Կիրակի, 23 սեպտեմբերի

Ո՞վ է իրավախախտում կատարած անձը՝ դատախազի տեղակալ Արմեն Շիրոյա՞նը, թե՞ Եգոր Սիմոնյանը



Ալավերդու կենտրոնական Թումանյան փողոցի մայթերն ապօրինի ծառահատումների պատճառով  մերկացել են՝ վերջին տարիներին ներկա եւ նախկին քաղաքապետերի կողմից փողոցի և քաղաքի կենտրոնով անցնող երկաթգծի արանքում գտնվող հողերն իրենց մերձավորներին և քաղաքի պաշտոնյաներին հասարակական օբյեկտներ կառուցելու նպատակով  հատկացնելու պատճառով: Հողերը հատկացնելուց հետ քաղաքապետարանը կառուցողներից չի պաշտպանում մայթերի ծառերը:

Լոռու մարզի դատախազի տեղակալ  Արմեն Շիրոյանը Ալավերդու Թումանյան փողոցի մայթեզրի՝49/8 հասցեում, երկհարկանի շինություն է կառուցում: Արմեն Շիրոյանը մի քանի տարի շարունակ եղել է Լոռու մարզի դատախազության Ալավերդու նստավայրի դատախազը: Շինարարության ժամանակ երկու ծառ է հատվել: Թումանյան փողոցը նաև միջպետական ճանապարհ է: Բանուկ փողոցով անցուդարձ անող  ալավերդցիների աչքից չի վրիպել, որ կառույցի շինարարական աշխատանքներին պարբերաբար  հետևում է Արմեն Շիրոյանի եղբայրը՝ Արթուր Շիրոյանը, շինարարության ընթացքը հաճախ դիտելու է գալիս  նաև մարզի  դատախազի տեղակալը:

Կառույցը քաղաքապետարանի շինարարական փաստաթղթերում ձևակերպվել է ոմն  Եգոր Սիմոնյանի անունով: Շինարարության թույլտվության մեջ, ի տարբերություն մյուս թույլտվությունների, Եգոր Սիմոնյանի անձի մասին որևէ տեղեկություն չի նշված, չի ներկայացված նաև օբյեկտի հակիրճ բնութագիրը:

Ասենք, որ  հատված ծառերի հետ կապված  մեր հարցումների ժամանակ քաղաքապետարանի աշխատողները միմյանց հարցնում էին. «Ո՞նց է Արթուր Շիրոյանենց  օբյեկտի մեզ մոտ գրանցված մարդու հասցեն»: Պարզվեց, որ Եգոր Սիմոնյանը ապրում է քաղաքի Ջրավազան թաղամասի  60/26 տանը: Նրանից փորձեցինք պարզել ծառերը կտրելու հանգամանքները: Եգորը տանը չէր: «Իսկապես շինարարության տերը  Եգո՞րն է»,- հարցի նրա մորը։ «Կարո՞ղ եմ Ձեր այդ հարցին չպատասխանել»,- նեղսրտած պատասխանեց մայրը՝ տիկին Քնարիկը: Վերջինս պատմեց, որ Եգորն աշխատում է «Թեղուտ» ՓԲԸ-ում:

Ամիսը 100-150 հազար դրամ աշխատավարձ է ստանում, ընտանիքի միակ կերակրողն է: Թումանյան փողոցի մայթեզրի երկհարկանի շինությունը Արմեն Շիրոյանը կառուցում է  Ալավերդու նախկին քաղաքապետ Արտավազդ Վարոսյանի 2015թ.-ի սեպտեմբերի 15-ի N17 թույլտվությամբ: Օբյեկտի նախագծային փաստաթղթերը պատրաստել է Վանաձորում գրանցված «Ռոսիա Քոնսալթինգ» ՍՊԸ-ն: Նախագծում մայթեզրի ծառերի վերեբերյալ խոսք չկա։ Քաղաքապետարանի քաղաքաշինության բաժնում անխոս ընդունել են նախագիծը: Ծառերի հատման մասին  մեր գրավոր հարցմանը իր պատասխան գրության մեջ քաղաքապետ Կարեն Փարեմուզյանը չի հերքել նշված հասցեում դատախազի տեղակալի շինարարություն կատարելու փաստը: «Ինչ վերաբերում է ծառերին, ապա այդ տարածքում 2 ծառ արդեն իսկ կան հատված, որի համար իրավախախտում կատարած անձինք կենթարկվեն  վարչական պատասխանատվության»,-նշել է քաղաքապետ Կարեն Փարեմուզյանը: Քաղաքապետի գրությունից , սակայն չհասկացանք, ով է իրավախախտում կատարած անձը, դատախազի տեղակալը,  թե՞ Եգոր Սիմոնյանը:

Քաղաքապետ Կարեն Փարեմուզյանը Թումանյան փողոցի մայթեզրի 49/6 հասցեի հողամասի  վրա երկհարկանի խանութ կառուցելու շինթույլտվություն է տվել իր տեղակալ  Արթուր Վարոսյանի հորը՝ Կամո Վարոսյանին:

