքաղաք Սիմֆերոպոլ): 2014-ի օգոստոսին «Dobrolet»-ը դադարեցրեց թռիչքները, իսկ մեկ ամիս անց հիմնադրվեց «Pobeda»-ն, որն իր լոգոյով կրկնում է նախորդին, սակայն քանի որ այլ իրավաբանական անձ է, շրջանցել է ԵՄ պատժամիջոցները: «Pobeda»-ն չի մեկնում Ղրիմ, սակայն շահագործում է թե տեղական, թե միջազգային ուղղություններ:

Ըստ ընկերության կայքի՝ «Pobeda»-ն ունի 12 հատ «Boeing 737-800», որոնց միջին տարիքը մի քանի ամիս է, այսինքն՝ նոր ինքնաթիռներ են: Ավիափոխադրողը հայտարարում է, որ իր բոլոր ուղղություններում ունի 999 ռուբլի (7500 դրամ, ներառյալ հարկերը) գնով տոմսեր: ՀՀ ՔԱԳՎ-ի հայտարարած 10.000 դրամը (սա նվազագույն շեմն է), փաստորեն, ավելի թանկ է, չնայած Սերգեյ Ավետիսյանը լրագրողների հետ զրույցում վստահություն հայտնեց, որ Գյումրու ուղղությամբ նույնպես կլինեն 999 ռուբլի արժեցող տոմսեր: «Pobeda»-ի կայքում առայժմ հնարավոր չէ Մոսկվա-Գյումրի-Մոսկվա տոմս պատվիրել: Վերջինիս մամլո խոսնակ Ելենա Սելիվանովան rusarminfo.ru-ին ասել է, որ դեռեւս որոշում չեն ընդունել չվերթի թողարկման, տոմսերի վաճառքի եւ առաջին թռիչքի բացման մասին, ինչը հավանաբար կանեն եկող շաբաթ:

Հոկտեմբերի 30-ին եւ նոյեմբերի 1-ին Դոնի Ռոստովից «Pobeda»-ն կմեկնի համապատասխանաբար Բաքու (շաբաթական 4 անգամ) եւ Թբիլիսի (շաբաթական 3 անգամ): 999 ռուբլով կիրացվի առաջին չվերթների տոմսերի նվազագույնը 50 տոկոսը, իսկ սեզոնի ընթացքում՝ նվազագույնը 30 տոկոսը: Նոյեմբերի 18-ին էլ կմեկնարկի Սամարա-Ալմաթի չվերթը: Այս ուղղության համար փոխադրողը 999 ռուբլով վաճառքի է հանել 15.000 տոմս: Ընկերությունը նշում է, որ նոր չվերթները մեծ պահանջարկ ունեն:      

«Շիրակն», ըստ էության, փորձում է գնալ վրացական Քութայիսի օդանավակայանի ճանապարհով, որը վերաբացվել է 2012-ին՝ թիրախում ունենալով բյուջետային փոխադրողներին: Այսօր Վրաստանի երրորդ օդանավակայանը (ուղեւորահոսքով զիջում է Թբիլիսիի եւ Բաթումի օդանավակայաններին) եվրոպական հայտնի «լոուքոսթերներից» մեկի՝ հունգարական «Wizz Air»-ի բազաներից է: Մեծապես վերջինիս շնորհիվ ուղեւորների թիվը 2012-ից զգալի աճել է: Համեմատենք Գյումրու եւ Քութայիսի օդանավակայանների ուղեւորահոսքը վերջին 3 տարիներին (Գյումրին ունի մոտ 120.000, իսկ Քութայիսը՝ 150.000 բնակիչ).

2013- Գյումրի՝ 66.534, Քութայիս՝ 187.939
2014- Գյումրի՝ 37.857, Քութայիս՝ 218.003
2015- Գյումրի՝ 39.328, Քութայիս՝ 182.954

«Ավիակոմպանիա Արմենիա». ծանր կյանք՝ ռուսական միջավայրում

Հայաստանից կանոնավոր փոխադրումներ կատարելու հավաստագիր ունեն երկու ավիաընկերություն՝ «Տարոն-Ավիան» (6 ուղղության իրավունք՝ Մոսկվա, Կրասնոդար, Սամարա, Նիժնի Նովգորոդ, Վորոնեժ, Բեյրութ) եւ «Ավիակոմպանիա Արմենիան» (17 ուղղության իրավունք՝ Մոսկվա, Միներալնիե Վոդի, Թեհրան, Սանկտ Պետերբուրգ, Սոչի, Դոնի Ռոստով, Կրասնոդար, Սամարա, Կիեւ, Պրահա, Ֆրանկֆուրտ, Բրյուսել, Հռոմ, Լոնդոն, Բոլոնիա, Դուբայ եւ Թել Ավիվ): Եթե առաջինը դեռ նախապատրաստվում է, ապա երկրորդը հուլիսից թռիչքներ է իրականացնում: Այս մասին գրել ենք նախորդ հոդվածում:

