Հասարակական կազմակերպությունների առաջարկությունների հիման վրա փոփոխություններ կկատարվեն Կոռուպցիայի դեմ պայքարի խորհրդի կազմում՝ նրանում ներառելով քաղաքացիական հասարակության ներկայացուցիչների առավել մեծ թիվ: Այս մասին, ինչպես տեղեկացնում է արդարադատության նախարարությունը, կառավարության նիստում հայտարարել է նախարար Արփինե Հովհաննիսյանը:

Նա նշել է, որ միաժամանակ կմեղմացվեն հասարակական կազմակերպություններին ներկայացվող չափանիշները: Նախարարի խոսքով՝ կազմում կընդգրկվեն նաև մասնավոր (բիզնես) հատվածը ներկայացնող հասարակական կազմակերպությունների ներկայացուցիչներ: Հաշվի առնելով նաև կոռուպցիայի դեմ պայքարի շրջանակներում տնտեսության զարգացման, մարդու իրավունքների պաշտպանության  առանցքային հիմնախնդիրները՝ Խորհրդի կազմում ընդգրկվելու են նաև համապատասխան մարմինների ղեկավարները:

«Առաջարկվող փոփոխություններն ուղղված են Խորհրդի հանրային հաշվետվողականության և գործունեության թափանցիկության բարձրացմանը»,- գրված է պաշտոնական հաղորդագրության տեքստում: