Միգրացիոն ծառայության համակարգչային կենտրոնի լուծարումով կտնտեսվի 9 միլիոն դրամ
Կառավարությունն այսօրվա նիստում հավանության արժանացրեց տարածքային կառավարման և զարգացման նախարար Դավիթ Լոքյանի՝ նախարարության միգրացիոն պետական ծառայության համակարգում գործող «Համակարգչային կենտրոն» պետական ոչ առևտրային կազմակերպությունը լուծարելու որոշման նախագիծը։
ՊՈԱԿ-ից հետո մնացած դրամական միջոցներն ուղղվելու են պետական բյուջե, իսկ այլ գույքն ամրացվելու է տարածքային կառավարման և զարգացման նախարարության «Միգրացիոն պետական ծառայության աշխատակազմ» պետական կառավարչական հիմնարկին:
Ինչպես նշվում է որոշման նախագծի հիմնավորման մեջ՝ ՊՈԱԿ-ի լուծարումը պայմանավորված է պետական կառավարման ապարատի օպտիմալացման, ինչպես նաև պետական բյուջեից կատարվող ծախսերի նվազեցման անհրաժեշտությամբ:
«Համակարգչային կենտրոն»-ն ունի 14 աշխատակից, դրա լուծարումով տնտեսվող գումարի չափը 2017 թվականին կկազմի 9 միլիոն 200 հազար դրամ:
Մեկնաբանել