«Արմենիան» հուլիսի 18-ից մինչ օրս Երեւանից թռչում է Մին. Վոդի (շաբաթական 2 անգամ), օգոստոսի 1-ից գնում էր նաեւ Մոսկվա, սակայն վերջին անգամ այդ ուղղությամբ թռել է հոկտեմբերի 9-ին: Չնայած սկզբում հայտարարվել էր ամենօրյա թռիչքների մասին, վերջին շրջանում դրանք իրականացվել են խախտված գրաֆիկով: Զուգահեռաբար այս պահին Մոսկվայից Երեւան գալու իրավունք ունի 7 ռուսական ավիափոխադրող, հաճախականությունների մասին էլ չենք խոսում: «Արմենիայի» armeniafly.com կայքի ամրագրման բաժնում Երեւան-Մոսկվա հերթական ուղիղ չվերթի ամենամոտ օրը դեկտեմբերի 11-ն է: Օգոստոսի 31-ից հայկական փոխադրողը շաբաթական 2 անգամ կատարում էր Երեւան-Թեհրան-Երեւան թռիչքներ, սակայն դրանցից վերջինն իրականացվել է հոկտեմբերի 12-ին: Հայաստանի ու Իրանի մայրաքաղաքներն այսօր իրար են կապում իրանական 2 ընկերություն՝ «Mahan Air»-ը (ամեն օր) եւ «Iran Aseman Airlines»-ը (շաբաթական 3 անգամ): Այսինքն՝ այստեղ էլ մրցակցությունը մեծ էր: Ինչ վերաբերում է «Արմենիայի» կողմից առաջարկվող Թբիլիսիի չվերթին, ապա այն իրականում, ինչպես բազմիցս գրել ենք, codeshare՝ համատեղ թռիչք է «Georgian Airways»-ի հետ, այսինքն՝ հենց վրացական ընկերությունն է թռիչքների օպերատորը, իսկ հայկականը նրա գործընկերն է:   

Չնայած «Արմենիան» հայտարարել էր, որ հոկտեմբերի 14-ից թռչելու է Լոնդոն, Դուբայ, Վորոնեժ, Աստրախան, Սարատով, այս պահին հայտնի է միայն Վորոնեժի մասին: Առաջին չվերթը նախատեսված է դեկտեմբերի 16-ին (շաբաթական 2 անգամ): Գինը հայտարարվել է 26.000 դրամից սկսած (49 եվրո), սակայն սա նույն պատմությունն է, ինչ եղավ այս տարվա գարնանը, երբ ընկերությունը հայտարարեց հայկական շուկա մտնելու մասին, իսկ տոմսի գինը՝ նվազագույնը 49 եվրո: Պարզվեց, որ այդ գինը չի ներառում հարկերը: Նույնը հիմա է՝ պաշտոնական կայքի ամրագրման համակարգում Երեւան-Վորոնեժ տոմսն արժե շուրջ 60.000 դրամ (որից 21.000-ը հարկերն են), իսկ հետադարձը՝ 38.000 (հարկ չի հաշվվում), ընդհանուր՝ 98.000 դրամ (190 եվրո):   

«Արմենիան» իր ֆեյսբուքյան էջում նշել է, որ Սարատովի օդանավակայանը չի համապատասխանում միջազգային չափանիշներին, այն չի կարող ընդունել իր օդանավերը, իսկ մյուսների վերաբերյալ բանակցությունները շարունակվում են, ինչով էլ պայմանավորված է հետաձգումը: Այսպիսով՝ հայկական փոխադրողի կողմից գործարկվող եւ գործարկվելիք ուղղություններից Մոսկվան խիստ մրցակցային է, Մին. Վոդի-Երեւան-Մին. Վոդիի հանդեպ արդեն այս ամիս, ինչպես նշեցինք վերեւում, հավակնություններ են հայտնել «Nordwind Airlines»-ը եւ «Ikar»-ը. յուրաքանչյուրը՝ շաբաթական 7 չվերթ «Արմենիայի» 2-ի դեպքում: Վորոնեժ թռչելու իրավունք ունի նաեւ «Տարոն-Ավիան», սակայն չի բացառվում, որ շատ շուտով հայկական ընկերություններին այստեղ էլ ոտք կգցեն ռուսականները, ինչը, կարծես, օրինաչափություն է դարձել:

Բայց մինչ ռուսները նորից կհայտարարեն հստակ նպատակներ հետապնդող իրենց ծրագրերի մասին, անդրադառնանք մի հետաքրքիր դրվագի:

Գրել ենք, որ «Արմենիան» շահագործում է երկու «Boeing»` EK-73736-ը եւ EK-73786-ը (ընկերությունը հայտարարել է նաեւ «Bombardier CRJ200» ունենալու մասին, սակայն մանրամասներ սրա վերաբերյալ չկան): Թռիչքներն առցանց գրանցող flightradar24.com կայքի շնորհիվ կարող ենք տեսնել, որ EK-73736-ը ներկայում թռչում է Երեւան-Մին. Վոդի-Երեւան ուղղությամբ՝ այս պահին միակ չվերթը, որը կատարում է ինքը՝ «Արմենիան»: Իսկ EK-73786-ը, որը տեսակով եւ տարիքով ավելի նոր ինքնաթիռ է, շահագործում է Թբիլիսի-Մոսկվա-Թբիլիսի գիծը:

Հայտնի է, որ «Արմենիան» վրացական կապիտալով ընկերություն է, դրա իրական տերն էլ Թամազ Գաիաշվիլին է, ում «Georgian Airways»-ն էլ կանգնած է հայկական փոխադրողի թիկունքում: Հիշեցնենք, որ EK-73736-ն էլ «Արմենիան» վերցրել է «Georgian Airways»-ից: Իսկ հիմա հակառակ պատկերն է՝ վրացի ներդրողը հուլիսին Կանադայից Հայաստան բերված օդանավը դրել է վրացականի տրամադրության տակ (չվերթներն իրականացվում են «Georgian Airways»-ի A9 կոդով), եւ ինքնաթիռն ամեն օր 2 անգամ գնում-գալիս է Մոսկվա: Այսինքն՝ երկու ընկերությունների տերերն ավելի շահեկան են համարել Թբիլիսիի ուղղության շահագործումը, իսկ Երեւանը մնացել է խաղից դուրս (եթե հավատանք ամրագրման համակարգին, մինչեւ դեկտեմբերի 11-ը, հենց այդ ամսին է սկսվում ՌԴ արտագնա աշխատանքի մեկնածների վերադարձը Հայաստան): Ստացվում է, որ «Արմենիան» այս պահին մեկ ինքնաթիռով շահագործում է մեկ ուղղություն: Այնինչ այս տարվա մարտին Թ. Գաիաշվիլին հայտարարել էր, որ ապրիլին ունենալու են 3, հունիս-հուլիսին՝ եւս 2, իսկ տարվա վերջին՝ մոտ 8 օդանավ:

Ի մի բերելով՝ կարող ենք ասել, որ ռուսական ընկերությունները, շարունակելով իրենց ավանդական մարտավարությունը, փորձում են մեծ հաճախականությունների, ավելի ժամանակակից ու տարողունակ օդանավերի, նաեւ գնային քաղաքականության միջոցով ճզմել ու ասպարեզից հանել հայկական փոխադրողին/ներին՝ կարծես չհանդուժելով դրանց գոյությունը: Ներկա իրավիճակը ցույց է տալիս, որ ազատ շուկայական հարաբերություններում եւ «բաց երկնքի» պարագայում, երբ թե տեղական, թե արտասահմանյան ընկերությունները դրված են կշեռքի նույն նժարի վրա, նոր-նոր ձեւավորվող, գրեթե ավիապարկ չունեցող հայկական ընկերություններին մնում է, հույսը սեփական ուժերի վրա դրած, մանեւրելու ինչ-որ ուղիներ փնտրել, սակայն տպավորություն է, որ ընթացիկ զարգացումները ընկրկելու նշան են:    

Հ.Գ. Հոկտեմբերի 27-ին բելգիական «Brussels Airlines» ավիաընկերությունը հայտարարել է Բրյուսել-Երեւան-Բրյուսել թռիչքի մասին, որը կմեկնարկի 2017-ի մարտի 31-ից: Թռիչքները կկատարվեն «Airbus A320» օդանավերով շաբաթական 1 անգամ, իսկ հուլիս-օգոստոսին՝ 2-ական: Ավիաընկերությունը Երեւանից մեկնողներին իբրեւ շարունակություն առաջարկում է թռիչքներ Բրյուսելից դեպի աշխարհի տարբեր քաղաքներ: «Brussels Airlines»-ը Բելգիայի մայրաքաղաքից օրական իրականացնում է շուրջ 300 չվերթ ավելի քան 90 ուղղություններով դեպի Եվրոպա, Աֆրիկա, ԱՄՆ, Կանադա, շուտով նաեւ Հնդկաստան: Բրյուսել-Երեւան-Բրյուսել չվերթը բելգիական փոխադրողի եւ «ArmWings» ընկերության նախաձեռնությունն է:  

«Շիրակ» օդանավակայանի լուսանկարները՝ Արմեն Գասպարյանի (tankasan.livejournal.com)


Գլխավոր էջ

Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։