Չորեքշաբթի, 19 սեպտեմբերի

Անփորձանք ծառայություն քեզ, զինվոր



Այսօր՝ հունվարի 10-ին, Թումանյանի տարածաշրջանում մեկնարկեց 1-ին զորակոչը: Հանրապետությունում զորակոչը սկսվել է հունվարի 8-ից: Զինվորական կոմիսար, փոխգնդապետ Կարեն Հովհաննիսյանի խոսքով՝ Թումանյանի տարածաշրջանի զինակոչի ենթակա զինակոչիկների 98 տոկոսը ներկայացել են զորակոչային հանձնաժողովին: Բոլորը անխտիր անցել են բուժհետազոտություն: Առողջական խնդիրները ունեցողները ուղարկվել են մասնագիտական հիվանդանոցներ՝համապատասխան հետազոտություն անցնելու:

Առողջական ավելի բարդ խնդիրներ ունեցողները ներկայացվել են կենտրոնական բժշկական հանձնաժողովին: Այն զինակոչիկները, որոնց առողջական վիճակը եղել է բավարար, տեղի բժշկական հանձնաժողովի որոշմամբ ընդգրկվել են բանակ մեկնող զինակոչիկների խմբում:

Թումանյանի զինկոմիսարիատը այսօր կենտրոնական հավաքակայան ուղարկեց իր պլան առաջադրանքի 25 տոկոս անձնակազմին: Զինկոմի ասելով այս տարվա զորակոչը աննախադեպ է նրանով, որ առաջին անգամ զինվորական համազգեստը  զինակոչիկները կստանան զինվորական կենտրոնական հավաքակայանում: Նախկինում ստացել են զորամաս հասնելուց հետո:

«Երբեմն զինակոչիկները բանակ մեկնելիս թեթև են հագնվում,  մրսում և հիվանդանում են: Հիմա նախօրոք կստանան իրենց տաք հագուստները: Բոլոր զինակոչիկները ստացել են անհրաժեշտ պատվաստումները: Կարծում եմ այսօր լրիվ առողջ սերունդ ենք ուղարկում բանակ և համալրում մեր զինված ուժերի շարքերը»,-վստահեցրեց  զինկոմ Կարեն Հովհաննիսյանը:

Վաղ առավոտյան Ալավերդու զինկոմիսարիատի շենքի բակում հավաքվել էին բանակ մեկնող զինակոչիկներն ու հարզատները:

«Շատ լավ տրամադրությամբ եմ մեկնում զինվորական ծառայության: Գնում եմ հայրենիքին ծառայեմ, պարտքս կատարեմ ու վերադառնամ: Ճիշտն ասած, ես գտնում եմ, որ սա իմ կյանքի շատ կարևոր իրադարձություն է,  ամեն հայ տղա պետք է պարտադիր ծառայի հայրենիքին ու պատվով վերադառնա  տուն»,-ասաց  զինակոչիկ Ջհան Ալիխանյանը:

«Բարձր տրամադրությամբ եմ որդուս ՝ Ջհանին ուղարկում ծառայության: Ոնց  առողջ ուղարկում եմ, թող  առողջ  էլ տղաս ծառայի հայրենիքին: Բարով, խերով բոլոր զինվորները վերադառնան տուն»,-մաղթեց Ջհանի հայրը՝ Վարդան Ալիխանյանը:

«Միակ տղայիս՝ Ավետ Թանդիլյանին եմ ուղարկում զինվորական ծառայության: Հուզվում եմ, որովհետև բանակի հետ կապված մտահոգություններ ունեմ: Տղայիս հանգիստ չեմ ուղարկում բանակ: Հիմա հայրենիքի սահմանները խաղաղ չեն: Բոլոր մայրերիս մտահոգությունը դա է: Ուրիշ ինչի համար մայրը կանհանգստանա որդուն զինվոր ուղարկելիս: Տա Աստված, որդիս հաջողությամբ ծառայի ու  վերադառնա տուն: Ավետը շատ լուրջ մարդ է: Տղաս հեռակա սովորում է Վանաձորի պոլիտեխնիկ ինստիտուտի մեքենաշինական ֆակուլտետում: Ինքը նաև արհեստավոր է: Ավտոմեխանիկ է»,- որդու մասին պատմեց Աղունիկ Թանդիլյանը:

Հրաժեշտին որդու հետ  գրկախառնվելիս Աղունիկը չդիմացավ՝ արտասվեց. «Մի լացիր, մամ»,- բարի ժպիտով  մորը  հորդորեց Ավետ Թանդիլյանը:

«Ես Նոյեմբերյանի ռայոնի Ոսկեպար գյուղից եմ: Բանակ մեկնողները բոլորն իմ թոռնիկներն են, որին ասեմ: Ավո Մեջլումյանի պապիկն եմ:  Եկել եմ երեխիս բանակ ճանապարհելու: Իմ թոռն է, նա անպայման ուժեղ տղա կլինի բանակում:  Ես բանակում ծառայել եմ, նաև պատերազմում եմ եղել:  Ոսկեպարի պաշտպանության համար եմ կռվել»,-ասաց  Պայքար Սարուխանյանը: Վերջինս մեզ խնդրեց բանակ մեկնող թոռնիկի հետ լուսանկարել իրեն:

