Ասլոյան եղբայրները հաղթել են տեխնոլոգիական կենտրոնի օնլայն խաղերի պատրաստման մրցույթում
Գայանե Սարգսյան
12-ամյա Նարեկն ու 15-ամյա Վահեն հաղթող են ճանաչվել Վանաձորի տեխնոլոգիական կենտրոնի կողմից անցկացված KODU վիզուալ ծրագրավորման միջավայրում օնլայն խաղերի պատրաստման մրցույթում:
Ասլոյան եղբայրները նախ մրցակցել են Լոռու մարզի տարբեր համայնքներից մրցույթին մասնակցող շուրջ 100 դպրոցականների հետ: Հոկտեմբերի 29-ին անցկացված մրցույթի առաջին փուլի արդյունքում եզրափակիչ փուլ են անցել 22 դպրոցական: Դեկտեմբերի 3-ին աշակերտները ներկայացրել են իրենց պատրաստած խաղերը: Արդյունքում լավագույնն է ճանաչվել վանաձորցի Ասլոյան եղբայրների աշխատանքը, ինչի համար նրանք արժանացել են մրցանակի՝ դյուրակիր համակարգչի տեսքով:
Եղբայրները ծրագրավորման հիմունքներին ծանոթացել են տեխնոլոգիական կենտրոնի ամառային դպրոցի շրջանակներում անցկացվող դասընթացների ընթացքում: Հենց այդ ընթացքում էլ նախապես բժշկի մասնագիտությունն ընտրած Վահեն միտքը փոխել է ու որոշել՝ անպայման ծրագրավորող է դառնալու:
«Առաջ ես միայն բժշկությամբ էի հետաքրքրվում: Ամառային արձակուրդներին, երբ տեխնոլոգիական կենտրոնում ամառային դպրոցը բացվեց, ծնողներս խորհուրդ տվեցին գնալ ու մասնակցել: Սկզբում չէի ուզում, բայց երբ գնացի, դուրս շատ եկավ»,- պատմում է Վահեն:
«Վահեն մանկուց տարված էր համակարգչով, ոչ միայն տարբեր խաղեր էր խաղում, այլև 11 տարեկանում մի քանի խաղերի ադմինիստրատոր էր: Զգում էի, որ ծրագրավորումն իրենն է: Շատ ուրախացա, որ նորաբաց տեխնոլոգիական կենտրոնում անցկացվող դասընթացների ընթացքում նա ևս հասկացավ դա»,- ասում է մայրը՝ Մանանա Մանանյանը:
Հոկտեմբերին, երբ տեխնոլոգիական կենտրոնում դպրոցականների համար անցկացված KODU խաղերի ծրագրավորման դասընթացի ավարտին հայտարարվել է մրցույթի մասին, եղբայրները որոշել են՝ միասին կմասնակցեն մրցույթին:
«Մենք կարողացանք հաղթել մեր ուժերը միավորելու ու համատեղ աշխատելու շնորհիվ»,- ասում է Նարեկը:
Հաղթանակի հասնելու համար եղբայրները 7 օրվա ընթացքում ստեղծել են խաղը, ապա շուրջ երկու շաբաթ փորձարկել ու կատարելագործել այն:
«Հույս ունեինք, որ կհաղթենք, որովհետև շատ էինք աշխատել, փորձել էինք օրիգինալ բան մտածել, մաքսիմալ լավ գրաֆիկական դիզայն ստանալ»,- նշում է Վահեն:
Հարցին՝ հայաստանյան ՏՏ ոլորտի ո՞ր կազմակերպությունում կցանկանար վաղն աշխատել, Վահեն պատասխանում է՝ կուզեի իմ սեփական կազմակերպությունն ստեղծել։
«Այսօր շատ մարդիկ կան, որ բարձրագույն կրթություն ունեն, բայց աշխատանք չունեն, չեն կարողանում գտնել: Ծրագրավորողի մասնագիտությունը քեզ թույլ է տալիս մշտապես ու նաև բարձր վարձատրվող աշխատանք ունենալ: Մեր դպրոցներում ամենակարևորը ինֆորմատիկայի ուսուցիչների վերապատրաստումն է, որովհետև մարզի շատ դպրոցներում ինֆորմատիկայի մակարդակը շատ ցածր է: Նաև պետք է համապատասխան կաբինետներ ստեղծվեն»,- ասում է Վահեն:
Ծրագրավորողի իր կարիերան Վահեն ցանկանում է շարունակել Վանաձորում, եթե միայն առաջիկայում մարզն իսկապես առաջընթաց գրանցի այդ ոլորտում:
Տղաների պատրաստած խաղին կարող եք ծանոթանալ այստեղ՝
https://www.youtube.com/watch?v=aWUQQXdcg7I&t=22s
https://www.youtube.com/watch?v=HrpsBYYtYsE
Մեկնաբանել