Ամալյա Մարգարյան

2015թ. «Էլեկտրիկ Երևան» շարժման ժամանակ ոստիկանության բռնի գործողություններից տուժած լրագրողներն ընդդեմ ոստիկանության աշխատակիցների գործով դատական նիստի ընթացքում այսօր կատարվեցին փաստաթղթերի ուսումնասիրություններ, դատարանը ամփոփեց և ներկայացրեց երկու հատորանոց դատական գործը, ուսումնասիրվեցին նաև իրեղեն ապացույց հանդիսացող ֆոտոխցիկը և ջարդված օբյեկտիվը, ինչպես նաև՝ բջջային հեռախոսը:

Դատական կողմերը նիստի ընթացքում եկան այն եզրակացության, որ տեսաձայնագրություններն ուսունասիրելու կարիք չկա, քանի որ ամբողջը ներառված է արձանագրություններում:

Ամբաստանյալներից Դավիթ Փերիխանյանը դատարանին խնդրեց հրապարակել իր նախաքննական ցուցմունքները և ընդունելով իր մեղքը` ևս մեկ անգամ ներողություն խնդրեց տուժողներից:

Դատավորը հրապարակեց նախաքննական ցուցմունքերը, որտեղ նշվում էր, որ Դ. Փերիխանյանը հետաքրքրությունից դրդված է եղել դեպքի վայրում, որոշել է գնալ Բաղրամյան պողոտա և տեսնել` ինչ է կատարվում: Ոստիկանության աշխատակիցը եղել է քաղաքացիական հագուստով, չի եղել ծառայության մեջ:

«Կատարվող գործողություններին չէի մասնակցում, կողքից հետևում էի այդ ամենին և ոչ մի ցանկություն չունեի միջամտել կատարվող գործողություններին, ոչ էլ այդ ժամանակ ծառայության մեջ էի: Մոտ հինգ րոպե հետո նկատեցի, որ ցուցարարներից մեկի ձեռքին ոստիկանական թափանցիկ վահան է և հասկացա, որ այն վերցվել է ինչ-որ ոստիկանից, մոտեցա ցուցարարին, նա առանց դիմադրության ինձ տվեց վահանը և հեռացավ: Քանի որ չգիտեի՝ ում էր պատկանում վահանը, թողեցի ինձ մոտ»,- իր նախաքննական ցուցմունքում գրել է մեղադրյալը:

Ոստիկանության աշխատակիցը նշում է, որ Ազատության պողոտայում հավաքվածները սկսել են հայհոյանքներ հնչեցնել ոստիկանների հասցեին: «Չնայած քաղաքացիական հագուստով էի, բայց հնչեցված արտահայտություններից ինքս էլ էի վիրավորվում»,- ցուցմունքում գրել է մեղադրյալը:

Բերման ենթարկելիս նկատել է անծանոթ լրագրողին, ով մոտիկից նկարել է իրեն:

«Պահի տակ բարկացա և պահանջեցի, որ ապարատը մի կողմ տանի, նա չարեց, ես էլ շտատիվից բռնեցի և նրա ձեռքից վերցնելով՝ տեխնիկան հարվածեցի գետնին»:

Շարունակելով ցուցմունքը՝ նա նշել է, որ գետնին գցելուց հետո ոտքով հարվածել է տեսախցիկին, վերցրել այն ու հեռացել: Քիչ հետո տեսախցիկը թողել է Օպերայի եւ բալետի թատրոնի շենքի աստիճանների վրա:

Մյուս ամբաստանյալները ևս ընդունեցին իրենց մեղքը և դատարանին խնդրեցին հրապարակել նախաքննության ընթացքում տրված ցուցմունքները:

Դատական նիստի ընթացքում «Ուտոպիանա» ՀԿ-ի ներկայացուցիչ Դավիթ Գյուրջյանը հանդես եկավ միջնորդություններով: Առաջին միջնորդությամբ փաստաբանը պնդում էր, որ կատարվեն իրեղեն ապացույց հանդիսացող ֆոտոխցիկի լրացուցիչ փորձաքննություններ, քանի որ երկու եզրակացություններում կան հակասություններ: Խնդրեց ճշտել նաև` որքա՞ն են կազմում ֆոտոխցիկի մինչվնասվածքային, հետվնասվածքային արժեքները:

Երկրորդ միջնորդությամբ Գյուրջյանը խնդրեց դատարան հրավիրել վկա, «Ազատություն» ռադիոկայանի լրագրող Հովհաննես Մովսիսյանին և ՀՀ ոստիկանության պետի տեղակալ Լևոն Երանոսյանին:

Երկու միջնորդությունների կապակցությամբ էլ դատախազն առարկեց: Հաջորդ նիստի ընթացքում կլսեն վկա Հովհաննես Մովսիսյանին, իսկ խորհրդակցական սենյակից վերադառնալուց հետո դատավորը կհրապարակի որոշումը: Դատական նիստը տեղի կունենա հունվարի 20-ին:

Հիշեցնենք, որ ըստ մեղադրական եզրակացության՝ Տաճատ Նորատունկյանին,Արթուր  Այվազյանին, Կոստան  Բուդաղյանին, Դավիթ Փերիխանյանին մեղադրանք է առաջադրվել այն բանի համար, որ նրանք, հանդիսանալով պաշտոնատար անձ, իրենց պաշտոնեական դիրքն օգտագործելով՝ 2015թ. հունիսի 23-ին Ազատության հրապարակում խոչընդոտել են լրագրողներ Հայկ  Բադալյանի, Խաչատուր Եսայանի Աշոտ Բոյաջյանի,Արթուր Պապայանի մասնագիտական օրինական գործունեությանը: