ԱՄՆ հատուկ ծառայությունները համոզված են, որ Ռուսաստանի նախագահ Վլադիմիր Պուտինը կանգնած է Միացյալ Նահանգների նախագահի հանրապետական թեկնածու Դոնալդ Թրամփին սատարելուն ուղղված արշավի հետևում:

Հատուկ ծառայությունների զեկույցի գաղտնազերծված տարբերակում (.pdf) նշվում է, որ ռուսաստանյան հաքերներն են հարձակման ենթարկել Դեմոկրատական կուսակցության էլեկտրոնային փոստը:

Զեկույցի համաձայն՝ Վլադիմիր Պուտինի պատվիրած արշավը մեծ հավանականությամբ ազդել է Միացյալ Նահանգների նախագահական ընտրությունների արդյունքների վրա: Ռուսաստանի նպատակը, ըստ դրա, եղել է ԱՄՆ դեմոկրատական գործընթացների հանդեպ հավատը խաթարելը, Հիլարի Քլինթոնին զրպարտելը և նրա ընտրվելու հնարավորությանը վնասելը: Հատուկ ծառայությունները պնդում են նաև, որ Պուտինն ու ՌԴ կառավարությունը նախընտրություն են տվել ընտրված նախագահ Դոնալդ Թրամփին: «Մենք մեծապես վստահ ենք այս դատողություններում»,- գրված է Ազգային անվտանգության գործակալության (NSA), Կենտրոնական հետախուզական գործակալության (CIA) և Հետաքննությունների դաշնային բյուրոյի (FBI) համատեղ զեկույցում:

Հետախուզական գործողություններից բացի, Կրեմլը մեղադրվում է նաև պետական տեղեկատվամիջոցների և սոցիալական ցանցերի օգտատերերի միջոցով բացահայտ քարոզչություն անելու համար: Ամերիկյան որոշ լրատվամիջոցների հաղորդմամբ՝ գործակալությունները ձեռք են բերել նամակներ, որոնցով ռուս բարձրաստիճան պաշտոնյաները շնորհավորում են Դոնալդ Թրամփի հաղթանակը:

Զեկույցի գաղտնի տարբերակը հինգշաբթի ներկայացվել է գործող նախագահ Բարաք Օբամային, ավելի ուշ՝ նաև Դոնալդ Թրամփին: Վերջինս գաղտնի ծառայությունների ղեկավարների հետ հանդիպումը բնութագրել է որպես «կառուցողական», բայց հերքել է տեղեկությունը՝ պնդելով, որ հաքերային հարձակումները որևէ ազդեցություն չեն ունեցել ընտրությունների արդյունքների վրա: Նա նաև խոստացել է նախագահության առաջին 90 օրերի ընթացքում նշանակել թիմ՝ կիբերհարձակումները դադարեցնելու պլան մշակելու համար:

Հանդիպումից ժամեր առաջ՝ New York Times-ին տված հարցազրույցում Թրամփն այս ամենը անվանել է իր հակառակորդների կողմից կազմակերպված «վհուկների քաղաքական որս», քանի որ ուրիշ կառավարությունների կողմից մյուս հաքերային հարձակումները բավարար լուսաբանման չեն արժանանում: Իսկ ուրբաթ Թվիթերում կատարած գրառումով խնդրել է հետաքննել, թե ինչպես է խիստ գաղտնի տեղեկությունը տրամադրվել ամերիկյան հեռարձակող NBC-ին՝ նախքան այն հասանելի կլիներ իրեն:

Ռուսաստանի նախագահ Վլադիմիր Պուտինը այս մեղադրանքներին անդրադարձել է դեռևս 2016թ-ի դեկտեմբերին՝ մամուլի ասուլիսի ժամանակ՝ ասելով, որ «պարտված կողմը միշտ էլ այլ տեղ է փնտրում մեղավորների»: Կարևորը, ըստ նրա, այն չէ, թե որտեղից են եղել հաքերները, այլ նրանց տրամադրած տեղեկության բնույթը: Պուտինի խոսքով՝ լավագույն ապացույցը նրա, որ հաքերները բացահայտել են ճիշտ տեղեկություն, այն է, որ Դեմոկրատական կուսակցության առաջնորդը հրաժարական տվեց այդ տեղեկությունների հրապարակային դառնալուց հետո:

Նամակները հրապարակած Wikileaks-ի հիմնադիր Ջուլիան Ասանժը նույնպես ասել է, որ Մոսկվան չէ Դեմոկրատական կուսակցության նամակագրությունների արտահոսքի աղբյուրը:

Հիշեցնենք, որ անցած շաբաթ ԱՄՆ նախագահ Բարաք Օբաման կարգադրել էր նահանգներից արտաքսել 35 ռուս դիվանագետների, ինչին Ռուսաստանը հրաժարվել էր պատասխանել նույն կերպ:

Լուսանկարը՝ Associated Press