Վերջինս  2016թ.-ի օգոստոսի ի 4-ի  N 18 շինարարական  թույլտվությունը ստանալու ժամանակ եղել է համայնքի ավագանու անդամ: Կամո Վարոսյանը նաև Լոռու մարզպետ Արթուր Նալբանդյանի մերձավոր շրջապատի մարդկանցից է: Քաղաքապետի շինարարական  թույլտվության մեջ հայտնվում է, որ 49/6 հասցեի հողամասում նախատեսվում է կառուցել  երկհարկանի խանութ, որը պետք է լինի  քարե կառույց, ուղղանկյունաձև հատակագծով, 6,10x7,00 արտաքին չափերով ,1-ին, 2-րդ հարկերի  մաքուր բարձրությունը ՝3,0մ, միջին ռիսկայնության աստիճանի (2-րդ կատեգորիա):

Օբյեկտի նախագծային փաստաթղթերը կրկին պատրաստել է «Ռոսի Քոնսալթինգ» ՍՊԸ-ն:  Այստեղ ևս նախագծով  թվով 3 ծառերն «անտեսվել» են։ «Ինչ վերաբերվում է  ծառերին, այդ տարածքում  հատելու նախապատրաստված ծառեր չկան»,- նոյեմբերի 7-ի իր  գրությամբ  մեզ հայտնել  է քաղաքապետը: Իրականում ծառերն ու  Կամո Վարոսյանի օբյեկտը «գրկած  են» իրար, ծառերի ճյուղերի մեծ մասը  մտել են կառուցվող շենքի տարածքը, այդ պատճառով ճյուղերի մեծ մասը կտրվել է:

Թե որքանով է նախագծային պահանջներին  համապատասխանում Կամո Վարոսյանի կառուցվող  երկհարկանի խանութը և ինչու մայթերի ծառերից գոնե 1-2 մետր հեռու չի կառուցվել այն,  քաղաքապետարանում  մեզ չպատասխանեցին:

Հայտնին մեկն է, որ Թումանյան փողոցի մայթեզրերի ծառերը դարձել են խանութներ կառուցողների թիրախ ու հերթով հատվում են, իսկ դրա մասին գիտի անձամբ քաղաքապետը եւ քաղաքապետարանի աշխատակիցները։ Դրա վկայությունն է  ավարտված օբյեկտերին հարող ծառերից ազատված մայթերը: Այստեղ ծառահատումներ կատարելիս ոմանք ծառերի  արմատների վրա լցնում են ծառը չորացնող նյութեր, ապա կարճ ժամանակ անց կտրում դրանք: Կառուցողների մի մասն էլ  իրենց հատկացված տարածքների  ծառերը այրում են , ապա  գցում օբյեկտի հիմքերը:

Ալավերդցիներին երանությամբ եմ հիշում Թումանյան փողոցի լանջերի ու մայթեզրերի երբեմնի փարթամ ու գեղեցիկ ծառերը:  Հիշեցնենք, որ խորհրդային տարիներին լեռնամետալուրգիական կոմբինատի կողմից արտանետվող SO-2 գազը կլանելու հատկության պատճառով Ալավերդիում մասսայաբար  տնկում էի չինական ակացիաներ: Դրանք նույնպես անցած 25 տարիներին իսպառ վերացվել են՝չխնամվելու պատճառով :    


Գլխավոր էջ



Մեկնաբանություններ (3)
1. Սանթրո17:13 - 15 նոյեմբերի, 2016
Ի՜ ի, մթամ դրանց խանութներիցը բան տեն առնիլ, էնա մարթ չի մնացել քաղաքումը
2. ԳՈՀԱՐ 09:26 - 16 նոյեմբերի, 2016
Եթե օրենքի սահմաներում ինչ որ բանե են կառուցում օրինակ ես ուրախանումեմ անկախ նրանից ով է կառուցողը լիշ բը աշխատատեղ ավելանա ,որը մեր քաղաքին անհրաժեշտ է :
3. Գեւորգ12:25 - 16 նոյեմբերի, 2016
,,Ալավերդի,, անունը գալիս է թուրք բորչալու ցեղի առաջնորդ Ալլահվերդի Մոլլա օղլուց! Մեծ ամոթ հազարամյակների բնակավայրը քոչվոր թուրքի անունով կոչելը: ,,Լենինական,, ,,Կիրովական,, ,,Ուզունլար,, նույնիսկ ,,Ղաչաղան,, եւ շատերը փոխվեցին, բայց մոլլի անունը մնաց! Առաջարկում եմ՝ ,,Ձորփոր,, (պատմ.), ,,Պղնձոր,, (կամ ,,Պղձոր,, - Վանաձորի նման), կամ ,,Քորի,, (Աքորի - նման) եւ այլն:
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