Զինակոչիկների այս խմբում ծառայության մեկնեցին 8 օձունցիներ. «Նրանցից Սերոժ Աբովյանին, Մհեր Խեչումյանին և մյուսներին ենք ճանապարհում, մեր ընկերներն են, իրանց մաղթում ենք հաճելի ծառայություն, բարի վերադարձ: Ես մեկ տարի հետո եմ մեկնելու բանակ»,-ասաց Համլետ Հարությունյանը: «Թող մեր սահմաններն անսասան լինեն, ու բոլոր զինվորները վերադառնան իրենց օջախները: Մաղթում ենք մեր երկրին խաղաղություն:  Ես էլ 4 ամիս հետո եմ մեկնելու բանակ»,-ասաց օձնեցի Վրեժ Անթառանյանը:

Օձնեցի Յուրիկ Ադամյանը իր ասելով, թեև  բարձր տրամադրությամբ էր մեկնում բանակ, սակայն մտահոգ էր: «Թող բարի ճանապարհ լինի բոլոր զինվորներին, հաջողություն լինի, աշխարհին խաղաղություն լինի, իմ որդուն և բոլոր զինվորներին բարի վերադարձ»,- մաղթեց  Յուրիկի մայրը՝ Արփինեն:

Չափազանց հուզված էր օձնեցի զինակոչիկ Փաշիկ Կոտանդյանի մայրը՝ Արմիկը. «Առողջ երեխա եմ ուղարկում բանակ: Որ խաղաղ չի սահմանում, կռիվներ են լինում, դա է ինձ տանջում: Իմ տղան խելոք, համեստ տղա է: Փաշիկը միջնակարգ կրթություն ունի: Էդ մինուճար տղեն ունեմ: Երկու հատ էլ աղջիկ ունեմ»,- պատմեց Արմիկը: «Բանակ եմ գնում: Բարով գնում ենք, բարով էլ գալու ենք: Բա , որ մենք չգնանք բանակ, հայրենիքը ով է պաշտպանելու»,- ասաց  Փաշիկը:

Ակներցի Վանո Շավինյանը որդուն՝ Նվեր Շավինյանին էր ուղարկում բանակ: «Երեք տղա ունեմ: Նվերը փոքրս է:  Էսա, որ կգա, կտեսնես ինչ ձևի տղա է Նվերս»,- հպարտացավ հայրը:

Զինակոչիկ Հովսեփ Դոլինյանն էլ ասաց, որ մարտական տրամադրությամբ է մեկնում բանակ. «Սովորում եմ Հյուսիսային համալսարանի տնտեսագիտական բաժնում: Առաջին կուրս եմ: Ծառայությունից հետո կգամ, կշարունակեմ»,-ասաց նա:

Դսեղցի  Նարեկ Դարբինյանն էլ պատմեց, որ ընտանիքում 4 երեխաներ են. «Ես ավագն եմ և առաջինն եմ ծառայության մեկնում»,- պատմեց Նարեկը:

Զինակոչիկները  մոմեր վառեցին Ալավերդու Ս.Գրիգոր Նարեկացի եկեղեցում: Ճանապարհելուց առաջ զինկոմ Կ. Հովհաննիսյանը զինվորներին մաղթեց անփորձանք ծառայություն. «Ես պահանջում և հրամայում եմ: Այսօր քանի հոգով գնում եք բանակ, այդքանդ էլ վերադառնաք Ձեր օջախներ: Թող Աստծո օրհնությունը լինի Ձեր  վրա, մաղթում եմ  բարի ծառայություն, զինվորներ»,-ասաց զինկոմը:

Ալավերդու քաղաքապետարանի կողմից զինակոչիկներին փոքրիկ նվերներ հանձնեց  քաղաքապետի տեղակալ Արթուր Վարոսյանը:  Լոռու մարզպետի անունից զինակոչիկներին բարի մաղթանքների խոսք ուղղեց մարզպետարանի աշխատակազմի ընտանիքի, կանանց և երեխաների  պաշտպանության բաժնի պետ Սասուն Խեչումյանը: Զինակոչիկները հրաժեշտ տվեցին հարազատներին: Շարժվեց նրանց  կենտրոնական զինվորական հավաքակայան տեղափոխող ավտոմեքենան:

Քեզ անփորձանք ծառայություն, զինվոր: Բարի վերադարձ:

Լուսանկարները՝ հեղինակի


Գլխավոր էջ



Մեկնաբանություններ (2)
1. ՀԱՅՈՒՀԻ11:10 - 11 հունվարի, 2017
Սիրտս քրքպվում է, երբ հիշում եմ անցած ապրիլը, երբ պարզվեց, որ թշնամուն հանձնված 800ք հեկտար հող հայրենին, ըստ ՀՀ գերագուն հրամանատարի, ստրատեգիական նշանակություն չունեն մեզ համար։ Չմոռանանք 120 զոհերին, չմոռանանք 800 հեկտար, չմոռանանաք գերագույն հրամանատարի այդ հայտարարությունը։
2. Ռուբեն10:34 - 12 հունվարի, 2017
Հայուհի՛,այդ գերագույն հրամանատար կոչվածի և իր նմանների համար Հայրենիքն ընդամենը ճոխ արոտավայր է,ուղղակի այդ 800 հեկտարի վրա կերը վերջացել էր...իսկ մեր 120 ՍՈՒՐԲ ՆԱՀԱՏԱԿՆԵՐ-ի հետ կա՞ իրենց զավակներից..:Անփորձանք ծառայություն,բարի վերադարձ,երեխեք ջան...
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