Շաբաթ, 22 սեպտեմբերի

Համայնքների ղեկավարներին պարտադրում են գումարներ փոխանցել իրենց անհայտ ընկերությանը՝ չիրականացրած ծառայության դիմաց



Որոշ համայնքներում բյուջետային տարին սկսվել է բավականին լարված. համայնքների ղեկավարների եւ աշխատակազմերի միջեւ հակասություններ են առաջացել «Ցենզոր» տեղեկատվա-վերլուծական կենտրոն ՍՊԸ-ի հետ կնքելիք պայմանագրի հետ կապված: Պայմանագրի համաձայն, այս կենտրոնը պետք է համակարգչային  ծառայություններ  մատուցի համայնքներին: Սակայն, ինչպես հավաստիացնում են մեզ համայնքների ղեկավարների աշխատակազմերից, իրականում նրանց գործունեությունը պայմանագրում ամրագրված պարտավորությունների հետ ընդհանուր ոչինչ չունի:

Համայնքապետարանների աշխատակիցների ասելով՝ ավելի քան 6 տարի իրենց պարտավորեցրել են պայմանագիր կնքել հիշյալ ընկերության հետ, որի դիմաց տարվա մեջ մեկ-երկու անգամ սկավառակով ուղարկել են տեղական ինքնակառավարման ոլորտում տեղի ունեցած օրենսդրական փոփոխությունները: Նրանք ասում են, որ դա իրենց բացարձակապես պետք չէ, օրենսդրությանը ծանոթանալու համար իրենք անվճար օգտվում են www.arlis.am, www.parliament.am եւ այդ նպատակի համար ստեղծված այլ կայքերից:

Համայնքապետարանի աշխատակիցները պնդում են, որ ազդեցիկ մեկի պարտադրանքով են համայնքների ղեկավարները վերակնքում «Ցենզոր» ընկերության պայմանագիրը, հակառակ դեպքում ոչ մի համայնքի ղեկավար հենց այնպես գումար չէր տա: Բացի այդ, նման հարցերը կարգավորվում են գնումների ընթացակարգով, ոչ թե զանգերով: Նրանց համոզմամբ, նման բան լինում է միայն այն ժամանակ, երբ հրահանգները «վերեւից» են իջեցվում` մարզպետարան, տարածքային կառավարման նախարարություն (ՏԿՆ):

Մեր տեղեկություններով, հիշյալ կազմակերպության հետ պայմանագիր կնքելու պարտադրանք ներկայացվում է նաեւ հանրակրթական դպրոցների տնօրեններին:

««Ցենզոր» տեղեկատվա-վերլուծական կենտրոն» ՍՊԸ-ն ներկայացված է բոլոր մարզերում: Մենք ավելի քան 30 համայնքների ղեկավարների հետ կապվելով` փորձեցինք պարզել, թե ինչ ծառայություն են մատուցում համայնքներին: Պարզվեց, որ նրանք մեկ անգամ այցելել են Երեւանին մոտ գտնվող մի քանի համայնքներ եւ իրենց հետ տարած սկավառակների բովանդակությունը մուտքագրել են համակարգիչ:

Համայնքների ղեկավարների հետ մեր զրույցից պարզ դարձավ, որ ընկերությունը նույն ծառայության համար տարբեր արժեքներով է պայմանագրեր կնքել համայնքների հետ՝ տարեկան  30 000, 35 000, մինչեւ 90 000 դրամ: Մեզ հետ զրույցում համայնքապետերից մի քանիսը նշեցին, թե այս տարի կհրաժարվեն պայմանագրից, քանի որ իրենք գումարներն այդպես հեշտ չեն հավաքում, որ հեշտությամբ էլ բաժանեն:

Բավականին թվով համայնքներ, որոնք պայմանագրեր ունեն այս ընկերության հետ, չգիտեն, թե ով է այն ներկայացնողը: Հաղորդակցությունը, հատկապես հեռավոր համայնքների հետ, եղել է միայն նամակագրությամբ: Փոստային ծրարով համայնքների ղեկավարներին է ուղարկվում պայմանագիրը, որի մեկ օրինակը հաստատված վերադարձվում է ընկերության հասցեով: Այնուհետեւ ծրարով ուղարկվում է սկավառակը: Ավելի զայրացնող է այն, որ տարվա ընթացքում ծրարով ուղարկվում են նաեւ գործուղման թերթիկներ, որոնք նույնպես պետք է կնքեն եւ դարձյալ ծրարված վերադարձնեն ընկերությանը:

Ընկերության փոստային ծրարին հետադարձ հասցեն նշված է` Կառավարական տուն 3: Հասցեն չնայած թերի է, բայց համայնքների աշխատակազմերին նրանք ներկայանում են Տարածքային կառավարման եւ զարգացման նախարարության (ՏԿԶՆ) անունից: Ընկերությունն ավելի քան 7 տարի համագործակցում է համայնքների հետ, սակայն ՍՊԸ-ի կոնտակտային տվյալները բացակայում են նաեւ համայնքային կայքերում, բացառությամբ Քասախ համայնքի:

ՏԿԶ նախարարությունից հայտնում են, որ «Ցենզոր»-ի հետ իրենք կապ չունեն, չեն ճանաչում այդ ընկերությանը: Նախարարության մի աշխատակից հայտնեց, որ երկու տարի առաջ կրկին դժգոհություններ են լսվել համայնքապետարաններից, եւ իրենք ընկերության տնօրենից պահանջել են, որ նախարարության անունից հանդես չգա:

««Ցենզոր» տեղեկատվական-վերլուծական կենտրոն» ՍՊԸ-ն իրավաբանական անձանց ռեգիստրում գրանցվել է 2009 թ. դեկտեմբերի 29-ին: Հարկային S95.11 դասիչի ներքո գործող ընկերությունը հիմնվել է «համակարգիչների եւ ծայրամասային սարքվածքների նորոգում» իրականացնելու համար: Ընկերության 100% բաժնեմասը պատկանում է նրա հիմնադիր եւ տնօրեն Վարդան Մարտիրոսի Վարդանյանին: Ընկերության իրավաբանական հասցեն տնօրենի հաշվառման հասցեն է:

Մեր հարցին, թե կենտրոնն ինչ վերլուծություններ է կատարում համայնքների համար, Վարդան Վարդանյանը պատասխանեց. «Այդ բառը հենց այնպես է գրված ընկերության անվանման մեջ, մենք զբաղվում ենք համակարգչային տեխնիկայի նորոգումով»: Նա հրաժարվեց հայտնել, թե քանի համայնքների հետ են պայմանագիր կնքել եւ որ հասցեում են գործունեություն իրականացնում: Երբ հայտնեցինք, որ փոստային ծրարին նշված է Կառավարության շենքի հասցեն, ասաց, որ ինչ-որ ժամանակ եղել են այդ շենքում, սակայն ժամանակը չհստակեցրեց: Ապա հարցով դիմեց մեզ. «Կարո՞ղ եք ինձ ցույց տալ ծրարը»: Մեր պատրաստակամությունից հետո ընդհատեց զրույցը եւ հայտնեց, որ քիչ ավելի ուշ կզանգի ու կպատասխանի այդ հարցին: Բնականաբար, նա այլեւս չզանգեց:

Ընկերության տնօրենը մեր հեռախոսազրույցն ընդմիջեց մի քանի անգամ, տպավորությունն այն է, որ որոշ հարցերի պատասխաններ նա համաձայնեցնում էր ինչ-որ մեկի հետ:


Գլխավոր էջ



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